સુપ્રીમ કોર્ટ મીડિયા રિપોર્ટિંગ અને સોશિયલ મીડિયા પ્રસાર માટે નિયમો બનાવવા પર વિચાર કરશે, જાણો કારણ

નવી દિલ્હી: સુપ્રીમ કોર્ટે મીડિયા રિપોર્ટિંગ અને સોશિયલ મીડિયા પર ન્યાયતંત્રને લગતી ઘટનાઓના પ્રસારને લઈને નિયમો બનાવવા પર વિચાર કરવાનો સંકેત આપ્યો છે. આ પગલું તાજેતરમાં ભારતના મુખ્ય ન્યાયાધીશ (CJI) પર જૂતા ફેંકવાની ઘટનાને પગલે લેવામાં આવ્યું છે. કોર્ટે કહ્યું કે તે જાન્યુઆરીમાં આ મામલાની સુનાવણી કરશે. કેન્દ્ર સરકારે સુપ્રીમ કોર્ટને જાણ કરી કે તે સુપ્રીમ કોર્ટ બાર એસોસિએશન (SCBA) સાથે મળીને એક સંયુક્ત પ્રસ્તાવ રજૂ કરશે.

સોલિસિટર જનરલ તુષાર મહેતાએ કોર્ટને માહિતી આપી હતી કે સરકાર, SCBA સાથે પરામર્શ કરીને એવા નિયમો પ્રસ્તાવિત કરશે, જેનાથી ભવિષ્યમાં આવી ઘટનાઓને રોકી શકાય અને જો કોઈ ઘટના બને છે, તો તેનુ રિપોર્ટિંગ અને સોશિયલ મીડિયા પર તેના પ્રસારને કેવી રીતે નિયંત્રિત કરવું તે અંગે સ્પષ્ટ માર્ગદર્શિકા હોવી જોઈએ.

આ સુનાવણી SCBA ની અરજી પર થઈ રહી છે, જેમાં રાકેશ કિશોર સામે કાર્યવાહી અને આવી ઘટનાઓના રિપોર્ટિંગ પર નિયંત્રણની માંગ કરવામાં આવી છે. રાકેશ કિશોરે તાજેતરમાં કોર્ટમાં અયોગ્ય વર્તન કર્યું હતું. જોકે, CJI સૂર્યકાંતની આગેવાની હેઠળની બેન્ચે અગાઉ સ્પષ્ટતા કરી હતી કે તે તેમની સામે કાર્યવાહી કરવાના પક્ષમાં નથી, કારણ કે ભૂતપૂર્વ CJI જસ્ટિસ ગવઈએ તેમને માફ કરવાનો નિર્ણય લીધો હતો.

સુપ્રીમ કોર્ટનો ઉદ્દેશ્ય કોઈ વ્યક્તિને સજા આપવાનો નથી

સુપ્રીમ કોર્ટે એ પણ સ્પષ્ટ કર્યું કે તેનો ઉદ્દેશ્ય કોઈ વ્યક્તિને સજા આપવાનો નથી, પરંતુ ભવિષ્યમાં આવી ઘટનાઓ અટકાવવા અને તેના રિપોર્ટિંગને લઈને નિયંત્રણ પર વિચાર કરવાનો છે. કોર્ટે જણાવ્યું હતું કે મીડિયા અને સોશિયલ મીડિયા પર ન્યાયિક પ્રક્રિયાની ગરિમા જાળવી રાખવા માટે ન્યાયિક સંબંધિત ઘટનાઓના પ્રસારમાં સંતુલન જાળવવું મહત્વપૂર્ણ છે.

આ પણ વાંચો: “તમારો 10 વર્ષનો દીકરો જેલમાં જશે…”, ડિજિટલી એરેસ્ટ થઈ મહિલા, ઠગોને આપ્યા 2 કરોડ રૂપિયા