‘વિમાનમાં બોમ્બ છે’ લખાણથી હડકંપ, કોલકાતા એરપોર્ટ પર સુરક્ષા એલર્ટ!
kolkata: કોલકાતા એરપોર્ટ પર ફરી એકવાર બોમ્બની ધમકીનો મામલો સામે આવ્યો છે. ફુકેટથી કોલકાતા આવેલી એક ફ્લાઇટના ટોયલેટના કાચ પર “Bomb inside aircraft” એટલે કે “વિમાનમાં બોમ્બ છે” એવું લખેલું મળી આવ્યું હતું. એરપોર્ટનાં સૂત્રોના જણાવ્યા અનુસાર, ફ્લાઇટ લેન્ડ થયા બાદ કેબિન ક્રૂના સભ્યો ટોયલેટ સાફ કરવા ગયા ત્યારે તેમની નજર આ લખાણ પર પડી હતી. આથી એરપોર્ટ પર અફરાતફરીનો માહોલ સર્જાયો હતો.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
શું છે સમગ્ર મામલો?
વિમાનના ટોયલેટના કાચ પર બોમ્બ હોવાની ધમકી લખેલી હોવાની જાણ તરત જ પાઇલટ અને એરપોર્ટના સુરક્ષા અધિકારીઓને કરવામાં આવી હતી. ત્યારબાદ વિમાનને આઇસોલેશન બેમાં લઈ જવામાં આવ્યું હતું. તમામ મુસાફરોને સુરક્ષિત રીતે વિમાનમાંથી ઉતારવામાં આવ્યા હતા. ત્યારબાદ CISF, બોમ્બ સ્ક્વોડ અને એરપોર્ટ પોલીસે વિમાનની સઘન તપાસ શરૂ કરી હતી. જોકે, લાંબી તપાસ બાદ પણ વિમાનમાંથી કોઈ શંકાસ્પદ વસ્તુ મળી આવી નહોતી. પ્રાથમિક રીતે આશંકા વ્યક્ત કરવામાં આવી રહી છે કે કોઈએ દહેશત ફેલાવવાના ઇરાદે આ હરકત કરી હોઈ શકે છે. આ લખાણ કોણે લખ્યું હતું તે જાણવા માટે પોલીસ ફ્લાઇટની મુસાફર યાદી અને CCTV ફૂટેજની તપાસ કરી રહી છે.
8 ઑક્ટોબરે પણ મળી હતી બોમ્બથી ઉડાવી દેવાની ધમકી
કોલકાતા એરપોર્ટ પર આ પહેલાં પણ બોમ્બની ધમકીનો મામલો સામે આવ્યો હતો. ગત 8 ઑક્ટોબરે ઈ-મેઇલ દ્વારા એરપોર્ટને બોમ્બથી ઉડાવી દેવાની ધમકી આપવામાં આવી હતી. ઈ-મેઇલમાં એરપોર્ટ પરિસરમાં વિસ્ફોટકો મૂકવામાં આવ્યા હોવાનો દાવો કરવામાં આવ્યો હતો અને સમગ્ર એરપોર્ટને ઉડાવી દેવાની ચેતવણી અપાઈ હતી. અહેવાલો અનુસાર, એરપોર્ટ પ્રશાસનને બપોરે આશરે 2 વાગ્યે આ ધમકીભર્યો ઈ-મેઇલ મળ્યો હતો. ત્યારબાદ એરપોર્ટ પર હડકંપ મચી ગયો હતો અને સુરક્ષા વ્યવસ્થા વધુ કડક કરવામાં આવી હતી. સુરક્ષા એજન્સીઓએ સમગ્ર પરિસરમાં સઘન તપાસ હાથ ધરી હતી.
આ પણ વાંચો:EPFO પેન્શનર્સ માટે રાહત! હવે પોસ્ટમેન ઘરે આવીને જમા કરશે જીવન પ્રમાણપત્ર
5 સપ્ટેમ્બરે પણ વિમાનમાં બોમ્બ હોવાની ચિઠ્ઠી મળી હતી
કોલકાતા એરપોર્ટ પર બોમ્બની ધમકીનો આ પહેલો બનાવ નથી. આ જ વર્ષે 5 સપ્ટેમ્બરે પણ એક વિમાનમાં બોમ્બ હોવાની ચિઠ્ઠી મળી આવી હોવાના અહેવાલ સામે આવ્યા હતા. તે સમયે પણ એરપોર્ટ પર સઘન તપાસ હાથ ધરવામાં આવી હતી, પરંતુ કોઈ બોમ્બ મળી આવ્યો નહોતો. વારંવાર આવી ધમકીઓ મળવાને કારણે એરપોર્ટની સુરક્ષા વ્યવસ્થા અને કામગીરી પર અસર પડી શકે છે. આવી ઘટનાઓમાં ધમકીની સત્યતા તપાસવી અને જવાબદાર વ્યક્તિઓને ઓળખવા માટે સુરક્ષા એજન્સીઓ દ્વારા તપાસ કરવી જરૂરી છે. હાલના કિસ્સામાં પણ લખાણ કોણે કર્યું હતું તે જાણવા માટે તપાસ ચાલુ છે.
આ પણ વાંચો:રાણીપથી નરેન્દ્ર મોદી સ્ટેડિયમ પહોંચવું બનશે સરળ, 1.5 કિમી લાંબો રેલવે ઓવરબ્રિજ બનાવવાની તૈયારી
