‘ઘટનાને પાછળ છોડી આગળ વધીએ’, CM ધામીએ દલેર મહેંદી સાથે કરી વાત
Uttarakhand : ઉત્તરાખંડના મુખ્યમંત્રી પુષ્કર સિંહ ધામીએ શુક્રવારે પંજાબી ગાયક દલેર મહેંદી સાથે ફોન પર વાત કરી અને તેમના ખબરઅંતર પૂછ્યા હતા. નવરાત્રિ દરમિયાન ટિહરી ગઢવાલ જિલ્લામાં યોજાયેલા એક કાર્યક્રમમાં દલેર મહેંદીની રજૂઆતને લઈને વિવાદ સર્જાયો હતો. આ કાર્યક્રમ દરમિયાન રાજ્યના કેબિનેટ મંત્રી સુબોધ ઉનિયાલ મંચ પર પહોંચી ગયા હતા અને ગાયકની સિંગિંગ સામે સવાલો ઉઠાવ્યા હતા. ત્યારથી આ મામલે વિવિધ ચર્ચાઓ શરૂ થઈ હતી. (Daler Mehndi)
કેટલાક લોકોએ દલેર મહેંદી દારૂ પીને સ્ટેજ પર આવ્યા હોવાની વાતો કરી હતી, જ્યારે અન્ય લોકોએ અલગ-અલગ દાવા કર્યા હતા. જોકે, આ દાવાઓની પુષ્ટિ થઈ નથી. આ વિવાદ વચ્ચે હવે મુખ્યમંત્રી ધામીએ દલેર મહેંદી સાથે વાત કરીને સમગ્ર ઘટનાની ચર્ચા કરી હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
મુખ્યમંત્રી પુષ્કર સિંહ ધામીએ સોશિયલ મીડિયા પ્લેટફોર્મ X પર પોસ્ટ કરીને જણાવ્યું હતું કે, “દેવભૂમિ ઉત્તરાખંડ ‘અતિથિ દેવો ભવઃ’ની સમૃદ્ધ પરંપરાનું વાહક છે. આપણી લોકસંસ્કૃતિ, આત્મીય આતિથ્ય અને સૌહાર્દની ભાવના જ દેવભૂમિની વિશિષ્ટ ઓળખ છે. અહીં કલા, સંસ્કૃતિ અને કલાકારોનું હંમેશાં સ્વાગત અને સન્માન કરવામાં આવ્યું છે. અમારો પ્રયાસ છે કે આ ઘટનાને પાછળ છોડીને પરસ્પર સંવાદ, સૌહાર્દ અને સકારાત્મકતાની ભાવના સાથે આગળ વધવામાં આવે.”
મીકા સિંહ સાથે પણ ફોન પર કરી હતી વાત
આ પહેલાં ગુરુવારે મુખ્યમંત્રી ધામીએ દલેર મહેંદીના ભાઈ અને ગાયક મીકા સિંહ સાથે પણ ફોન પર વાત કરી હતી. તેમણે કહ્યું હતું કે કોઈપણ પ્રકારની ગેરસમજને વાતચીત દ્વારા દૂર કરવી જોઈએ. ધામીએ X પર આ વાતચીતની માહિતી આપતાં પરસ્પર સંવાદ અને સૌહાર્દ દ્વારા ગેરસમજ દૂર કરવાની જરૂરિયાત પર ભાર મૂક્યો હતો. આ જ દિવસે એક પ્રેસ કોન્ફરન્સ દરમિયાન તેમણે કહ્યું હતું કે તેઓ દલેર મહેંદી અને મીકા સિંહ બંને સાથે વાત કરશે.
