સોશિયલ મીડિયામાં ઈન્ફ્લુએન્સર બની પૈસા કમાવવા માગતા યુવાનો સાવધાન…

• IIT બોમ્બેમાં ઘુસણખોરીના કેસનો આરોપી પકડાયો: 21 ઈમેલ આઈડી બનાવી હતી
• 10મું પાસ બિલાલ વેબડિઝાઇનિંગમાં રસ ધરાવે છે, સુરતનું કનેકશન

એચડી ન્યૂઝ ડેસ્ક, 01 જુલાઇ 2025: IIT મુંબઇમાં ઘુસણખોરીના કેસમાં ધરપકડ કરાયેલા આરોપીએ પૂછપરછ દરમિયાન ઘણા ચોંકાવનારા ખુલાસા કર્યા છે. મુંબઈ ક્રાઈમ બ્રાન્ચના સૂત્રોના જણાવ્યા અનુસાર, આરોપીએ 21 ઈમેલ આઈડી બનાવી હતી અને તેનો ઉપયોગ સોશિયલ મીડિયા ઈન્ફ્લુએન્સર તરીકે રજૂ કરવા માટે કર્યો હતો. તે સોશિયલ મીડિયા ઈન્ફ્લુએન્સર બનીને વધુ પૈસા કમાવવા માંગતો હતો અને આ ઈરાદાથી તેણે મેંગલુરુ, હૈદરાબાદ સહિત વિવિધ શહેરોના નામે 21 ઈમેલ એકાઉન્ટ બનાવ્યા હતા.

બિલાલ અહેમદ તેલીની 14 દિવસ પહેલાં ધરપકડ

બિલાલ અહેમદ તેલીને તાજેતરમાં મુંબઈ ક્રાઈમ બ્રાન્ચ દ્વારા IIT બોમ્બે કેમ્પસમાં ગેરકાયદેસર 14 દિવસ રહેવા બદલ ધરપકડ કરવામાં આવી છે. દરમિયાન, ક્રાઈમ બ્રાન્ચ દ્વારા હાથ ધરવામાં આવેલી પૂછપરછમાં બિલાલે ઘણા ચોંકાવનારા ખુલાસા કર્યા છે. બિલાલે જણાવ્યું છે કે તે સોશિયલ મીડિયા ઈન્ફ્લુએન્સર બનવા માંગતો હતો.

બિલાલ બહેરિન અને દૂબઇ પણ ગયો હતો

મુંબઈ ક્રાઈમ બ્રાન્ચના સૂત્રોના જણાવ્યા અનુસાર, આરોપી બિલાલે  મેંગલુરુ, હૈદરાબાદ સહિત વિવિધ શહેરોના નામે 21 ઇમેઇલ એકાઉન્ટ બનાવ્યા હતા જેથી તે તે શહેરોના વીડિયો અને સામગ્રી અપલોડ કરી શકે. તપાસમાં એ પણ બહાર આવ્યું છે કે બિલાલ ડિસેમ્બર 2024માં બહેરીન ગયો હતો અને તે પહેલાં તે દુબઈ પણ ગયો હતો.

IITના AIના સેમિનારમાં હાજર હતો!

ક્રાઇમ બ્રાન્ચના સૂત્રોના જણાવ્યા અનુસાર, તેણે IIT પવઈમાં રહીને AI સેમિનારમાં હાજરી આપી હતી. તેલીએ મેંગલુરુથી 10મું પાસ કર્યા પછી વેબ ડિઝાઇનિંગમાં એક વર્ષનો ડિપ્લોમા કર્યો છે. તે હાલમાં સુરતમાં એક ખાનગી કંપનીમાં કામ કરે છે, જ્યાં તેની માસિક આવક 1.25 લાખ છે. વેબ ડિઝાઇનિંગમાં તાલીમ પામેલો અને ધોરણ 10 પછી અભ્યાસ છોડી દીધો હોવાથી, બિલાલને IITમાં ખૂબ રસ હતો. ઔપચારિક શિક્ષણનો અભાવ હોવા છતાં, તે પ્રતિષ્ઠિત સંસ્થાના કેમ્પસમાં પ્રવેશવામાં સફળ રહ્યો.

હોસ્ટેલના કોમન રૂમમાં સોફા પર સૂતો હતો

ક્રાઇમ બ્રાન્ચના એક વરિષ્ઠ અધિકારીએ જણાવ્યું હતું કે તેણે તેના ફોનથી કેટલાક વીડિયો બનાવ્યા અને ફોટા પાડ્યા પરંતુ કોઈને મોકલ્યા નહીં. તે હોસ્ટેલના કોમન રૂમમાં સોફા પર સૂતો હતો અને જ્યાં મફત કોફી મળતી હતી ત્યાં જતો હતો. તેણે પોતાને પીએચડી વિદ્યાર્થી તરીકે રજૂ કરીને ઘણા લોકોને ગેરમાર્ગે દોર્યા હતા.

ઇન્ટેલિજન્સ બ્યુરો પણ આ કેસની તપાસમાં

ઇન્ટેલિજન્સ બ્યુરો અને આતંકવાદ વિરોધી એજન્સીઓએ પણ આ કેસમાં તેની પૂછપરછ કરી છે. ક્રાઇમ બ્રાન્ચના જણાવ્યા અનુસાર, અત્યાર સુધીની તપાસમાં આરોપી સામે કંઈ શંકાસ્પદ મળ્યું નથી પરંતુ દરેક ખૂણાથી તપાસ હજુ પણ ચાલુ છે. આરોપી હાલમાં 7 જુલાઈ સુધી ક્રાઇમ બ્રાન્ચની કસ્ટડીમાં છે.

આ પણ વાંચો:દ્વારકા કે સોમનાથ પહોંચવાનું થયું સરળ: જાણો ગુજરાત માટે કયા બે નવા એક્સપ્રેસ-વેને મળી મંજૂરી

આ પણ વાંચો:Accident Coridor: તેલંગાણાના કેમિકલ ફેક્ટરીમાં વિસ્ફોટ, મરણાંક 34, રોબોટ્સથી આગ ઓલવાઇ