‘મને ક્યારેય T20 બેટ્સમેન માનવામાં આવ્યો ન હતો’, કેએલ રાહુલે વ્યક્ત કરી પીડા
KL Rahul: ભારતીય ક્રિકેટર અને દિલ્હી કેપિટલ્સના બેટ્સમેન કેએલ રાહુલે તાજેતરમાં પોતાના કરિયરના સંઘર્ષ અને ટીકાઓ વિશે ખુલીને વાત કરી છે. તેમણે જણાવ્યું કે કરિયરની શરૂઆતમાં તેમને માત્ર ટેસ્ટ પ્લેયર માનવામાં આવતા હતા, પરંતુ તેમણે પોતાની મહેનતથી આ ધારણા બદલી નાખી છે.
શરૂઆતમાં ‘ટેસ્ટ પ્લેયર’નું ટેગ લાગ્યું હતું
કેએલ રાહુલે એક મીડિયા સાથે વાત કરતા જણાવ્યું કે દસ વર્ષ પહેલા તેમને વ્હાઇટ બોલ ક્રિકેટ (સીમિત ઓવરો) માટે યોગ્ય માનવામાં આવતા ન હતા. તેમને માત્ર એક ટેસ્ટ ખેલાડી તરીકે જોવામાં આવતા હતા. રાહુલે કહ્યું કે આ માળખાને તોડીને વ્હાઇટ બોલ ક્રિકેટમાં સુધારો કરવો અને અહીં સુધી પહોંચવું એ બાબત પર તેમને ઘણો ગર્વ છે.
IPL-2026 માં 152 રનની ઐતિહાસિક ઇનિંગ
રાહુલે પોતાની સ્ટ્રાઈક રેટને લઈને થતી ટીકાઓનો જવાબ મેદાન પર આપ્યો છે. IPL-2026 માં પંજાબ સામે રમેલી 64 બોલમાં 152 રનની તેમની ઇનિંગે સૌને ચોંકાવી દીધા હતા. આ સાથે તેઓ આ લીગમાં 150 રનનો આંકડો સ્પર્શનાર પ્રથમ ભારતીય બેટ્સમેન બન્યા હતા.
ટીમ ઈન્ડિયામાંથી બહાર હોવા છતાં આશાવાદી
નોંધનીય છે કે, કેએલ રાહુલ વર્ષ 2022 થી ભારતની T20 ટીમનો હિસ્સો નથી, જોકે તેઓ વનડે અને ટેસ્ટ રમી રહ્યા છે. રાહુલે સ્વીકાર્યું કે આ સફરમાં તેમણે ભૂલો પણ કરી હશે, પરંતુ જ્યારે પણ તેમને તક મળી ત્યારે તેમણે પોતાનું શ્રેષ્ઠ પ્રદર્શન કરવાનો પ્રયાસ કર્યો છે.
મુશ્કેલ સમયમાં પોઝિટિવ રહેતા શીખ્યા
પોતાના અનુભવો શેર કરતા રાહુલે કહ્યું કે તેમણે ખરાબ સમયમાં પણ સકારાત્મક દ્રષ્ટિકોણ જાળવી રાખતા શીખ્યું છે. જ્યારે પણ તેઓ કંઈ હાંસલ ન કરી શકવાને કારણે નિરાશ થાય છે, ત્યારે તેઓ અત્યાર સુધી જે હાંસલ કર્યું છે તેને યાદ કરીને પોતાને પ્રોત્સાહિત કરે છે.
આ પણ વાંચોઃ ‘સનાતનનું અપમાન કરનારાઓનો સફાયો થશે’, બંગાળમાં ભાજપની જીત પર યોગીનો સંદેશ
આ પણ વાંચોઃ કોઈ CM બનતા-બનતા રહી ગયા, કોઈએ છોડી સરકારી નોકરી… ‘વિજયપથ’ની સ્ક્રિપ્ટના 5 ધુરંધર
અમારી WhatsApp ચેનલમાં જોડાવા આ લિંક પર ક્લીક કરો
