પ્રજાસત્તાક દિવસની પરેડમાં CRPFની પુરુષ ટુકડીનું નેતૃત્વ કરશે આ કાશ્મીરી છોકરી, જાણો કોણ છે સિમરન બાલા

ભારત તેના 77મા પ્રજાસત્તાક દિવસની ઉજવણી માટે તૈયાર છે. 26 વર્ષીય આસિસ્ટન્ટ કમાન્ડન્ટ સિમરન બાલા પણ ભવ્ય પરેડમાં એક ઐતિહાસિક ક્ષણ માટે તૈયાર છે. તે 26 જાન્યુઆરી, 2026 ના રોજ નવી દિલ્હીમાં પ્રજાસત્તાક દિવસની પરેડ દરમિયાન સેન્ટ્રલ રિઝર્વ પોલીસ ફોર્સ (CRPF) ની સંપૂર્ણ પુરુષ ટુકડીનું નેતૃત્વ કરનારી પ્રથમ મહિલા અધિકારી બનશે.

જમ્મુ અને કાશ્મીરની 26 વર્ષીય CRPF આસિસ્ટન્ટ કમાન્ડન્ટ સિમરન બાલા 26 જાન્યુઆરીએ દિલ્હીમાં પ્રજાસત્તાક દિવસની પરેડમાં ભાગ લેશે. તે પોતાના દળની પુરુષ ટુકડીનું નેતૃત્વ કરશે. આ એક ઐતિહાસિક ક્ષણ હશે. આ પહેલી વાર હશે જ્યારે કોઈ મહિલા અધિકારી પ્રજાસત્તાક દિવસની પરેડમાં CRPFની પુરુષ ટુકડીનું નેતૃત્વ કરશે. તે આ રાષ્ટ્રીય કાર્યક્રમમાં 140 થી વધુ પુરુષ કર્મચારીઓની ટુકડીનું નેતૃત્વ કરશે.

બદલાતા ભારતની તસ્વીર

140થી વધુ પુરુષ કર્મચારીઓનું નેતૃત્વ કરવું ભારતના સૌથી મોટા અર્ધસૈનિક દળ માટે એક મહત્વપૂર્ણ સિદ્ધિ છે અને દેશની સુરક્ષા સેવાઓમાં મહિલાઓની વધતી ભૂમિકાનું પ્રતિબિંબ છે. ગણતંત્ર દિવસની પરેડમાં સિમરન બાલાની ભૂમિકા ઐતિહાસિક અને અભૂતપૂર્વ છે. તેની વ્યાપક કાર્યકારી ક્ષમતાઓ અને સ્કેલ માટે જાણીતી CRPFની ઔપચારિક પરેડમાં અત્યાર સુધી પરંપરાગત રીતે પુરુષ અધિકારીઓ જ નેતૃત્વ કરતા આવ્યા છે. દળ કમાન્ડર તરીકે તેમની નિમણૂંક સંસ્થાગત પરિવર્તનનું પ્રતિક છે અને સશસ્ત્ર દળોમાં લિંગ સમાનતાનો સશક્ત સંદેશ આપે છે.

સિમરન બાલા નૌશેરાની રહેવાસી છે

સિમરન બાલા જમ્મુ અને કાશ્મીરના રાજૌરી જિલ્લાના નૌશેરાની રહેવાસી છે. આ ઐતિહાસિક ક્ષણ સુધીની તેમની સફર સરહદી વિસ્તારમાં તેમના બાળપણના અનુભવોથી પ્રેરિત હતી. તેમણે બાળપણથી જ સરહદ પારથી ગોળીબાર જોયો હતો. આ અનુભવે તેમને કેન્દ્રીય સશસ્ત્ર પોલીસ દળોના માધ્યમથી રાષ્ટ્રની સેવા કરવા પ્રેરણા આપી.

જૂન 2023 માં થઈ પસંદગી

જૂન 2023માં સિમરન બાલાની UPSC સેન્ટ્રલ આર્મ્ડ પોલીસ ફોર્સિસ (CAPF) પરીક્ષામાં પસંદગી થઈ હતી. તે પરીક્ષા પાસ કરનારી જમ્મુ અને કાશ્મીરની એકમાત્ર મહિલા બની હતી. તેણીએ 151 લાયક ઉમેદવારોમાંથી 82 નો ઓલ ઈન્ડિયા રેન્ક મેળવ્યો હતો.

સિમરન બાલાએ પોતાનું સ્કૂલિંગ નૌશેરામાં પૂર્ણ કર્યું, ત્યારબાદ તે ઉચ્ચતર માધ્યમિક શિક્ષણ માટે જમ્મુ ગઈ. બાદમાં તેણી ગાંધીનગરમાંથી સ્નાતક થઈ. સિમરને કહ્યું કે તેણીએ જમ્મુના ગાંધીનગરમાં આવેલી સરકારી મહિલા કોલેજમાં અભ્યાસ કર્યો, જ્યાં તેણીએ રાજકીય વિજ્ઞાનમાં સ્નાતકની ડિગ્રી મેળવી. તેણીએ ગ્રેજ્યુએશનના અંતિમ સેમેસ્ટર દરમિયાન UPSC CAPF પરીક્ષાની તૈયારી શરૂ કરી અને તે તેના પહેલા જ પ્રયાસમાં પાસ થઈ ગઈ.

UPSC દ્વારા લેવામાં આવતી CAPF આસિસ્ટન્ટ કમાન્ડન્ટ પરીક્ષા પાસ કર્યા પછી, તેણીને ગુરુગ્રામની CRPF એકેડેમીમાં તાલીમ માટે મોકલવામાં આવી હતી. તેણીની તાલીમ દરમિયાન, તેણીને તાલીમમાં શ્રેષ્ઠ અધિકારી અને શ્રેષ્ઠ જાહેર વક્તાનો એવોર્ડ એનાયત કરવામાં આવ્યો હતો. સિમરન એપ્રિલ 2025 માં CRPF માં જોડાઈ હતી. તેણીની પહેલી પોસ્ટિંગ છત્તીસગઢમાં ‘બસ્તરિયા’ બટાલિયનમાં હતી, જ્યાં તેમને નક્સલ વિરોધી કામગીરીની જવાબદારી સોંપવામાં આવી હતી.

CRPF નું કામ શું હોય છે?

દર વર્ષે 26 જાન્યુઆરીએ યોજાતી ગણતંત્ર દિવસની પરેડમાં ભારતની સૈન્ય શક્તિ અને સાંસ્કૃતિક વૈવિધ્યતાની ઝલક જોવા મળે છે. પરેડ રાયસીના હિલથી કર્તવ્ય પથ થઈને ઇન્ડિયા ગેટના માર્ગે લાલ કિલ્લાની દિશામાં આગળ વધે છે. CRPF દેશનું સૌથી મોટું આંતરિક સુરક્ષા દળ છે, જેમાં લગભગ 3.25 લાખ કર્મચારીઓ છે. તેના મુખ્ય કાર્યક્ષેત્રોમાં નક્સલ વિરોધી કામગીરી, જમ્મુ-કાશ્મીરમાં આતંકવાદ વિરોધી કામગીરી અને પૂર્વોત્તર રાજ્યોમાં ઉગ્રવાદ વિરોધી જવાબદારીઓનો સમાવેશ થાય છે.

આ પણ વાંચો: પ્રતાપગઢમાં જેલમાં બંધ 13 માંથી 7 કિન્નરો HIV પોઝિટિવ નીકળ્યા, જેલ પ્રશાસનમાં ખળભળાટ