ઉમરેઠ વિધાનસભા પેટા ચૂંટણીની તૈયારીઓ તેજ, ફ્લાઈંગ સ્ક્વોડ અને સિંગલ વિન્ડો સિસ્ટમ સક્રિય

Umreth By Election: ચૂંટણી પંચ દ્વારા 111-ઉમરેઠ વિધાનસભા પેટા ચૂંટણીની જાહેરાત કરવામાં આવી છે. આ પેટા ચૂંટણીનું મતદાન 23 એપ્રિલ 2026, ગુરુવારના રોજ યોજાવાનું છે. જિલ્લા ચૂંટણી અધિકારી અને કલેક્ટર પ્રવીણ ચૌધરીએ મહત્તમ મતદાન માટે સ્વીપ (SVEEP) અભિયાનને વેગ આપ્યો છે.

વિદ્યાર્થીઓએ વાલીઓને લાગણીભર્યા પત્રો લખ્યા

જિલ્લા શિક્ષણ અધિકારી અને સ્વીપના નોડલ અધિકારી કામિનીબેન ત્રિવેદીના માર્ગદર્શન હેઠળ ઉમરેઠ તાલુકાની પ્રાથમિક, માધ્યમિક અને ઉચ્ચતર માધ્યમિક શાળાઓના વિદ્યાર્થીઓએ પોતાના વાલીઓને મતદાન માટે અપીલ કરતા લાગણીભર્યા પત્રો લખ્યા છે. આ પત્રોમાં વિદ્યાર્થીઓએ ઘરના તમામ લાયક મતદારોને 23 એપ્રિલે મતદાન કરવા અને કોઈપણ મતદારને મતદાનથી વંચિત ન રહેવા માટે અનુરોધ કર્યો છે. આ પગલે મતદાર જાગૃતિ અભિયાનને વધુ પ્રભાવશાળી બનાવવામાં આવ્યું છે.

ફ્લાઈંગ સ્ક્વોડ દ્વારા વાહનોની આકસ્મિક ચેકિંગ

ઉમરેઠ વિધાનસભા પેટા ચૂંટણી માટે ચૂંટણી અધિકારી તરીકે જીજ્ઞા પટેલની નિમણૂક કરવામાં આવી છે. આદર્શ આચારસંહિતા લાગુ થયા બાદ ફ્લાઈંગ સ્ક્વોડની ટીમો દ્વારા ઉમરેઠના ત્રણ મુખ્ય એન્ટ્રી પોઇન્ટ્સ પર આજે આકસ્મિક વાહનોની ચકાસણી કરવામાં આવી હતી. ચૂંટણી અધિકારીએ જણાવ્યું કે ઉમરેઠમાં પ્રવેશતા ત્રણેય મુખ્ય પોઇન્ટ્સ પર 24×7 આકસ્મિક વાહન ચેકિંગ ચાલુ રહેશે અને ચૂંટણી નિયમોનું કડક પાલન કરવામાં આવશે.

સિંગલ વિન્ડો સિસ્ટમ દ્વારા રાજકીય પક્ષોને મંજૂરી

ઉમરેઠ વિધાનસભા પેટા ચૂંટણી માટે મામલતદાર કચેરી, ઉમરેઠ ખાતે સિંગલ વિન્ડો સિસ્ટમ કાર્યરત કરવામાં આવી છે. આ સિસ્ટમ હેઠળ રાજકીય પક્ષોને સભા, સરઘસ, રેલી અને વાહનો અંગેની તમામ મંજૂરીઓ એક જ જગ્યાએથી 24 કલાકમાં મળી જશે. આ સિસ્ટમનો સંપર્ક નંબર 02692-777900 છે. અત્યાર સુધીમાં એક અરજી આવી હતી જેનો નિકાલ કરવામાં આવ્યો છે.

મુખ્ય નિર્વાચન અધિકારીએ તૈયારીઓની સમીક્ષા કરી

ગુજરાતના મુખ્ય નિર્વાચન અધિકારી સંદીપ સાંગલે આજે આણંદ ખાતે 111-ઉમરેઠ પેટા ચૂંટણીની તૈયારીઓની સમીક્ષા કરી હતી. જિલ્લા ચૂંટણી અધિકારીએ તેમને મતદાન મથકો, ઈવીએમના પ્રથમ તબક્કાના FLC, ફ્લાઈંગ સ્ક્વોડ, મતદાર જાગૃતિ અને અન્ય તૈયારીઓની વિગતો આપી હતી. મુખ્ય નિર્વાચન અધિકારીએ આણંદ સ્થિત ડેડીકેટેડ ઈવીએમ વેરહાઉસની મુલાકાત લીધી અને ત્રિમાસિક ઇન્સ્પેક્શન કર્યું હતું. આ દરમિયાન રાજકીય પક્ષોના પ્રતિનિધિઓએ ઈવીએમ FLC અંગે સંતોષ વ્યક્ત કર્યો હતો.

આ તમામ પગલાંથી ઉમરેઠ વિધાનસભા પેટા ચૂંટણીને સ્વચ્છ, પારદર્શક અને ઉચ્ચ મતદાન સાથે પાર પાડવાના પ્રયાસો ચાલી રહ્યા છે.

આ પણ વાંચો: એસ.જી. હાઈવે પર ફરી હિટ એન્ડ રન, ટક્કર બાદ બાઇક કારના બોનેટમાં ઘૂસી ગઈ અને…