ટ્રેન્ડિંગનેશનલમનોરંજન

જ્યારે શત્રુઘ્ન સિંહાએ લગ્નની ના પાડી, વિનોદ ખન્નાનો હાથ પકડી ‘સન્યાસિની’ બનવા નીકળી હતી રીના રોય

નવી દિલ્હીઃ 7 જાન્યુઆરી, 2026: 80ના દાયકામાં બોલિવુડ પર રાજ કરનાર અભિનેત્રી રીના રોય તે સમયની સૌથી વધુ ફી લેતી એક્ટ્રેસમાંની એક હતી. ફિલ્મી પડદે સફળતાના શિખરો સર કરનાર રીના રોયનું અંગત જીવન હંમેશા ચર્ચાઓમાં રહ્યું છે. ખાસ કરીને શત્રુઘ્ન સિંહા સાથેના તેમના અફેરના કિસ્સાઓ જગજાહેર છે, પરંતુ ખૂબ ઓછા લોકો જાણે છે કે રીના રોય એક સમયે વિનોદ ખન્ના માટે એટલી પાગલ હતી કે તેઓ પોતાનું કરિયર છોડીને ‘સન્યાસી’ બનવા પણ તૈયાર થઈ ગઈ હતી.

શત્રુઘ્ન સિંહાએ આપ્યો દગો અને તૂટી ગઈ રીના

રીના રોય અને શત્રુઘ્ન સિંહા વચ્ચેનો પ્રેમ 1973માં ફિલ્મ ‘કાલીચરણ’ના સેટ પર પાંગર્યો હતો. રીના શત્રુઘ્ન સાથે લગ્ન કરવા માંગતી હતી અને તેમણે એક્ટરને 8 દિવસનું અલ્ટીમેટમ પણ આપ્યું હતું. જોકે, શત્રુઘ્ન સિંહા તે સમયે પૂનમ સિંહા સાથે પરણેલા હતા અને તેમણે પોતાની પત્નીનો સાથ પસંદ કર્યો. આ બ્રેકઅપથી રીના રોય ખરાબ રીતે ભાંગી પડી હતી.

વિનોદ ખન્નાની એન્ટ્રી અને ઓશોના આશ્રમ જવાની તૈયારી

શત્રુઘ્ન સિંહા સાથેના સંબંધોના અંત પછી રીના રોયના જીવનમાં વિનોદ ખન્નાની એન્ટ્રી થઈ. બંનેએ ‘ખૂન પસીના’, ‘જેલ યાત્રા’ અને ‘ઈન્સાન’ જેવી ઘણી ફિલ્મોમાં સાથે કામ કર્યું. રીના રોયના ભાઈ રાજા રોયે 1983માં ‘સ્ટારડસ્ટ’ મેગેઝિનને આપેલા ઈન્ટરવ્યુમાં એક ચોંકાવનારો ખુલાસો કર્યો હતો.

રીના વિનોદ ખન્ના સાથે એટલી હદે જોડાયેલી હતી કે તે બોલિવુડ છોડીને તેમની સાથે ઓશોના આશ્રમમાં જવા તૈયાર હતી. તેણે સંન્યાસિની બનવાનો નિર્ણય પણ કરી લીધો હતો.

વિનોદ ખન્ના સન્યાસી બન્યા અને રીના પાકિસ્તાન ગઈ

વિનોદ ખન્ના તે સમયે ઓશોના પ્રભાવમાં હતા અને અંતે તેઓ બધું છોડીને અમેરિકા આશ્રમમાં ચાલ્યા ગયા, જ્યાં તેમણે માળી તરીકે પણ કામ કર્યું. આ દરમિયાન રીના રોય સાથેનો તેમનો સંબંધ આગળ ન વધી શક્યો. ત્યારબાદ 1983માં જ રીના રોયે પાકિસ્તાની ક્રિકેટર મોહસિન ખાન સાથે લગ્ન કરી લીધા અને ભારત છોડી દીધું.

અંતે શું થયું?

1990માં મોહસિન ખાન સાથે છૂટાછેડા લીધા બાદ રીના રોય ભારત પરત ફરી. તેમણે ફરી ફિલ્મોમાં કામ શરૂ કર્યું, પરંતુ તે અગાઉ જેવી સફળતા ન મળી. તેઓ છેલ્લે વર્ષ 2000માં ફિલ્મ ‘રિફ્યુજી’માં જોવા મળ્યા હતા. છેલ્લા 26 વર્ષથી તેઓ એક્ટિંગથી દૂર છે અને હાલમાં મુંબઈમાં પોતાની બહેન બરખા રોય સાથે એક એક્ટિંગ સ્કૂલ ચલાવી રહ્યા છે.

 

Back to top button