જૂનાગઢના માંગરોળના બામણવાડામાં શિક્ષકની નિર્દયતા, 13 વર્ષના માસૂમ વિદ્યાર્થીને બેરહેમીથી ઢોર માર માર્યો
જૂનાગઢ 19 ફેબ્રુઆરી 2026: શિક્ષણના ધામ ગણાતી શાળામાં જ્યારે ગુરુ જ રક્ષકને બદલે ભક્ષક બને ત્યારે સમાજ માટે તે કલંક સમાન ઘટના બની જાય છે. જૂનાગઢ જિલ્લાના માંગરોળ તાલુકાના બામણવાડા ગામમાં આજે એક શિક્ષકે શિસ્તના બહાને માનવતાની તમામ હદ વટાવી દીધી છે. ધોરણ ૮માં અભ્યાસ કરતા માત્ર ૧૩ વર્ષના એક નિર્દોષ વિદ્યાર્થીને શિક્ષકે એટલી નિર્દયતાથી માર માર્યો કે બાળક ગંભીર રીતે ઇજાગ્રસ્ત થયો છે.
સામાન્ય ભૂલ અને નિર્દયી સજા
પ્રાપ્ત વિગતો અનુસાર, શાળામાં અભ્યાસ દરમિયાન કોઈ સામાન્ય બાબતે શિક્ષક ઉશ્કેરાઈ ગયા હતા. શિસ્ત જાળવવાના નામે તેમણે પોતાનો સંયમ ગુમાવ્યો અને માસૂમ બાળક પર તૂટી પડ્યા હતા. શિક્ષકના બેરહેમીભર્યા મારને કારણે વિદ્યાર્થીને શરીરે ગંભીર ઈજાઓ પહોંચી હતી અને તેની હાલત લથડતા તેને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો હતો. આ ઘટનાની જાણ થતા જ વિદ્યાર્થીના વાલીઓ અને રોષે ભરાયેલા ગ્રામજનોના ટોળા શાળાએ ઉમટી પડ્યા હતા.
વાલીઓ અને ગ્રામજનોમાં ભારે આક્રોશ
વાલીઓએ ભારે હૃદયે આક્ષેપ કર્યો હતો કે, બાળકથી કોઈ ભૂલ થઈ હોય તો તેને સમજાવવો જોઈએ અથવા વાલીને જાણ કરવી જોઈએ, પરંતુ આ પ્રકારે ઢોર માર મારવો તે કાયદાકીય અને નૈતિક રીતે ગુનો છે. ગામના લોકોએ એકસૂરે માંગ કરી છે કે આવા નિર્દય શિક્ષકને તાત્કાલિક અસરથી નોકરીમાંથી સસ્પેન્ડ કરવામાં આવે. શિક્ષણના પવિત્ર ધામમાં બનેલી આ ઘટનાને પગલે વાલીઓમાં પોતાના બાળકોની સુરક્ષાને લઈને ચિંતા અને ભયનો માહોલ જોવા મળી રહ્યો છે.
શિક્ષણ વિભાગ અને પોલીસની કાર્યવાહી
આ મામલો ગરમાતા સ્થાનિક શિક્ષણ વિભાગ પણ દોડતું થયું છે. જિલ્લા શિક્ષણ અધિકારી દ્વારા આ ઘટનાની તપાસના આદેશ આપવામાં આવ્યા છે. બીજી તરફ, પોલીસ દ્વારા પણ મામલાની ગંભીરતાને ધ્યાને લઈ જવાબદાર શિક્ષક વિરુદ્ધ કાનૂની કાર્યવાહી કરવાની તજવીજ હાથ ધરવામાં આવી છે. અત્યારે સમગ્ર માંગરોળ પંથકમાં આ ઘટના ટોક ઓફ ધ ટાઉન બની છે અને લોકો શિક્ષક સામે કડકમાં કડક પગલાં લેવાની માંગ કરી રહ્યા છે.
આ પણ વાંચો: વડોદરામાં વગર વરસાદે ‘પૂર’ જેવી સ્થિતિ, પાણીની મુખ્ય લાઈમાં ભંગાણ થતા લાખો લીટર પાણીનો વેડફાટ
