Gujarat MLA Passed Away: ગુજરાતના રાજકીય ક્ષેત્રમાંથી એક દુઃખદ સમાચાર સામે આવ્યા છે. વડોદરાના માંજલપુર વિધાનસભા મતવિસ્તારના ધારાસભ્ય યોગેશ પટેલનું અવસાન થયું છે. તેઓ લાંબા સમયથી હૃદયરોગની બીમારીથી પીડિત હતા અને છેલ્લા કેટલાક દિવસોથી વડોદરાની સ્ટર્લિંગ હોસ્પિટલમાં સારવાર હેઠળ હતા. સારવાર દરમિયાન જ તેમનું અવસાન થતાં સમગ્ર રાજ્યના રાજકીય વર્તુળમાં શોકની લાગણી પ્રસરી ગઈ છે.
હોસ્પિટલ સૂત્રોના જણાવ્યા મુજબ, તેમની તબિયત છેલ્લા કેટલાક સમયથી ગંભીર બની રહી હતી. બે દિવસ પહેલાં જ તેમને વધુ સારવાર માટે હોસ્પિટલમાં દાખલ કરવામાં આવ્યા હતા, પરંતુ તબીબી પ્રયાસો છતાં તેમની સ્થિતિમાં સુધારો ન થતાં તેમણે અંતિમ શ્વાસ લીધા.
યોગેશ પટેલ લાંબા સમયથી રાજકારણમાં સક્રિય હતા અને માંજલપુર વિસ્તારમાં તેમના મજબૂત રાજકીય આધાર માટે જાણીતા હતા. તેમના નિધનથી માત્ર તેમના મતવિસ્તાર જ નહીં પરંતુ સમગ્ર ગુજરાતના રાજકીય પરિદૃશ્યમાં ખાલીપણું સર્જાયું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ ઘટનાથી ગુજરાત વિધાનસભામાં ફરી એક બેઠક ખાલી પડી છે. અગાઉ ઉમરેઠના ધારાસભ્ય ગોવિંદ પરમારના અવસાન બાદ તેમની બેઠક ખાલી થઈ હતી, જેના માટે પેટાચૂંટણી યોજાઈ હતી અને તેમના પુત્રે જીત મેળવી હતી. હવે યોગેશ પટેલના અવસાન બાદ માંજલપુર બેઠક માટે પણ ફરીથી ઉપચૂંટણી યોજવાની સ્થિતિ ઊભી થઈ શકે છે. ચૂંટણી પંચ દ્વારા આગામી દિવસોમાં આ અંગે સત્તાવાર જાહેરાત થવાની શક્યતા છે.
રાજ્યના અનેક નેતાઓએ તેમના અવસાન પર શોક વ્યક્ત કર્યો છે અને તેમના પરિવારજનોને આ દુઃખ સહન કરવાની શક્તિ મળે તેવી પ્રાર્થના કરી છે. સોશિયલ મીડિયા પર પણ રાજકીય નેતાઓ અને કાર્યકરો દ્વારા શ્રદ્ધાંજલિ આપવામાં આવી રહી છે. યોગેશ પટેલના નિધનથી ગુજરાતની રાજનીતિમાં એક લાંબી ઓળખ ધરાવતી શખ્સિયતનો અંત આવ્યો છે.
