વર્લ્ડ કપ 2027 પર વિરાટ કોહલીનું કડક નિવેદન : કહ્યું – “હું મારી જાતને વારંવાર સાબિત નહીં કરું”

Virat Kohli : રોયલ ચેલેન્જર્સ બેંગ્લોર પોડકાસ્ટ પર બોલતા, વિરાટ કોહલીએ પોતાની આંતરરાષ્ટ્રીય કારકિર્દી અને 2027 ODI વર્લ્ડ કપ વિશે સ્પષ્ટતાથી વાત કરી હતી. વિરાટે કહ્યું કે, “મારું વિઝન ખૂબ જ સ્પષ્ટ છે. જો હું જે વાતાવરણમાં છું તેમાં મૂલ્ય ઉમેરી શકું, અને તે વાતાવરણ પણ માને છે કે હું યોગદાન આપી શકું છું, તો હું રમવાનું ચાલુ રાખીશ. પરંતુ જો મને એવું લાગશે કે મારે મારી યોગ્યતા અને મહત્વ સાબિત કરવું પડશે, તો હું તે સ્થિતિમાં રહેવા માંગતો નથી.”

તેમણે વધુમાં ઉમેર્યું, “હું મારી તૈયારી પ્રત્યે સંપૂર્ણપણે પ્રામાણિક છું. હું રમત પ્રત્યે જે રીતે અભિગમ અપનાવું છું તેમાં હું સખત મહેનત કરું છું. ભગવાને મને મારા ક્રિકેટ કારકિર્દીમાં ઘણું આપ્યું છે, અને હું હંમેશા તેના માટે આભારી રહીશ.”

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આ છે સમગ્ર મામલો

વિરાટનું નિવેદન એવી અટકળોને વેગ આપી રહ્યું છે કે ટીમ ઈન્ડિયામાં બધું બરાબર નથી. ગત વર્ષે, રોહિત શર્મા અને પછી વિરાટ કોહલીએ અચાનક ટેસ્ટ ક્રિકેટમાંથી નિવૃત્તિની જાહેરાત કરી. બંને હવે ફક્ત ODI રમે છે, અને ઘણી વખત એવું સૂચન કરવામાં આવ્યું છે કે, 2027 ODI વર્લ્ડ કપમાં તેમનો ભાગ લેવાનું અનિશ્ચિત છે. એવું કહેવાયું હતું કે, બંનેએ BCCIને કહ્યું કે, તેઓ રમવા માટે પ્રતિબદ્ધ નથી. પછી, કોચ ગૌતમ ગંભીર, વિરાટ કોહલી અને રોહિત શર્મા વચ્ચે મતભેદ હોવાના અહેવાલો સામે આવ્યા. જો કે, ત્રણેયે ક્યારેય આ વિશે ખુલ્લેઆમ વાત કરી ન હતી, પરંતુ વિવાદે જોર પકડ્યું. 2025 ચેમ્પિયન્સ ટ્રોફી પછી રોહિતને અચાનક કેપ્ટનશીપ પરથી હટાવી દેવામાં આવ્યો હતો.

“હું 40 ઓવર સુધી દોડવા માટે તૈયાર છું”

વિરાટે કહ્યું કે, તે ટીમ માટે કોઈપણ હદ સુધી જવા તૈયાર છે. તેમને કહ્યું કે, “જો તમે ઇચ્છો છો કે હું ODIમાં 40 ઓવર માટે બાઉન્ડ્રીથી બાઉન્ડ્રી સુધી દોડું, તો હું ફરિયાદ વિના તે કરીશ. કારણ કે હું તે મુજબ તૈયારી કરું છું. હું દરેક બોલને એવી રીતે રમું છું જાણે તે મારી કારકિર્દીનો છેલ્લો બોલ હોય. હું તે રીતે બેટિંગ કરું છું, વિકેટો વચ્ચે દોડું છું અને ટીમ માટે શક્ય તેટલું બધું કરું છું.” કોહલીએ સ્પષ્ટપણે કહ્યું કે ખૂબ મહેનત અને સમર્પણ પછી, જો તેણે પોતાને સાબિત કરવું હોય, તો તે વાતાવરણ તેના માટે નથી.

