થોડી દેશભક્તિ રાખો અને દેશના મુદ્દાઓ પર ધ્યાન આપોઃ જાણો હાઈકોર્ટે ડાબેરી પક્ષને કયા મુદ્દે ઝાટક્યો?

મહારાષ્ટ્રઃ 25 જુલાઈ, 2025: Bombay HC on Protest Against Israel Genocide: ગાઝામાં ઈઝરાયલ તરફથી કરવામાં આવી રહેલા નરસંહાર સામે પ્રદર્શનની મંજૂરી માટે ડાબેરી પાર્ટી સીપીએમએ બોમ્બે હાઇકોર્ટમાં અરજી દાખલ કરી હતી. જોકે, કોર્ટે પાર્ટીને વિરોધ કરવાની પરવાનગી આપી ન હતી, પરંતુ હજારો માઇલ દૂરના મુદ્દાને બદલે ભારત સાથે સંબંધિત મુદ્દા પર ધ્યાન કેન્દ્રિત કરવાની સલાહ આપી હતી.

વિરોધ માટે માંગી મંજૂરી

નોંધનીય છે કે, સીપીએમે માંગ કરી હતી કે તેને આઝાદ મેદાનમાં વિરોધ કરવાની મંજૂરી આપવામાં આવે, જેને મુંબઈ પોલીસે નકારી કાઢી છે. જસ્ટિસ રવિન્દ્ર ઘુગે અને ગૌતમ અખંડની ખંડપીઠે અરજી ફગાવી દીધી હતી અને કહ્યું હતું કે, તમારે હજારો માઇલ દૂરના મુદ્દાને બદલે ભારતને અસર કરતા મુદ્દાઓ પર ધ્યાન કેન્દ્રિત કરવું જોઈએ.

દેશભક્ત બનોઃ હાઇકોર્ટ

ખંડપીઠે કહ્યું કે, ‘આપણા દેશમાં ઘણા મુદ્દાઓ છે. અમે આવું કંઈ કહેવા નથી માંગતા. માફ કરશો, પણ એ સાચું છે કે તમારા લોકોમાં દૂરદ્રષ્ટિ નથી. તમે લોકો ગાઝાના મુદ્દાઓ જોઈ શકો છો. તમે પેલેસ્ટાઇનની ચર્ચા કરી રહ્યા છો. તમારા પોતાના દેશ તરફ જુઓ. દેશભક્ત બનો. આ દેશભક્તિ નથી.

આ વિશે વધુ વાત કરતા કોર્ટે કહ્યું કે, તમારી પાર્ટીએ ભારતમાં પ્રદૂષણ, પૂર, ગટર, કચરાના ડમ્પિંગ જેવા મુદ્દાઓ ઉઠાવી શકે છે. આ એવા મુદ્દાઓ છે જે સામાન્ય લોકોને અસર કરે છે. તમે એક રાજકીય સંગઠન છો જે ભારતમાં નોંધાયેલ છે. તમે ગટર, પ્રદૂષણ, પૂર અને કચરાના ડમ્પિંગ જેવા મુદ્દાઓ ઉઠાવી શકો છો. અમે ફક્ત ઉદાહરણો આપી રહ્યા છીએ.

‘તમારી માંગણી ભારતીય વિદેશ નીતિની વિરુદ્ધ છે’

કોર્ટે કહ્યું કે તમારી વિરોધ કરવાની તમારી માંગ સરકારની વિદેશ નીતિ વિરુદ્ધ છે. આવી સ્થિતિમાં, વિરોધ કરવાના સંભવિત રાજદ્વારી પરિણામો આવી શકે છે. તમને ખબર નથી કે આ મામલો કઈ તરફ વળશે. તમે પેલેસ્ટાઇનનો પક્ષ લેશો કે ઇઝરાયલ જશો? તમે આવું કેમ કરવા માંગો છો? સત્ય એ છે કે તમારો અભિપ્રાય ભારતની વિદેશ નીતિ વિરુદ્ધ છે.

વિદેશ નીતિના નામે પોલીસે અમારી માંગ ફગાવી દીધી

હકીકતમાં, 17 જૂને મુંબઈ પોલીસે સીપીએમની માંગણી ફગાવી દીધી, જેમાં તેણે આઝાદ મેદાનમાં વિરોધ પ્રદર્શન કરવાની પરવાનગી માંગી હતી. પાર્ટીએ કહ્યું કે, ગાઝામાં થઈ રહેલા નરસંહાર સામે પ્રદર્શનની તૈયારી ચાલી રહી છે, જેના માટે પરવાનગી આપવી જોઈએ. જોકે, મુંબઈ પોલીસે આનો ઇનકાર કર્યો. ત્યારબાદ, પાર્ટીએ બોમ્બે હાઇકોર્ટનો સંપર્ક કર્યો. હાઇકોર્ટમાં સીપીએમનો પક્ષ રજૂ કરતી વખતે વકીલ મિહિર દેસાઈએ કહ્યું કે, પોલીસે વિદેશ નીતિ અને કાયદો અને વ્યવસ્થાના નામે પરવાનગી આપવાનો ઇનકાર કર્યો હતો. વિરોધ કરવો કોઈપણ રાજકીય પક્ષનો અધિકાર છે. તેમજ, મહારાષ્ટ્ર સરકારના વકીલે કહ્યું કે અમને ઇનપુટ મળ્યો છે કે આ પ્રદર્શન દરમિયાન કેટલીક સમસ્યાઓ ઊભી થઈ શકે છે.

આ પણ વાંચોઃ ઓપરેશન સિંદૂર હજુ પૂરું નથી થયું, જાણો સીડીએસ અનિલ ચૌહાણે દેશના સૈનિકોને શું આપી સલાહ?

આ પણ વાંચોઃ હાથના અંગૂઠાથી ખુલે છે વ્યક્તિત્વના આ રહસ્યો, જાણો શું કહે છે તમારા હાથનો અંગૂઠો