Russian Oil Imports: યુક્રેનના હુમલાએ રશિયાની ઉંઘ કેમ ઉડાડી? કાચા તેલના ટેન્કર પર બ્રેક, ભારતની ચિંતા વધી
Russia-Ukrain: યુક્રેનમાં થયેલા તાજેતરના હુમલાઓએ રશિયાની ઊંઘ ઉડાડી દીધી છે. રશિયા પહેલેથી જ રિફાઇનરીમાં વધતા વિક્ષેપો અને સ્થાનિક ઇંધણની તીવ્ર અછતનો સામનો કરી રહ્યું છે. હવે યુક્રેનિયન ડ્રોન હુમલાઓએ મોસ્કોને વધુ તણાવમાં મૂકી દીધું છે. રશિયા આ મહિને તેની ક્રૂડ ઓઇલ નિકાસમાં ભારે ઘટાડો કરવાની તૈયારી કરી રહ્યું છે. સ્થાનિક પુરવઠો જાળવવા માટે મોસ્કોને તેના ક્રૂડ ઓઇલનો નોંધપાત્ર હિસ્સો દેશમાં વાળવાની ફરજ પડી છે. રશિયન તેલ આયાતમાં ઘટાડાને કારણે ભારતને પણ મુશ્કેલીઓનો સામનો કરવો પડી શકે છે.
રશિયાના પશ્ચિમી બંદરો (પ્રિમોર્સ્ક, ઉસ્ટ-લૂગા અને નોવોરોસિયસ્ક) માંથી થતી નિકાસ જૂનમાં ઘટીને લગભગ 17 લાખ બેરલ પ્રતિ દિવસ (bpd) થવાની ધારણા છે, જે મે મહિનામાં 25 લાખ બેરલ પ્રતિ દિવસ હતી. આ ઘટાડો ત્યારે થયો છે જ્યારે રશિયા ક્રૂડ ઓઇલના ઉત્પાદનમાં ઘટાડા વચ્ચે ઇંધણની અછતને પહોંચી વળવા માટે તેના રિફાઇનરી ઉત્પાદનમાં વધારો કરવાનો પ્રયાસ કરી રહ્યું છે.
યુક્રેને રશિયન ઓઈલ ઠેકાણાઓ પર ઘાતક હુમલા કર્યા
- યુક્રેનિયન દળોએ તાજેતરમાં દક્ષિણ રશિયાના સૌથી મોટા તેલ અને પેટ્રોલિયમ નિકાસ કેન્દ્રોમાંના એક, નોવોરોસિયસ્ક નજીક ગ્રુશોવાયા તેલ ટ્રાન્સશિપમેન્ટ બેઝ પર ભારે બોમ્બમારો કર્યો હતો.
- આ હવાઈ હુમલાઓ રશિયાના તેલ માળખાને નિશાન બનાવીને કરવામાં આવ્યા હતા .
- યુક્રેને વોલ્ગોગ્રાડ પ્રદેશ અને રશિયાના કબજા હેઠળના ક્રિમીઆમાં ઇંધણ સંગ્રહ સ્થળોને પણ નિશાન બનાવ્યા હતા.
- રશિયન અધિકારીઓએ નોવોરોસિસ્ક સેન્ટરમાં આગ લાગવાની પુષ્ટિ કરી છે, જોકે તેઓએ નુકસાનનું પ્રમાણ જાહેર કર્યું નથી.
સ્થાનિક રિફાઇનિંગ વધારવાની યોજના
મોસમી ઇંધણની માંગ વધી રહી છે અને ઘણા પ્રદેશોમાં અછતનો અનુભવ થઈ રહ્યો છે, તેથી રશિયા આ મહિને તેની રિફાઇનરીઓમાં તેલ પ્રક્રિયામાં દરરોજ 2,50,000 થી 4,00,000 બેરલનો વધારો કરવાની યોજના ધરાવે છે.
ભારત પર શું અસર?
જો રશિયાનું તેલ ઉત્પાદન ઘટશે, તો તેની અસર ભારત પર પડી શકે છે. રશિયન તેલનો નોંધપાત્ર હિસ્સો ભારતમાં આવી રહ્યો છે. ફેબ્રુઆરીની સરખામણીમાં મે મહિનામાં ભારતની રશિયન તેલ આયાતમાં 63%નો વધારો થયો છે. ભારત તેની તેલની જરૂરિયાતનો આશરે 35-40% હિસ્સો ફક્ત રશિયા પાસેથી ખરીદે છે. રશિયન તેલ ઉત્પાદનમાં ઘટાડો થવાથી ભારતની તેલ આયાતમાં ઘટાડો થઈ શકે છે. આનાથી ભારતમાં પેટ્રોલ અને ડીઝલનો ખર્ચ વધી શકે છે અને ફુગાવો વધી શકે છે.
