Bay of Bengal Cyclone: ચોમાસાની વિદાય બાદ બંગાળની ખાડીમાં ફરી એકવાર વાવાઝોડાનું જોખમ ઊભું થયું છે. ભારતીય હવામાન વિભાગ (IMD)ના જણાવ્યા અનુસાર, બંગાળની ખાડીના પૂર્વ-મધ્ય અને તેને અડીને આવેલા દક્ષિણ-પૂર્વ ભાગમાં શુક્રવારે સવારે લો-પ્રેશર એરિયા સર્જાયો છે. આ સિસ્ટમ આગામી ત્રણ દિવસ દરમિયાન વધુ મજબૂત બનીને 26 ઓક્ટોબરની સવાર સુધીમાં ચક્રવાતી તોફાનમાં ફેરવાઈ શકે છે. ત્યારબાદ તે ઉત્તર આંધ્ર પ્રદેશ અને દક્ષિણ ઓડિશાના દરિયાકાંઠા તરફ આગળ વધવાની સંભાવના છે. સંભવિત વાવાઝોડાને ધ્યાનમાં રાખીને બંને રાજ્યોમાં ભારે વરસાદ, ઝડપી પવન અને દરિયાની તોફાની સ્થિતિ અંગે ચેતવણી આપવામાં આવી છે.

26 ઓક્ટોબરે ચક્રવાત બનવાની આગાહી

વિશાખાપટ્ટનમ સ્થિત હવામાન વિભાગના સાયક્લોન વોર્નિંગ સેન્ટર અનુસાર શુક્રવારે સવારે લગભગ 5:30 વાગ્યે બંગાળની ખાડીમાં લો-પ્રેશર સિસ્ટમ સક્રિય થઈ હતી. આ સિસ્ટમ પશ્ચિમ-ઉત્તરપશ્ચિમ દિશામાં આગળ વધવાની સંભાવના છે. હવામાન વિભાગે આગામી દિવસોમાં આ સિસ્ટમના વધુ મજબૂત બનવાની શક્યતા વ્યક્ત કરી છે.

ક્યાં ત્રાટકી શકે છે વાવાઝોડું?

હવામાન વિભાગના પ્રાથમિક અનુમાન અનુસાર આ સિસ્ટમ ઉત્તર આંધ્ર પ્રદેશ અને દક્ષિણ ઓડિશાના દરિયાકાંઠા તરફ આગળ વધી શકે છે. મછલીપટ્ટનમ અને વિશાખાપટ્ટનમ વચ્ચેના દરિયાકાંઠા પર સંભવિત અસર અંગે પણ ચર્ચા થઈ રહી છે. જોકે વાવાઝોડું ચોક્કસ કયા સ્થળે અને ક્યારે જમીન પર પહોંચશે, એટલે કે લેન્ડફોલ કરશે તે અંગે હવામાન વિભાગે હજુ અંતિમ આગાહી જાહેર કરી નથી. 26 ઓક્ટોબરે વાવાઝોડું બનવાની શક્યતા છે, પરંતુ તે જ દિવસે દરિયાકાંઠે ત્રાટકશે તેવું નિશ્ચિત નથી.

આંધ્ર પ્રદેશના અનેક જિલ્લાઓમાં અતિભારે વરસાદની ચેતવણી

વાવાઝોડાની સંભવિત અસરને કારણે આંધ્ર પ્રદેશના દરિયાકાંઠાના જિલ્લાઓમાં વરસાદની તીવ્રતા વધવાની આશંકા છે. ખાસ કરીને 27 અને 28 ઓક્ટોબર દરમિયાન કેટલાક વિસ્તારોમાં ભારેથી અતિભારે વરસાદ પડી શકે છે. અહેવાલ મુજબ અલ્લુરી સીતારામ રાજુ, કાકીનાડા, પૂર્વ ગોદાવરી, ડૉ. બી.આર. આંબેડકર કોનાસીમા, એલુરુ, પશ્ચિમ ગોદાવરી અને એનટીઆર જિલ્લાઓ ઉપરાંત યાનમમાં ભારે વરસાદની ચેતવણી છે. વિશાખાપટ્ટનમ સહિત અન્ય વિસ્તારોમાં પણ વરસાદ અને પવનની અસર જોવા મળી શકે છે. ઓડિશામાં 26 ઓક્ટોબરથી વરસાદી ગતિવિધિઓ વધવાની સંભાવના છે. રાજ્યના અનેક વિસ્તારોમાં 27થી 29 ઓક્ટોબર દરમિયાન ભારે વરસાદ અને વીજળીના કડાકા સાથે પવન ફૂંકાવાની આગાહી કરવામાં આવી છે.

દરિયામાં 90 કિમી પ્રતિ કલાક સુધીના પવનની શક્યતા

હવામાન વિભાગની આગાહી અનુસાર, 23 ઓક્ટોબરની સાંજથી બંગાળની ખાડીના કેટલાક વિસ્તારોમાં 35થી 45 કિમી પ્રતિ કલાકની ઝડપે પવન ફૂંકાઈ શકે છે, જે ઝાટકાઓમાં 55 કિમી પ્રતિ કલાક સુધી પહોંચી શકે છે. 24 અને 25 ઓક્ટોબરે પવનની તીવ્રતા વધવાની શક્યતા છે. 26 ઓક્ટોબરથી પશ્ચિમ-મધ્ય બંગાળની ખાડીમાં પવનની ઝડપ 70થી 80 કિમી પ્રતિ કલાક અને ઝાટકાઓમાં 90 કિમી પ્રતિ કલાક સુધી પહોંચી શકે છે. સિસ્ટમ વધુ મજબૂત બનશે તો પવનની ગતિ પણ વધી શકે છે.

માછીમારોને દરિયામાં ન જવાની સૂચના

આંધ્ર પ્રદેશ રાજ્ય આપત્તિ વ્યવસ્થાપન સત્તામંડળના મેનેજિંગ ડિરેક્ટર પ્રખર જૈને માછીમારોને સાવચેતી રાખવા અપીલ કરી છે. રવિવારથી દરિયામાં ન જવા અને હાલમાં દરિયામાં રહેલા માછીમારોને કિનારે પરત ફરવા માટે સૂચના આપવામાં આવી છે. દરિયાકાંઠાના લોકોને ભારે પવન દરમિયાન વૃક્ષો અને મોટા હોર્ડિંગ્સની નજીક ઊભા ન રહેવા તથા હવામાન વિભાગની સત્તાવાર સૂચનાઓનું પાલન કરવા જણાવાયું છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

નેલ્લોર અને પ્રકાશમમાં વરસાદથી જનજીવન પ્રભાવિત

આંધ્ર પ્રદેશના નેલ્લોર અને પ્રકાશમ જિલ્લાઓમાં ગુરુવારથી જ વરસાદની અસર જોવા મળી હતી. કેટલાક નીચાણવાળા વિસ્તારોમાં પાણી ભરાતાં વાહનવ્યવહારને અસર પહોંચી હતી. અહેવાલ મુજબ તિરુપતિ જિલ્લાના થોટ્ટમ્બેડુમાં 40.2 મિમી અને નેલ્લોરના રાપુરમાં 40 મિમી વરસાદ નોંધાયો હતો. નેલ્લોરમાં 22 મિમી, કાવલીમાં 15 મિમી અને કડપામાં 13 મિમી વરસાદ નોંધાયો હોવાની માહિતી છે.

આ પણ વાંચોઃ ફ્રાન્સમાં શામોન્ડા વાયરસથી પહેલા માણસનું મોત, પશુઓમાં ફેલાતો આ વાયરસ કેટલો ખતરનાક?