પાકિસ્તાની વિદેશ મંત્રી ઈશાક ડારેનું મોટું નિવેદન, બોલ્યા ‘સીઝફાઈર 18 મે સુધી…’
ઇસ્લામાબાદ 16મે 2025: પાકિસ્તાનના વિદેશ મંત્રી ઇશાક ડારે ગુરુવારે દાવો કર્યો હતો કે પાકિસ્તાન અને ભારતના ડાયરેક્ટર્સ જનરલ ઓફ મિલિટરી ઓપરેશન્સ (DGMO) એ યુદ્ધવિરામ અંગે હોટલાઇન પર વાત કરી હતી. તેમણે કહ્યું કે હવે બંને દેશોના DGMO વચ્ચે 18 મેના રોજ વાતચીત થશે. ભારત અને પાકિસ્તાને ૧૦ મેના રોજ સરહદ પારથી થયેલા ડ્રોન અને મિસાઈલ હુમલાઓ પછી લશ્કરી સંઘર્ષ ઓછો કરવા સંમતિ આપી હતી.
ભારતીય પક્ષે કોઈ જવાબ આપ્યો નહીં
ડારે સંસદમાં જણાવ્યું હતું કે પાકિસ્તાનના DGMO મેજર જનરલ કાશિફ અબ્દુલ્લા અને તેમના ભારતીય સમકક્ષ લેફ્ટનન્ટ જનરલ રાજીવ ઘાઈએ બુધવારે બપોરે હોટલાઇન પર વાત કરી હતી. ડારના દાવા પર ભારતીય પક્ષ તરફથી કોઈ પ્રતિક્રિયા આવી નથી. ભારતીય સેનાના એક અધિકારીએ નવી દિલ્હીમાં જણાવ્યું હતું કે, “૧૦ મે ૨૦૨૫ ના રોજ બંને દેશોના DGMO વચ્ચે થયેલી સંમતિ મુજબ વિશ્વાસ નિર્માણના પગલાં ચાલુ રાખવાનો નિર્ણય લેવામાં આવ્યો છે.”
’18 મેના રોજ ફરી વાતચીત થશે’
સંસદમાં, ડારે કહ્યું કે બંને DGMO 18 મેના રોજ ફરી વાતચીત કરશે. વાટાઘાટાની કોઈ વિગતો શેર કરવામાં આવી ન હતી સિવાય કે બંને પક્ષો યુદ્ધવિરામનું પાલન કરવા સંમત થયા. જીઓ ન્યૂઝ અનુસાર, ડારે કહ્યું, “DGMO વાટાઘાટા દરમિયાન (10 મેના રોજ), યુદ્ધવિરામ 12 મે સુધી લંબાવવામાં આવ્યો હતો. જ્યારે DGMOએ 12 મેના રોજ ફરીથી વાત કરી, ત્યારે યુદ્ધવિરામ 14 મે સુધી લંબાવવામાં આવ્યો અને 14 મેના રોજ વાટાઘાટા પછી, યુદ્ધવિરામ ૧૮ મે સુધી લંબાવવામાં આવ્યો.”
ડારે ધમકી આપી હતી
તાજેતરમાં જ ઇશાક ડારે સીએનએનને આપેલા ઇન્ટરવ્યુમાં કહ્યું હતું કે જો ભારત અને પાકિસ્તાન વચ્ચે સિંધુ જળ સંધિનો મુદ્દો ઉકેલવામાં નહીં આવે તો યુદ્ધવિરામ જોખમમાં મુકાઈ શકે છે. જો આ મામલો ઉકેલાશે નહીં, તો તેને ‘યુદ્ધનું કૃત્ય’ ગણવામાં આવશે.
