રાહુલ ગાંધીની નાગરિકતા વિવાદ: અલ્હાબાદ હાઈકોર્ટનું કડક વલણ, કેન્દ્ર પાસે માંગ્યો જવાબ

Rahul Gandhi citizenship controversy: કોંગ્રેસ નેતા રાહુલ ગાંધીની નાગરિકતાનો જૂનો વિવાદ ફરી એકવાર ચર્ચામાં આવ્યો છે. અલ્હાબાદ હાઈકોર્ટની લખનૌ બેન્ચે આ મામલે કડક વલણ અપનાવ્યું છે. રાહુલ ગાંધી પર બેવડી નાગરિકતા ધરાવતા હોવાના જે આરોપો છે, તે અંગે ગુરુવારે જસ્ટિસ રાજીવ સિંહની સિંગલ બેન્ચમાં મહત્વની સુનાવણી હાથ ધરવામાં આવી હતી. આ હાઈ-પ્રોફાઈલ કેસને કારણે કોર્ટમાં ભારે ગરમાવો જોવા મળ્યો હતો.
કેન્દ્રીય ગૃહ મંત્રાલય (MHA) દ્વારા રાહુલ ગાંધીની નાગરિકતા સાથે જોડાયેલા કેટલાક અત્યંત મહત્વના દસ્તાવેજો સીલબંધ કવરમાં કોર્ટને સોંપવામાં આવ્યા હતા.
કોર્ટે કેન્દ્ર સરકારને પક્ષકાર બનાવવા આદેશ આપ્યો
આ ગોપનીય કાગળો વાંચ્યા બાદ કોર્ટે આ મામલે કેન્દ્ર સરકારની ભૂમિકાને વધુ મહત્વની ગણાવી છે. ન્યાયાધીશે સ્પષ્ટ કર્યું કે હવે કેન્દ્રીય ગૃહ મંત્રાલયને પણ આ કેસમાં પક્ષકાર બનાવવામાં આવે, જેથી ભારત સરકાર પાસે રાહુલ ગાંધીની નાગરિકતા અંગે જે પણ રેકોર્ડ ઉપલબ્ધ છે તે કોર્ટ સમક્ષ રજૂ કરી શકાય.
કોર્ટે હવે ભારત સરકારને આ સમગ્ર મામલે એફિડેવિટ (સોગંદનામું) દાખલ કરવા જણાવ્યું છે. સુનાવણી દરમિયાન કેન્દ્ર તરફથી એડિશનલ સોલિસિટર જનરલ એસ.બી. પાંડે અને ગૃહ સચિવ વિવેક મિશ્રા હાજર રહ્યા હતા, જે આ કેસની ગંભીરતા દર્શાવે છે.
શું છે બેવડી નાગરિકતાનો સમગ્ર વિવાદ?
આ વિવાદ પાછળ કર્ણાટકના ભાજપ કાર્યકર્તા એસ. વિગ્નેશ શિશિર છે. તેમનો દાવો છે કે રાહુલ ગાંધી પાસે માત્ર ભારતની જ નહીં, પરંતુ બ્રિટનની પણ નાગરિકતા છે. તેમણે કોર્ટમાં એવા પુરાવા રજૂ કરવાની વાત કરી છે જે દર્શાવે છે કે રાહુલ ગાંધીએ વિદેશી નાગરિકતા મેળવેલી છે.
ભાજપ કાર્યકર્તા શિશિરે માંગ કરી છે કે રાહુલ ગાંધી પર પાસપોર્ટ એક્ટ, સરકારી ગોપનીયતા કાયદો (Official Secrets Act) જેવી ગંભીર કલમો હેઠળ કેસ નોંધવો જોઈએ. અગાઉ આ મામલો રાયબરેલી કોર્ટમાં હતો, જે બાદમાં હાઈકોર્ટના આદેશથી લખનૌ ટ્રાન્સફર કરવામાં આવ્યો હતો.
6 એપ્રિલે થશે આગામી સુનાવણી
હવે આ સમગ્ર મામલાનો દારોમદાર કેન્દ્ર સરકાર અને ગૃહ મંત્રાલય પર છે. કોર્ટે તેમને જવાબ આપવા માટે 6 એપ્રિલ સુધીનો સમય આપ્યો છે. આ તારીખ ખૂબ જ મહત્વની છે કારણ કે તે દિવસે ખબર પડશે કે સરકાર પાસે રહેલા દસ્તાવેજોમાં રાહુલ ગાંધીની નાગરિકતા અંગે શું રહસ્ય છુપાયેલું છે.
આ પણ વાંચોઃ Unseasonal rain in Vallabhipur: તેજ પવન અને ગાજવીજ સાથે માવઠાએ મચાવી તબાહી
આ પણ વાંચોઃ માત્ર 7 દિવસમાં મેળવો PNG કનેક્શન: જાણો ફોનથી અરજી કરવાની સરળ રીત
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X












