સંબંધોનો લોહિયાળ અંત: પૈસાના વિવાદમાં યુવકે દાદી, કાકા અને ભાઈની ગોળી મારી હત્યા કરી
Bloody end to relationship: હરિયાણાના અંબાલા જિલ્લામાંથી સંબંધોને શરમાવે તેવી ચોંકાવનારી ઘટના સામે આવી છે. માટી ખનનના ઠેકા અને પૈસાની ભાગીદારીને લઈને થયેલા વિવાદમાં એક યુવકે પોતાના જ પરિવારના ત્રણ સભ્યોની ગોળી મારીને હત્યા કરી દીધી. આ ઘટનામાં એક મહિલા ગંભીર રીતે ઘાયલ થઈ છે, જ્યારે આરોપી ઘટના બાદ ફરાર થઈ ગયો છે.
માહિતી મુજબ, આ ઘટના અંબાલાના શહજાદપુર વિસ્તારના બિછપડી ગામમાં બની હતી. આરોપી અભિષેક અને તેના પરિવાર વચ્ચે ગામની જમીનમાંથી માટી કાઢવાના ઠેકાની આવકમાં હિસ્સો આપવા મુદ્દે લાંબા સમયથી મતભેદ ચાલી રહ્યો હતો. શનિવારે સાંજે આ મુદ્દે ફરી એકવાર ઉગ્ર બોલાચાલી થઈ હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
વિવાદ વધતા અભિષેક ગુસ્સે ભરાઈ ગયો અને તેની પાસે રહેલી પિસ્તોલથી અંધાધૂંધ ફાયરિંગ શરૂ કરી દીધી. સૌથી પહેલા તેણે પોતાની દાદી ઇસરો દેવી પર ગોળી ચલાવી હતી. ગોળી વાગતા જ તેમનું ઘટનાસ્થળે જ મોત થયું હતું.
ત્યારબાદ વચ્ચે પડવા આવેલા તેના મોટા ભાઈ સંદીપ, કાકા મહેન્દ્ર અને કાકી સુનીતા પર પણ ગોળીબાર કરવામાં આવ્યો હતો. ગંભીર રીતે ઘાયલ થયેલા તમામ લોકોને તાત્કાલિક હોસ્પિટલ ખસેડવામાં આવ્યા હતા. શરૂઆતમાં તેમને નારાયણગઢ હોસ્પિટલમાં સારવાર આપવામાં આવી હતી, પરંતુ સ્થિતિ ગંભીર હોવાથી ચંદીગઢની સેક્ટર-32 હોસ્પિટલમાં રિફર કરવામાં આવ્યા હતા.
સારવાર દરમિયાન કાકા મહેન્દ્ર અને મોટા ભાઈ સંદીપનું પણ મોત થયું હતું. જ્યારે કાકી સુનીતા હજુ સારવાર હેઠળ છે. તેમને આંખની નજીક ગોળી વાગી હોવાનું જણાવવામાં આવ્યું છે.
ઘટનાની જાણ થતાં જ પોલીસના ઉચ્ચ અધિકારીઓ અને તપાસ ટીમ સ્થળ પર પહોંચી હતી. જોકે, તે પહેલાં જ આરોપી અભિષેક ત્યાંથી ફરાર થઈ ગયો હતો. હાલ પોલીસ તેની શોધખોળ માટે વિવિધ ટીમો બનાવી કાર્યવાહી કરી રહી છે.
પોલીસની પ્રાથમિક તપાસમાં જાણવા મળ્યું છે કે ગામમાં બે કિલ્લા જમીનમાંથી માટી કાઢવાનો ઠેકો ચાલતો હતો. આ ઠેકામાં ભાગીદારી અને નફાના વહેંચાણને લઈને પરિવારના સભ્યો વચ્ચે લાંબા સમયથી વિવાદ ચાલી રહ્યો હતો. અંતે આ વિવાદ એટલો ઉગ્ર બન્યો કે તેણે ત્રણ લોકોના જીવ લઈ લીધા.
પોલીસે કેસ નોંધ્યો છે અને આરોપીની ધરપકડ માટે તપાસ હાથ ધરી છે. અધિકારીઓનું કહેવું છે કે આરોપીની ધરપકડ બાદ સમગ્ર ઘટનાક્રમ અંગે વધુ વિગતો સામે આવશે.
આ પણ વાંચો : ટ્વિશા શર્મા કેસમાં નવો ખુલાસો: પતિ સમર્થ સિંહે બેંગલુરુ ટ્રિપ કોન્ટ્રોવર્સી વિશે જણાવ્યું
