મણિપુરમાં સુરક્ષા દળોની મોટી કાર્યવાહી: 53 હથિયાર, 7 IED, 10 લાખનું ડ્રગ્સ જપ્ત, ઘણા આતંકવાદીઓ ઝડપાયા

મણિપુર, 2 સપ્ટેમ્બર 2025: મણિપુરમાં 25 ઓગસ્ટથી 31 ઓગસ્ટ 2025 દરમિયાન ભારતીય સેના, અસમ રાઈફલ્સ અને મણિપુર પોલીસએ સંયુક્ત રીતે રાજ્યના વિવિધ જિલ્લાઓમાં ઓપરેશન હાથ ધર્યા હતા. આ ઓપરેશન જિરીબામ, ચુરાચાંદપુર, બિષ્ણુપુર, કાકચિંગ, તમેંગલોંગ, કાંગપોકપી, ઈમ્ફાલ વેસ્ટ અને ઈમ્ફાલ ઈસ્ટ જિલ્લાઓમાં ચલાવવામાં આવ્યા. આ ઓપરેશનમાં ત્રણ આતંકવાદીઓની ધરપકડ કરવામાં આવી, 53 હથિયાર, 7 આઈઈડી, 10 લાખ રૂપિયાની કિંમતનું ડ્રગ્સ અને મોટી માત્રામાં યુદ્ધ સામગ્રી જપ્ત કરવામાં આવી.

ચુરાચાંદપુરમાં મોટી સફળતા

25 ઓગસ્ટના રોજ ચુરાચાંદપુર જિલ્લાના મુનુઆમ ગામમાં અસમ રાઈફલ્સએ મોટી સફળતા હાંસલ કરી અને 1200 WY ટેબ્લેટ (આશરે 10 લાખ રૂપિયાની કિંમત) જપ્ત કરી, જેનાથી ડ્રગ્સની તસ્કરીની મોટી ચેઈન તોડવામાં આવી.

હથિયારોનો જથ્થો જપ્ત

ચંદેલ જિલ્લાના સિંગતોંગ ગામમાંથી AK-47, INSAS રાઈફલ, મોર્ટાર, પિસ્તોલ, કાર્બાઈન, પોમ્પી ગન, ગોળાબારૂદ, કોમ્યુનિકેશન સાધનો અને બુલેટપ્રૂફ સામગ્રી જપ્ત કરવામાં આવી. તમેંગલોંગ જિલ્લાના પાંગમોલ ગામમાંથી 110 રાઉન્ડ AK-47, 16 રાઉન્ડ LMG, રેડિયો સેટ અને ગણવેશ બરામદ થયા.
જિરીબામ જિલ્લાના રશીદપુર ગામમાંથી INSAS, SLR રાઈફલ, પિસ્તોલ, 41 રાઉન્ડ અને 6 રેડિયો સેટ મળી આવ્યા.કાંગપોકપી જિલ્લામાં વિવિધ સ્થળોએથી M-16 રાઈફલ, .303 રાઈફલ, કાર્બાઈન, પિસ્તોલ, લાથોડ, ગ્રેનેડ, રેડિયો સેટ અને બુલેટપ્રૂફ જેકેટ જપ્ત કરવામાં આવ્યા.

આતંકવાદીઓની ધરપકડ

27 ઓગસ્ટના રોજ તેંગનૌપાલ જિલ્લાના મોરેહ (હાઓલેનફાઈ)માંથી એક વ્યક્તિને હથિયારોની તસ્કરી અને ઉઘરાણીમાં સંડોવણી બદલ ઝડપી લેવાયો. 28 ઓગસ્ટના રોજ કાકચિંગ, ઈમ્ફાલ વેસ્ટ અને ઈમ્ફાલ ઈસ્ટ જિલ્લાઓમાંથી KCP અને KYKL જેવા પ્રતિબંધિત સંગઠનોના સક્રિય આતંકવાદીઓની ધરપકડ કરવામાં આવી. લોકટક તળાવ નજીકથી પણ હથિયારો અને વિસ્ફોટકો મળી આવ્યા.

29 ઓગસ્ટના રોજ બિષ્ણુપુર જિલ્લાના મોઈરાંગ વિસ્તારમાંથી PREPAK (Pro)નો એક સક્રિય કેડર ઝડપાયો, જેણે પૂછપરછમાં પોતાના લશ્કરી તાલીમની માહિતી આપી. તેંગનૌપાલ જિલ્લાની ભારત-મ્યાનમાર સરહદ (બોર્ડર પિલર 86) પર ઘાત લગાવીને PLA સંગઠનના ચાર સક્રિય કેડરની ધરપકડ કરવામાં આવી.

આ સંયુક્ત ઓપરેશન્સમાં ભારતીય સેના, અસમ રાઈફલ્સ અને મણિપુર પોલીસએ મણિપુરમાં શાંતિ અને સુરક્ષા જાળવવા માટે પોતાની પ્રતિબદ્ધતા દર્શાવી છે. આ કાર્યવાહીઓથી રાજ્યમાં આતંકવાદ, ડ્રગ્સ તસ્કરી અને ગેરકાયદેસર હથિયારોની હેરફેર પર નિયંત્રણ લાવવામાં મદદ મળશે.

આ પણ વાંચો : કેદારનાથ યાત્રામાં ISROનું ‘ડિજિટલ કવચ’, હેલિકોપ્ટર સેવાઓ થશે સ્માર્ટ અને સુરક્ષિત