દિલ્હી-NCRમાં મૂશળધાર વરસાદ, દેશના અનેક રાજ્યોમાં વરસાદનું એલર્ટ

નવી દિલ્હી: દેશના અનેક રાજ્યોમાં ચોમાસું ફરી સક્રિય બન્યું છે. ભારતીય હવામાન વિભાગ (IMD)એ સોમવાર, 24 ઓગસ્ટે છત્તીસગઢ, પૂર્વ મધ્યપ્રદેશ અને ઓડિશામાં કેટલાક સ્થળોએ ભારેથી અતિભારે વરસાદની આગાહી કરી છે. બિહાર, દિલ્હી સહિત અન્ય કેટલાક વિસ્તારોમાં પણ ભારે વરસાદની શક્યતા વ્યક્ત કરવામાં આવી છે. બીજી તરફ ગુજરાતમાં હાલ મોટા ભાગે છૂટાછવાયા વરસાદની જ શક્યતા છે અને ભારે વરસાદની કોઈ વ્યાપક ચેતવણી નથી.

દિલ્હી માટે ભારે વરસાદની ચેતવણી

દિલ્હીમાં સવારથી જ વાદળછાયું વાતાવરણ જોવા મળ્યું હતું. IMDના તાજા સબ-ડિવિઝનલ વોર્નિંગ મુજબ 24 ઓગસ્ટ માટે હરિયાણા-ચંદીગઢ-દિલ્હી વિસ્તારમાં કેટલાક સ્થળોએ ભારે વરસાદની ચેતવણી આપવામાં આવી છે.

દિલ્હીમાં સોમવારે લઘુત્તમ તાપમાન 27.8 ડિગ્રી સેલ્સિયસ નોંધાયું હતું. રિજ વિસ્તારમાં સૌથી ઓછું 24 ડિગ્રી અને પાલમમાં 24.8 ડિગ્રી તાપમાન નોંધાયું હતું. છેલ્લા 24 કલાકમાં પણ શહેરના અલગ-અલગ વિસ્તારોમાં હળવો વરસાદ પડ્યો હતો.

વરસાદના કારણે તાપમાનમાં થોડી રાહત મળી છે. CPCBના આંકડા અનુસાર દિલ્હીની સરેરાશ એર ક્વોલિટી ઇન્ડેક્સ (AQI) 105 નોંધાઈ હતી, જે ‘મધ્યમ’ શ્રેણીમાં આવે છે.

ઓડિશા-મધ્યપ્રદેશ-છત્તીસગઢમાં વધુ વરસાદ

IMDના 24 ઓગસ્ટના સવારે 8.30 વાગ્યાના બુલેટિન અનુસાર છત્તીસગઢ, પૂર્વ મધ્યપ્રદેશ અને ઓડિશામાં કેટલાક સ્થળોએ ભારેથી અતિભારે વરસાદ પડી શકે છે. પશ્ચિમ મધ્યપ્રદેશમાં પણ ભારે વરસાદની શક્યતા છે. ઓડિશામાં 24થી 26 ઓગસ્ટ દરમિયાન કેટલાક સ્થળોએ અતિભારે વરસાદ ચાલુ રહેવાની સંભાવના વ્યક્ત કરવામાં આવી છે.

હાલ ગંગીય પશ્ચિમ બંગાળ, ઉત્તર ઓડિશા, ઝારખંડ અને ઉત્તર-પશ્ચિમ બંગાળની ખાડી આસપાસ લો-પ્રેશર એરિયા સક્રિય છે. તેની સાથે જોડાયેલું સાયક્લોનિક સર્ક્યુલેશન દરિયાઈ સપાટીથી 7.6 કિલોમીટર સુધી વિસ્તરેલું હોવાથી પૂર્વ અને મધ્ય ભારતમાં વરસાદી ગતિવિધિ વધી રહી છે.

બિહારમાં ગંગાના જળસ્તરથી ચિંતા

બિહારમાં ગંગા નદીનું જળસ્તર વધતાં નીચાણવાળા વિસ્તારોમાં પૂર જેવી સ્થિતિ સર્જાઈ છે. ભાગલપુરના રાઘોપુર વિસ્તારમાં તટબંધને નુકસાન થતાં આસપાસના વિસ્તારોમાં પાણી ફેલાવાનો ખતરો વધ્યો છે અને પ્રશાસન એલર્ટ પર છે.

બિહારના મુખ્યમંત્રી સમ્રાટ ચૌધરીએ ગંગાના વધતા જળસ્તરને ધ્યાનમાં રાખીને પશ્ચિમ બંગાળના મુખ્યમંત્રી સાથે વાત કરી ફરક્કા બેરેજના તમામ ગેટ ખોલવા વિનંતી કરી હોવાનું અહેવાલોમાં જણાવાયું છે, જેથી ગંગાના પાણીના પ્રવાહમાં મદદ મળી શકે.

દક્ષિણ અને પૂર્વ ભારતમાં પણ વરસાદ

IMD અનુસાર તામિલનાડુ, પુડુચેરી, કોસ્ટલ આંધ્રપ્રદેશ, કર્ણાટક અને તેલંગાણાના કેટલાક વિસ્તારોમાં પણ વરસાદની શક્યતા છે. તામિલનાડુ-પુડુચેરીમાં 24 અને 25 ઓગસ્ટે કેટલાક સ્થળોએ ભારે વરસાદ સાથે વીજળી અને તોફાની પવનની શક્યતા છે.

પશ્ચિમ બંગાળ, ઝારખંડ, બિહાર અને પૂર્વોત્તર ભારતના અનેક ભાગોમાં પણ આગામી દિવસોમાં વરસાદી ગતિવિધિ ચાલુ રહેવાની આગાહી કરવામાં આવી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ગુજરાતમાં ભારે વરસાદની મોટી ચેતવણી નહીં

ગુજરાત માટે હાલ રાહતના સમાચાર છે. IMD મુજબ 24થી 29 ઓગસ્ટ દરમિયાન ગુજરાત રિજિયન તેમજ સૌરાષ્ટ્ર-કચ્છમાં છૂટાછવાયા વરસાદની શક્યતા છે. રાજ્યમાં વ્યાપક ભારે વરસાદની આગાહી કરવામાં આવી નથી.

હવામાન વિભાગના તાજા અનુમાન પ્રમાણે આગામી દિવસોમાં દેશના પૂર્વ અને મધ્ય ભાગોમાં ચોમાસું વધુ સક્રિય રહી શકે છે. ખાસ કરીને ઓડિશા, છત્તીસગઢ અને મધ્યપ્રદેશના સંવેદનશીલ વિસ્તારોમાં લોકોને હવામાન વિભાગની તાજી સૂચનાઓ પર નજર રાખવાની સલાહ આપવામાં આવી છે.

આ પણ વાંચો: VIDEO: ઈટાલીના એરપોર્ટ પર ભયંકર વાવાઝોડાથી રમકડાંની જેમ વિમાનો ઊછળ્યા