વિજય હજારે ટ્રોફીએ બદલી વિચારસરણી

વિરાટે દિલ્હી માટે વિજય હજારે ટ્રોફી રમવાનો પોતાનો અનુભવ પણ યાદ કર્યો. લગભગ બે દાયકા પછી ઘરેલુ ODI ટુર્નામેન્ટમાં રમવા પરત ફરેલા વિરાટે શાનદાર પ્રદર્શન કર્યું હતું. તેમને કહ્યું કે, “હું ત્યાં રમવા માંગતો હતો કારણ કે મને ક્રિકેટ ગમે છે. મને બેટિંગ ખૂબ ગમે છે. તે સમયે, મારી પાસે કોઈને સાબિત કરવા માટે કંઈ નહોતું. હું ફરીથી બાળક જેવો અનુભવ કરતો હતો.” વિરાટે કહ્યું કે, રમતનો આનંદ માણવાનું શરૂ કરતાં જ તેની અંદરનું દબાણ ઓસરી ગયું.

“કાં તો સ્પષ્ટ કહો કે તમારી જરૂર નથી, અથવા ચૂપ રહો”

કોહલીએ ટીમમાં તેના સ્થાન વિશે સતત પ્રશ્નો પર પણ પોતાનો અભિપ્રાય વ્યક્ત કર્યો. તેમને કહ્યું કે, “કાં તો પહેલા દિવસે સ્પષ્ટપણે કહો કે હું પૂરતો સારો નથી, અથવા મારી જરૂર નથી. પરંતુ જો તમે કહ્યું છે કે હું ટીમ માટે મહત્વપૂર્ણ છું, તો ફરીથી મને પ્રશ્નો પૂછતા નહીં.” તેને નિયમિત નોકરી સાથે સરખાવતા, તેણે કહ્યું કે એક દિવસ કોઈના પર વિશ્વાસ કરવો અને પછી બીજા દિવસે તેમની ક્ષમતાઓ પર પ્રશ્ન ઉઠાવવો યોગ્ય નથી.

આંકડા દર્શાવે છે કે વિરાટ શા માટે છે ખાસ

વિરાટ કોહલીના ODI આંકડા હજુ પણ તેને વિશ્વના મહાન બેટ્સમેનોમાં સ્થાન આપે છે. તેમને 311 વનડેમાં 54 સદી અને 77 અડધી સદી સાથે 14,797 રન બનાવ્યા છે. ગયા વર્ષે, મર્યાદિત વનડે રમ્યા છતાં, તે ભારતનો સૌથી વધુ રન બનાવનાર ખેલાડી રહ્યો, તેણે 13 ઇનિંગ્સમાં 651 રન બનાવ્યા. આ વર્ષે તેણે રમેલી ત્રણ વનડેમાં તેણે 240 રન બનાવ્યા છે, જેમાં એક સદી અને એક અડધી સદીનો સમાવેશ થાય છે.

અફઘાનિસ્તાન શ્રેણીમાં દેખાશે વિરાટ કોહલી

આઈપીએલ 2026 સમાપ્ત થયા પછી, વિરાટ કોહલી જૂનમાં શરૂ થતી અફઘાનિસ્તાન સામેની ઘરઆંગણે વનડે શ્રેણીમાં રમે તેવી અપેક્ષા છે. 2027 વર્લ્ડ કપની તૈયારીઓમાં પણ આ શ્રેણી મહત્વપૂર્ણ માનવામાં આવે છે. જોકે, વિરાટે સ્પષ્ટ કર્યું છે કે તેના માટે ફક્ત નામ અને રેકોર્ડ જ મહત્વપૂર્ણ નથી, પરંતુ આદર અને વિશ્વાસ પણ મહત્વપૂર્ણ છે.

આ પણ વાંચો :  અમદાવાદ કોંગ્રેસમાં ભડકો: AMC ચૂંટણીમાં નિરાશાજનક પરિણામો બાદ 6 વોર્ડ પ્રમુખોને સસ્પેન્ડ કરાયા, કાર્યકરોમાં રોષ