प्रसिद्ध गायक श्री @dalermehndi जी से फोन पर वार्ता कर उनका कुशलक्षेम जाना। इस दौरान विगत दिनों हुए घटनाक्रम के संबंध में भी चर्चा हुई।
देवभूमि उत्तराखण्ड ‘अतिथि देवो भवः’ की समृद्ध परंपरा का संवाहक है। हमारी लोकसंस्कृति, आत्मीय आतिथ्य और सौहार्द की भावना ही देवभूमि की विशिष्ट पहचान है। यहां कला, संस्कृति और कलाकारों का सदैव स्वागत एवं सम्मान किया जाता रहा है।
हमारा प्रयास है कि इस घटनाक्रम को पीछे छोड़कर आपसी संवाद, सौहार्द और सकारात्मकता की भावना के साथ आगे बढ़ा जाए।
— Pushkar Singh Dhami (@pushkardhami) October 23, 2026
મુખ્યમંત્રીએ કેબિનેટ મંત્રી સુબોધ ઉનિયાલનો પક્ષ રજૂ કરતાં કહ્યું હતું કે તે સમયે મંત્રી પર લોકોનું દબાણ હોઈ શકે છે. ધામીએ એમ પણ જણાવ્યું હતું કે મંત્રીએ પોતે સ્પષ્ટ કર્યું છે કે તેમનો દલેર મહેંદીને દુઃખ પહોંચાડવાનો કોઈ ઇરાદો નહોતો. મુખ્યમંત્રીએ કહ્યું હતું કે જ્યારે મંત્રીએ પોતાનો ઇરાદો સ્પષ્ટ કરી દીધો છે, ત્યારે આ મામલાને અહીં જ પૂર્ણ કરવો જોઈએ.
શું હતો સમગ્ર મામલો?
ઉત્તરાખંડના ટિહરી ગઢવાલ જિલ્લાના નરેન્દ્રનગર વિસ્તારમાં 18 ઓક્ટોબરની રાત્રે સિદ્ધપીઠ મા કુન્જાપુરી પ્રવાસન અને વિકાસ મેળાનું આયોજન કરવામાં આવ્યું હતું. આ કાર્યક્રમમાં દલેર મહેંદીની રજૂઆત દરમિયાન તેમની લાઇવ સિંગિંગ અને બેકગ્રાઉન્ડ સાઉન્ડ ટ્રેકમાં અલગ-અલગ અવાજો સંભળાતાં વિવાદ સર્જાયો હતો. કાર્યક્રમમાં હાજર સ્થાનિક ધારાસભ્ય અને કેબિનેટ મંત્રી સુબોધ ઉનિયાલ આ રજૂઆતથી નારાજ થયા હતા. તેઓ મંચ પર પહોંચ્યા અને દલેર મહેંદીને કહ્યું હતું કે તેમને આટલી રકમ ચૂકવીને કાર્યક્રમમાં બોલાવવામાં આવ્યા છે, પરંતુ જો તેઓ બોલી પણ શકતા નથી તો ગાશે કેવી રીતે? આ ઘટનાનો વીડિયો અને તેના વિશેની ચર્ચાઓ બાદ મામલો વધુ વકર્યો હતો.
આ પણ વાંચો:ગુજરાત યુનિવર્સિટીમાં વાયરલ ચેટ્સનો મામલો ગરમાયો, હવે જગદીશ જોશીનું નામ
મંત્રીએ કહ્યું—દલેર મહેંદીની તબિયત ખરાબ હોવાની જાણ નહોતી
વિવાદ વધ્યા બાદ મંત્રી સુબોધ ઉનિયાલે જણાવ્યું હતું કે દલેર મહેંદીની તબિયત ખરાબ હોવાની જાણ તેમને પાછળથી થઈ હતી. તેમણે કહ્યું હતું કે જો ગાયકની તબિયત ખરાબ હતી, તો તેમણે કાર્યક્રમમાં આવવું જોઈતું નહોતું. મંત્રીએ વધુમાં જણાવ્યું હતું કે કાર્યક્રમ માટે 35 લાખ રૂપિયાની સંપૂર્ણ ચુકવણી અગાઉથી કરવામાં આવી હતી અને હોટેલનું બુકિંગ પણ પહેલેથી કરાયું હતું. જોકે, તેમણે સ્પષ્ટ કર્યું હતું કે દલેર મહેંદી સાથે તેમની કોઈ વ્યક્તિગત દુશ્મની નથી અને ગાયકને દુઃખ પહોંચાડવાનો તેમનો કોઈ ઇરાદો નહોતો.
