સુરત શહેરમાં આગ લાગવાની ઘટનાઓ સતત સામે આવી રહી છે ત્યારે સોમવારે 29 જૂનના રોજ વધુ એક આગની મોટી ઘટના સામે આવી છે. સુરતના અગ્રણી ઔદ્યોગિક વિસ્તાર ગણાતા સચિન GIDC હેઠળના ગભેણી વિસ્તારમાં ખુલ્લી જગ્યામાં પડેલા કચરાના ઢગલામાં અચાનક ભીષણ આગ ફાટી નીકળી હતી. ગભેણી વિસ્તારમાં આવેલા સચિન વોટર પ્લાન્ટની પાછળના ભાગમાં મોટા પ્રમાણમાં કચરો એકઠો કરવામાં આવ્યો હતો. આ કચરાના ઢગલામાં કોઈ અગમ્ય કારણોસર આગ લાગી હતી. શરૂઆતમાં સામાન્ય લાગેલી આગ થોડી જ વારમાં વિકરાળ બની ગઈ હતી અને સમગ્ર વિસ્તારમાં ધુમાડાના ગોટેગોટા જોવા મળ્યા હતા.
આકાશમાં કાળા ધુમાડાના ગોટેગોટા, 5 કિમી દૂરથી દેખાઈ આગ
આગે જોતજોતામાં રૌદ્ર સ્વરૂપ ધારણ કરી લીધું હતું. કચરામાં રહેલા પ્લાસ્ટિક, રબર અને અન્ય જ્વલનશીલ સામગ્રીના કારણે આગ ઝડપથી ફેલાઈ હતી. આગમાંથી નીકળતા કાળા ધુમાડાના ગોટેગોટા એટલા મોટા હતા કે ઘટનાસ્થળથી લગભગ 5 કિલોમીટર દૂરથી પણ આ ધુમાડો સ્પષ્ટપણે દેખાઈ રહ્યો હતો.
આકાશમાં ફેલાયેલા ધુમાડાના કારણે આસપાસના વિસ્તારોમાં રહેતા લોકો અને કામદારોમાં ચિંતા ફેલાઈ ગઈ હતી. ઘણા લોકો ઘટનાસ્થળ તરફ દોડી આવ્યા હતા અને સમગ્ર સ્થિતિ જાણવા પ્રયાસ કર્યો હતો.
સ્થાનિકોએ તાત્કાલિક તંત્રને જાણ કરી
કચરાના ઢગલામાં આગ ભભૂકતા આસપાસના લોકો અને નજીકની કંપનીઓના કર્મચારીઓએ તાત્કાલિક તંત્રને જાણ કરી હતી. ઘટનાની ગંભીરતા જોતા ફાયર વિભાગને જાણ કરવામાં આવી હતી. માહિતી મળતા જ નોટિફાઈ એરિયાની ફાયર ટીમો અને ફાયર ફાઈટરો ઘટનાસ્થળે પહોંચી ગયા હતા. ટીમ દ્વારા તરત જ આગને વધુ ફેલાતી અટકાવવા માટે કામગીરી શરૂ કરવામાં આવી હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
પ્લાસ્ટિક અને જ્વલનશીલ વસ્તુઓના કારણે આગ કાબૂમાં લેવી મુશ્કેલ બની
ફાયર વિભાગ માટે સૌથી મોટો પડકાર કચરાના ઢગલામાં રહેલી જ્વલનશીલ વસ્તુઓ હતી. પ્લાસ્ટિક અને અન્ય સામગ્રીના કારણે આગ અંદરથી સતત સળગી રહી હતી અને વારંવાર ભભૂકી રહી હતી. ફાયર જવાનો દ્વારા આગને ચારેય તરફથી ઘેરીને પાણીનો ભારે મારો ચલાવવામાં આવ્યો હતો. સતત એક કલાક સુધી કરવામાં આવેલી મહેનત બાદ આખરે આગ પર કાબૂ મેળવવામાં સફળતા મળી હતી.
સમયસર કામગીરીથી મોટી દુર્ઘટના ટળી
આગ નજીકના ઔદ્યોગિક વિસ્તાર સુધી ન પહોંચે તે માટે ફાયર વિભાગ દ્વારા ખાસ તકેદારી રાખવામાં આવી હતી. જો આગ સમયસર કાબૂમાં ન આવી હોત તો આસપાસની કંપનીઓ અને ઔદ્યોગિક એકમો માટે મોટું જોખમ ઊભું થઈ શક્યું હોત. સદનસીબે ફાયર વિભાગની સમયસર કામગીરીને કારણે મોટી દુર્ઘટના ટળી હતી. હાલ આગ સંપૂર્ણપણે કાબૂમાં છે અને સ્થળ પર જરૂરી કાર્યવાહી હાથ ધરવામાં આવી રહી છે.
નોટિફાઈ ફાયર કંટ્રોલ રૂમની કામગીરી સામે સવાલો
આ સમગ્ર ઘટનામાં સચિન GIDC માટે ખાસ બનાવવામાં આવેલા નોટિફાઈ ફાયર કંટ્રોલ રૂમની કામગીરીને લઈને પણ પ્રશ્નો ઉભા થયા છે. સ્થાનિકોના જણાવ્યા મુજબ, આગની માહિતી આપવા માટે કંટ્રોલ રૂમમાં ફોન કરવામાં આવ્યો હતો, પરંતુ ચાર વખત કોલ કર્યા બાદ એક વખત કોલ રિસીવ થયો હતો. આ કારણે ઈમરજન્સી સમયે યોગ્ય પ્રતિસાદ વ્યવસ્થા અંગે ચિંતા વ્યક્ત કરવામાં આવી રહી છે.
આ ઉપરાંત નોટિફાઈ વિભાગના અધિકારીઓ વચ્ચે યોગ્ય સંકલન ન હોવાની પણ ચર્ચા ચાલી રહી છે. ઔદ્યોગિક વિસ્તારમાં આગ જેવી ગંભીર ઘટનાઓ સમયે ઝડપી અને અસરકારક કામગીરી જરૂરી હોય છે ત્યારે કંટ્રોલ સિસ્ટમની આ પ્રકારની સમસ્યાઓ ચિંતાજનક માનવામાં આવી રહી છે.
ઔદ્યોગિક વિસ્તારમાં સુરક્ષા વ્યવસ્થાને લઈને ચર્ચા
સચિન GIDCમાં અગાઉ પણ આગની ઘટનાઓ સામે આવી ચૂકી છે. જેના કારણે ઔદ્યોગિક વિસ્તારોમાં ફાયર સેફ્ટી, ઈમરજન્સી વ્યવસ્થા અને સુરક્ષા નિયમોના પાલન અંગે વારંવાર સવાલો ઉઠતા રહ્યા છે. હાલમાં આ આગ કયા કારણોસર લાગી તે અંગે તપાસ શરૂ કરવામાં આવી છે. ફાયર વિભાગ અને સંબંધિત તંત્ર દ્વારા ઘટનાની વિગતો એકત્રિત કરવામાં આવી રહી છે.
આ પણ વાંચો: સુરતની ખાનગી હોસ્પિટલમાં નર્સનો આપઘાત, રૂમમાં લટકતો મૃતદેહ મળતા ચકચાર
