ડોક્ટર બનવાનું સપનું જોતા વિદ્યાર્થીઓ આનંદો, દેશમાં વધુ 11,682 મેડિકલ સીટ અને 43 નવી કોલેજોને મંજુરી

• કેન્દ્ર સરકારે તબીબી શિક્ષણને વધુ મજબૂત બનાવવા માટે એક મોટો નિર્ણય લીધો છે. સરકારે 2025-26 શૈક્ષણિક વર્ષ માટે 11,682 નવી MBBS બેઠકોને મંજૂરી આપી છે

Education News: દેશના લાખો વિદ્યાર્થીઓ છે કે જેઓ ડોક્ટર બનવાનું સ્વપ્ન જુએ છે તેમના માટે એક મહત્ત્વપૂર્ણ સમાચાર છે. કેન્દ્ર સરકારે તબીબી શિક્ષણને વધુ મજબૂત બનાવવા માટે એક મોટો નિર્ણય લીધો છે. સરકારે 2025-26 શૈક્ષણિક વર્ષ માટે 11,682 નવી MBBS બેઠકોને મંજૂરી આપી છે. દેશના વિવિધ ભાગોમાં 43 નવી મેડિકલ કોલેજો ખોલવા માટે પણ મંજૂરી આપવામાં આવી છે. આ નિર્ણયથી તબીબી શિક્ષણની તકોનો વિસ્તાર થશે અને ભવિષ્યમાં દેશને વધુ પ્રશિક્ષિત ડોકટરો મળશે.

રાજ્યસભામાં એક લેખિત જવાબમાં આરોગ્ય રાજ્યમંત્રી અનુપ્રિયા પટેલે તબીબી શિક્ષણ અંગેના આ ડેટા શેર કર્યા છે. તેમણે જણાવ્યું હતું કે સરકાર દેશમાં ડોકટરોની સંખ્યા વધારવા માટે તબીબી શિક્ષણનો વ્યાપ વધારવા માટે સતત કામ કરી રહી છે.

મંત્રાલય દ્વારા પૂરા પાડવામાં આવેલ ડેટા નેશનલ મેડિકલ કમિશન (NMC) દ્વારા સંકલિત કરવામાં આવે છે. આ ડેટામાં દેશમાં સરકારી મેડિકલ કોલેજો, ખાનગી મેડિકલ કોલેજો, AIIMS અને રાષ્ટ્રીય મહત્ત્વની સંસ્થાઓમાં ઉપલબ્ધ બેઠકોની માહિતી શામેલ છે.

MBBS અને PG બેઠકોમાં વધારો

સરકારે નવા શૈક્ષણિક વર્ષ માટે તબીબી શિક્ષણની બેઠકોમાં નોંધપાત્ર વધારો કર્યો છે. 2025-26 શૈક્ષણિક વર્ષ માટે 11,682 MBBS બેઠકોને મંજૂરી આપવામાં આવી છે. 8,967 અનુસ્નાતક (PG) તબીબી બેઠકોને પણ મંજૂરી આપવામાં આવી છે. આ બેઠકો દેશભરની વિવિધ મેડિકલ કોલેજો, AIIMS અને અન્ય રાષ્ટ્રીય મહત્ત્વની સંસ્થાઓમાં ઉપલબ્ધ રહેશે. સરકારનું કહેવું છે કે આનાથી તબીબી શિક્ષણની તકોનો વિસ્તાર થશે અને વિદ્યાર્થીઓને તેમના પોતાના દેશમાં વધુ સારું શિક્ષણ મેળવવાની તક મળશે.

અમારી WhatsApp ચેનલમાં જોડાવા આ લીંક પર ક્લીક કરો

43 નવી મેડિકલ કોલેજો શરૂ કરાશે

મેડિકલ સીટો વધારવા ઉપરાંત સરકારે 43 નવી મેડિકલ કોલેજો ખોલવાનો પણ નિર્ણય લીધો છે. આ કોલેજો ખોલવાથી માત્ર મેડિકલ શિક્ષણની તકો જ નહીં, પણ ઘણા રાજ્યોમાં હેલ્થકેર સેવાઓ પણ મજબૂત થશે. નાના શહેરો અને દૂરના વિસ્તારોમાં ઘણીવાર ડોકટરોની અછતનો સામનો કરવો પડે છે. નવી મેડિકલ કોલેજો ખોલવાથી આ વિસ્તારોમાં હોસ્પિટલ અને હેલ્થકેર સુવિધાઓમાં સુધારો થઈ શકે છે.

છેલ્લા દસ વર્ષમાં મોટા ફેરફારો

રાજ્યસભામાં રજૂ કરાયેલા ડેટા એ પણ દર્શાવે છે કે છેલ્લા દસ વર્ષમાં દેશમાં તબીબી શિક્ષણનું માળખું ઝડપથી વિસ્તર્યું છે. 2014ની પરિસ્થિતિની તુલનામાં મેડિકલ કોલેજો અને બેઠકોની સંખ્યા બમણાથી વધુ થઈ ગઈ છે.

2014 સુધીમાં દેશમાં કુલ 387 મેડિકલ કોલેજો હતી. તે સમયે 51,348 MBBS બેઠકો અને 31,185 અનુસ્નાતક (PG) મેડિકલ બેઠકો ઉપલબ્ધ હતી. તબીબી શિક્ષણનો નોંધપાત્ર વિકાસ થયો છે. હાલમાં દેશમાં 818 મેડિકલ કોલેજો છે, જ્યારે MBBS બેઠકોની સંખ્યા વધીને 1,28,976 થઈ ગઈ છે અને PG મેડિકલ બેઠકો પણ વધીને 85,0,20 સુધી પહોંચી ગઈ છે.

આ પણ વાંચોઃ અમેરિકન ટેક કંપનીઓ ઈરાનના ટાર્ગેટ પર, ગૂગલ, એમેઝોન, માઈક્રોસોફ્ટ અને Nvidia માટે ખતરો