એક તરફ સમગ્ર દેશમાં પાણી બચાવવાના અભિયાનને પ્રોત્સાહન આપવામાં આવી રહ્યું છે અને જળ સંરક્ષણ માટે લોકોને જાગૃત કરવામાં આવી રહ્યા છે, ત્યારે બીજી તરફ સુરત મહાનગરપાલિકાની બેદરકારીના કારણે અમરોલી વિસ્તારમાં લાખો લીટર પીવાનું શુદ્ધ પાણી રસ્તા પર વહી જતાં સ્થાનિકોમાં ભારે નારાજગી જોવા મળી છે. કતારગામ ઝોન હેઠળ આવેલા અમરોલી વિસ્તારમાં પીવાના પાણીની મુખ્ય પાઇપલાઇન અચાનક ફાટી જતાં લાંબા સમય સુધી પાણીનો વ્યાપક બગાડ થયો હતો.
હાઈ પ્રેશરને કારણે રસ્તા પર પાણીના ઊંચા ફુવારા
મળતી માહિતી અનુસાર, અમરોલીની વર્ધમાન સોસાયટી બહારથી પસાર થતી પીવાના પાણીની મુખ્ય પાઇપલાઇનમાં અચાનક ભંગાણ સર્જાયું હતું. લાઇનમાં પાણીનું દબાણ ખૂબ વધુ હોવાથી પાઇપ ફાટતાં જ ઊંચાઈ સુધી પાણીના ફુવારા ઊડવા લાગ્યા હતા.
જોતજોતામાં મોટી માત્રામાં પાણી રસ્તા પર વહેવા લાગ્યું અને સમગ્ર વિસ્તાર જળબંબાકાર બની ગયો હતો. આસપાસના માર્ગો પર પાણી ભરાઈ જતાં વાહનચાલકોને વાહન ચલાવવામાં મુશ્કેલી પડી હતી, જ્યારે રાહદારીઓને પણ અવરજવર કરવામાં ભારે હાલાકીનો સામનો કરવો પડ્યો હતો.
લાખો લીટર શુદ્ધ પાણી ગટરોમાં વહી ગયું
પાઇપલાઇન ફાટ્યા બાદ સતત પાણી વહેતું રહેતાં લાખો લીટર પીવાનું શુદ્ધ પાણી વેડફાઈ ગયું હતું. પાણી સીધું રસ્તા પરથી ગટરોમાં વહી જતાં સ્થાનિક લોકોએ પાલિકાની કામગીરી સામે પ્રશ્નો ઉઠાવ્યા હતા.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
એક તરફ અનેક વિસ્તારોમાં પાણીની અછત અને પાણી બચાવવાના સંદેશા આપવામાં આવે છે, જ્યારે બીજી તરફ પાલિકાની બેદરકારીને કારણે આટલા મોટા પ્રમાણમાં પાણીનો બગાડ થતાં લોકોમાં અસંતોષ જોવા મળ્યો હતો.
સ્થાનિકોએ અનેક વખત ફરિયાદ કરી
ઘટનાની જાણ થતાં જ વર્ધમાન સોસાયટીના રહીશોએ સુરત મહાનગરપાલિકાના કંટ્રોલ રૂમ અને કતારગામ ઝોનના હાઇડ્રોલિક વિભાગનો સંપર્ક કર્યો હતો. સ્થાનિકોએ ઓનલાઈન અને ટેલિફોન દ્વારા ફરિયાદ નોંધાવી હતી તેમજ પાણીનો સપ્લાય તાત્કાલિક બંધ કરવા અથવા સંબંધિત વાલ્વ બંધ કરવાની માંગ કરી હતી.
રહીશોના જણાવ્યા મુજબ, પાણીનો બગાડ અટકાવવા માટે અનેક વખત જાણ કરવા છતાં તંત્ર તરફથી તાત્કાલિક કોઈ કાર્યવાહી કરવામાં આવી નહોતી.
કલાકો સુધી કોઈ અધિકારી કે ટેકનિકલ ટીમ પહોંચી નહીં
સ્થાનિકોનો આક્ષેપ છે કે વારંવાર ફરિયાદ કરવા છતાં લાંબા સમય સુધી મહાનગરપાલિકાનો કોઈ જવાબદાર અધિકારી કે ટેકનિકલ સ્ટાફ ઘટનાસ્થળે પહોંચ્યો નહોતો. જેના કારણે સતત કલાકો સુધી પાણી વહેતું રહ્યું અને હજારો નહીં પરંતુ લાખો લીટર પીવાનું શુદ્ધ પાણી બિનજરૂરી રીતે વેડફાયું.
આ ઘટનાને લઈને રહીશોએ પાલિકાના હાઇડ્રોલિક વિભાગની કામગીરી સામે ગંભીર સવાલો ઉઠાવ્યા છે. લોકોનું કહેવું છે કે જો સમયસર વાલ્વ બંધ કરવામાં આવ્યો હોત તો પાણીનો આટલો મોટો બગાડ અટકાવી શકાય તેમ હતો.
પાલિકાની કામગીરી સામે ઉઠ્યા પ્રશ્નો
આ ઘટનાએ સુરત મહાનગરપાલિકાની પાણી પુરવઠા વ્યવસ્થા અને ઇમરજન્સી પ્રતિસાદ વ્યવસ્થાની કાર્યક્ષમતા પર પણ સવાલો ઊભા કર્યા છે. સ્થાનિકોનું કહેવું છે કે તંત્ર દ્વારા ઝડપી કાર્યવાહી કરવામાં આવે અને ભવિષ્યમાં આવી ઘટનાઓ ફરી ન બને તે માટે પાઇપલાઇનની નિયમિત તપાસ તેમજ જાળવણી કરવામાં આવે.
હાલ પાઇપલાઇન ફાટવાનું ચોક્કસ કારણ જાણવા તપાસ હાથ ધરવામાં આવી રહી છે. સાથે જ નુકસાનગ્રસ્ત લાઇનનું સમારકામ કરીને પાણી પુરવઠો પૂર્વવત્ કરવાની કામગીરી પણ શરૂ કરવામાં આવી છે.
આ પણ વાંચો: સચિન GIDCમાં કચરાના ઢગલામાં ભીષણ આગ, 5 કિમી દૂરથી દેખાયા ધુમાડાના ગોટેગોટા
