રાજકોટમાં વંદે ભારત એક્સપ્રેસ ટ્રેન અકસ્માત: બે યુવાનોના કરૂણ મોત, એક ગંભીર રીતે ઘાયલ

રાજકોટમાં આજે (2 ફેબ્રુઆરી 2026) એક દુઃખદ અને ભયાનક રેલવે અકસ્માત થયો છે. ગોંડલ ચોકડી પાસે આવેલા માલધારી ફાટક નજીક વંદે ભારત એક્સપ્રેસ ટ્રેનની અડફેટે ત્રણ યુવાનો આવી ગયા હતા.

આ અકસ્માતમાં બે યુવાનોના કરૂણ મોત થયા છે. એક યુવાનનું ઘટનાસ્થળે જ મોત થયું હતું, જ્યારે બીજાએ હોસ્પિટલમાં દમ તોડ્યો હતો. ત્રીજો યુવાન ગંભીર રીતે ઘાયલ થયો છે અને તેને રાજકોટની સિવિલ હોસ્પિટલમાં ખસેડીને સારવાર આપવામાં આવી રહી છે.

પ્રાથમિક માહિતી અનુસાર ત્રણેય યુવાનો પરપ્રાંતીય હતા અને રાજકોટ આસપાસના કારખાનામાં મજૂરી કામ કરતા હતા. અકસ્માતનું કારણ સેલ્ફી લેવા અથવા મોબાઈલમાં રીલ બનાવવા માટે ટ્રેક પર જવું હોવાની શંકા વ્યક્ત કરવામાં આવી રહી છે.

ટ્રેનની હાઈ સ્પીડને કારણે અકસ્માત એટલો ભયાનક હતો કે યુવાનો ફંગોળાઈને ટ્રેકથી દૂર ફેંકાઈ ગયા હતા. ટ્રેનને તાત્કાલિક રોકવાની ફરજ પડી હતી.

રેલવે પોલીસે ઘટનાસ્થળે પહોંચીને ગુનો નોંધી તપાસ શરૂ કરી છે. આ અકસ્માત છે કે આત્મહત્યા તેની પણ તપાસ ચાલુ છે. આ ઘટના સોશિયલ મીડિયા રીલ્સ અને સેલ્ફીના ચક્કરમાં જીવન જોખમમાં મૂકવાના ખતરાનું એક દુ:ખદ ઉદાહરણ બની છે.

આ પણ વાંચો: બોટાદમાં મધમાખીના હુમલાથી યુવાનનું મોત, પરિવારમાં શોકનો માહોલ