સુરતમાં તાપી નદીનો પ્રકોપ: વિયર-કમ-કોઝવે સામાન્ય લોકોની અવરજવર માટે બંધ કર્યો

સુરત, 4 જુલાઈ 2026: ચોમાસાની ધમાકેદાર શરૂઆત સાથે સુરતમાં તાપી નદીમાં પાણીની આવક વધતાં વિયર-કમ-કોઝવેની જળસપાટી 6.80 મીટર સુધી પહોંચી ગઈ છે. સુરક્ષાના ભાગરૂપે વહીવટી તંત્ર દ્વારા કોઝવેને તાત્કાલિક ધોરણે સંપૂર્ણપણે વાહનવ્યવહાર માટે બંધ કરી દેવામાં આવ્યો છે.

કોઝવે ઓવરફ્લો થતાં વહીવટી તંત્ર સતર્ક

ચાલુ વર્ષે ચોમાસું નિયત સમય કરતાં લગભગ 15 દિવસ મોડું શરૂ થયું હતું. છતાં છેલ્લા થોડા દિવસોથી સુરત શહેર અને ઉપરવાસના વિસ્તારોમાં સતત વરસાદ પડતાં તાપી નદીમાં પાણીની આવક વધી છે. રાંદેર અને કતારગામ વિસ્તારને જોડતો આ મહત્વનો કોઝવે ઓવરફ્લો થઈ ગયો છે.

શરૂઆતમાં જળસપાટી 5.80 મીટરે પહોંચતાં જ વહીવટી તંત્ર એક્શન મોડમાં આવી ગયું હતું. ત્યારબાદ સતત પાણીની આવકને કારણે સપાટી વધીને હાલ 6.80 મીટર પર પહોંચી ગઈ છે. વાહનચાલકો તેમજ રાહદારીઓની સુરક્ષા જોતાં કોઝવેને તાત્કાલિક બંધ કરવામાં આવ્યો છે.

રોજિંદા મુસાફરોને ભારે અસર

રાંદેર અને કતારગામ-વેડરોડ વિસ્તારને જોડતો આ કોઝવે સૌથી ટૂંકો માર્ગ હોવાથી રોજ હજારો નોકરીયાતો, વેપારીઓ અને સામાન્ય નાગરિકો આ માર્ગનો ઉપયોગ કરે છે. કોઝવે બંધ થવાથી હવે લોકોને ચોકબજાર અથવા કેબલ સ્ટેઇડ બ્રિજ માર્ગે જવું પડશે, જેમાં અંદાજે 7 થી 8 કિલોમીટરનો વધારાનો ચકરાવો લેવો પડશે. આનાથી પીક અવર્સમાં ટ્રાફિકનું ભારણ વધવાની શક્યતા છે.

સુરક્ષા વ્યવસ્થા અને અપીલ

સુરત મહાનગરપાલિકાના ફ્લડ કંટ્રોલ વિભાગે કોઝવેની બંને બાજુએ બેરિકેડ્સ લગાવીને રસ્તો સંપૂર્ણપણે બ્લોક કરી દીધો છે. સ્થળ પર પોલીસ બંદોબસ્ત ગોઠવવામાં આવ્યો છે.

પાલિકા અને વહીવટી તંત્રે નાગરિકોને અપીલ કરી છે કે:

• કોઝવે પાસે સેલ્ફી લેવા કે પાણી જોવા માટે ન જવું.
• નદી કિનારે અથવા નીચાણવાળા વિસ્તારોમાં ન જવું.
• સુરક્ષા વ્યવસ્થાનું પાલન કરવું.

હાલમાં ઉપરવાસમાં વરસાદની તીવ્રતા ઘટતાં જળસપાટી ઘટવાની સંભાવના છે, પરંતુ હવામાન વિભાગની આગાહીને ધ્યાનમાં રાખીને વહીવટી તંત્ર સતત મોનિટરિંગ કરી રહ્યું છે.

આ સ્થિતિમાં નાગરિકોએ સાવધાની રાખવી અને વહીવટી તંત્રની સલાહનું પાલન કરવું જરૂરી છે.

આ પણ વાંચો: ઈરાનને રડવા માટે અમે એક અઠવાડીયાનો સમય આપ્યો, ખામેનેઈના અંતિમ સંસ્કાર પર ટ્રમ્પે ભદ્દી મજાક કરી