ઈરાની જહાજ નાકાબંધીમાં દખલ કરશે તો ઉડાવી દઈશું… ટ્રમ્પની ધમકી

Strait Of Hormuz: અમેરિકી સેનાએ ઈરાનના બંદરો તરફ આવતા-જતા જહાજોની નાકાબંધી શરૂ કરી દીધી છે. રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર ઈરાનને ધમકી આપી છે. તેમણે કહ્યું કે ઈરાનની નૌસેના સમુદ્રના તળિયે પડી ગઈ છે અને સંપૂર્ણ રીતે નષ્ટ થઈ ગઈ છે. અમે તેમના એક-બે નહીં પરંતુ 158 જહાજોને નિશાન બનાવ્યા છે. અમે હજુ સુધી તેમના ‘ફાસ્ટ એટેક જહાજો’ને નિશાન બનાવ્યા નથી. જો આમાંથી કોઈ પણ જહાજ અમારી નાકાબંધીની નજીક આવશે, તો તેને તાત્કાલિક નાશ કરવામાં આવશે. આ ઝડપી અને ક્રૂર કાર્યવાહી હશે.”

દરમિયાન, ઈરાને પણ બદલો લેવાની ધમકી આપી છે. તેહરાન કહે છે કે જો તેના જહાજોને અવરોધિત કરવામાં આવશે, તો તે પડોશી ગલ્ફ બંદરોને નિશાન બનાવશે. ટ્રમ્પ કહે છે કે નાકાબંધીનો હેતુ ઈરાનના તેલ વેચાણને રોકવાનો છે. યુએસ સેન્ટ્રલ કમાન્ડ (સેન્ટકોમ) એ જણાવ્યું હતું કે આ સમયગાળા દરમિયાન ઈરાની બંદરો અને દરિયાકાંઠાના વિસ્તારોમાં પ્રવેશતા તમામ દેશોના જહાજોને અવરોધિત કરવામાં આવશે. જોકે, સેન્ટકોમે સ્પષ્ટતા કરી હતી કે અન્ય દેશોના બંદરો વચ્ચે જતા જહાજોની અવરજવર સંપૂર્ણ રીતે બંધ નહીં કરવામાં આવે.

બ્રિટન અને ફ્રાંસ નાકાબંધીમાં સામેલ નહીં

નાટોના ઘણા સભ્ય દેશો જેમ કે બ્રિટન અને ફ્રાંસે સ્પષ્ટ કર્યું છે કે તેઓ અમેરિકા-ઈરાન સંઘર્ષમાં નાકાબંધીનો ભાગ બનશે નહીં. આ દેશોએ જણાવ્યું કે તેમનું ધ્યાન તણાવ વધારવાને બદલે હોર્મુઝ સ્ટ્રેટને ફરીથી ખોલવા પર છે, કારણ કે વિશ્વના લગભગ 20% તેલનું પરિવહન આ માર્ગથી થાય છે. અમેરિકા-ઈરાન તણાવને કારણે હોર્મુઝમાંથી જહાજોની અવરજવર લગભગ ઠપ થઈ ગઈ છે. 28 ફેબ્રુઆરી પહેલાં રોજ અંદાજે 125 જહાજો આ માર્ગથી પસાર થતા હતા, પરંતુ હવે આ સંખ્યા ઘટીને બહુ ઓછી રહી ગઈ છે.

આ પણ વાંચો: શાંતિ સ્થાપવામાં નિષ્ફળ સંયુક્ત રાષ્ટ્ર? રશિયા-યુક્રેનથી લઈને ઈરાન સુધી UN લાચાર