સુરેન્દ્રનગર: સુરેન્દ્રનગર જિલ્લાના દસાડા (પાટડી) તાલુકાના ખારાઘોડા ગામમાં ભારે વરસાદ બાદ સર્જાયેલી પરિસ્થિતિએ સ્થાનિક તંત્રની કામગીરી સામે અનેક સવાલો ઉભા કર્યા છે. સતત વરસેલા વરસાદ અને ઉપરવાસમાંથી આવેલા પાણીના કારણે ગામના અનેક વિસ્તારો જળબંબાકાર બની ગયા હતા. સ્મશાન સુધી જતો માર્ગ પણ પાણીમાં ગરકાવ થઈ જતા એક હિન્દુ પરિવારને અંતિમ સંસ્કાર માટે પરંપરા વિરુદ્ધ નિર્ણય લેવાની ફરજ પડી હતી.
સ્મશાન સુધી પહોંચવાનો રસ્તો બંધ, અગ્નિદાહ શક્ય બન્યો નહીં
માહિતી મુજબ, ખારાઘોડા (સ્ટેશન) ગામના રહેવાસી મેહુલભાઈ ઠાકોરની સગર્ભા પત્નીનું સારવાર માટે વિરમગામ લઈ જતાં પહેલાં જ દુઃખદ અવસાન થયું હતું. પરિવાર મૃતદેહને ગામમાં અંતિમ સંસ્કાર માટે લાવ્યો, પરંતુ ભારે વરસાદના કારણે સ્મશાન સુધી જવાનો માર્ગ સંપૂર્ણપણે બંધ હતો. સ્મશાનમાં છત સહિતની જરૂરી સુવિધાઓ પણ ન હોવાથી પરિવાર પાસે કોઈ વિકલ્પ બચ્યો નહોતો.
આખરે ભારે મનદુઃખ સાથે પરિવારજનોએ જેસીબીની મદદથી ખાડો ખોદાવી મહિલાની દફનવિધિ કરી હતી. હિન્દુ પરંપરામાં સામાન્ય રીતે અગ્નિદાહ આપવામાં આવે છે, પરંતુ સંજોગોએ પરિવારને આ નિર્ણય લેવા મજબૂર બનાવ્યો.
વીડિયો વાયરલ થતાં તંત્ર સામે ઉઠ્યા સવાલ
આ સમગ્ર ઘટનાનો વીડિયો સોશિયલ મીડિયા પર વાયરલ થતાં ગ્રામજનોમાં ભારે રોષ જોવા મળ્યો છે. સ્થાનિક લોકોનું કહેવું છે કે જો સ્મશાન સુધી યોગ્ય રસ્તો અને મૂળભૂત સુવિધાઓ ઉપલબ્ધ હોત તો પરિવારને આવી દુઃખદ પરિસ્થિતિનો સામનો કરવો ન પડ્યો હોત.
20 વર્ષથી સ્મશાનની સુવિધા માટે માંગ
ગામના પૂર્વ પંચાયત સભ્ય રમેશભાઈ સહિતના સ્થાનિકોએ આક્ષેપ કર્યો છે કે છેલ્લા બે દાયકાથી સ્મશાનમાં છત, રસ્તો અને અન્ય સુવિધાઓ માટે અનેક વખત રજૂઆતો કરવામાં આવી છે. છતાં આજદિન સુધી કોઈ અસરકારક કામગીરી કરવામાં આવી નથી. ગ્રામજનોના જણાવ્યા મુજબ, આ બેદરકારીના કારણે જ આજે પરિવારને પોતાની ધાર્મિક પરંપરા વિરુદ્ધ અંતિમ સંસ્કાર કરવાની ફરજ પડી.
વિકાસના દાવાઓ સામે ઉઠ્યા પ્રશ્નો
સરકાર દ્વારા ગ્રામ વિકાસ માટે વિવિધ યોજનાઓ હેઠળ ગ્રાન્ટ ફાળવવામાં આવતી હોવા છતાં છેવાડાના ગામોમાં સ્મશાન જેવી મૂળભૂત સુવિધાઓનો અભાવ હોવાને કારણે લોકોમાં અસંતોષ ફેલાયો છે. ગ્રામજનોનું માનવું છે કે વિકાસના દાવાઓ વચ્ચે આવી સ્થિતિ સર્જાવું ચિંતાજનક છે.
પૂર જેવી સ્થિતિથી જનજીવન પ્રભાવિત
ભારે વરસાદ બાદ પાટડી અને આસપાસના વિસ્તારોમાં હજુ પણ અનેક ખેતરો પાણીમાં ગરકાવ છે. નારણપુરા ગામમાં પશુઓના મોતની ઘટનાઓ સામે આવી છે, જ્યારે પાટડી-ખારાઘોડા વચ્ચેનો રેલવે ટ્રેક પણ નુકસાન પામ્યો હોવાનું જાણવા મળ્યું છે. સમગ્ર વિસ્તારમાં પૂર જેવી સ્થિતિ સર્જાતા જનજીવન પર વ્યાપક અસર પડી છે.
ખારાઘોડાની આ ઘટના માત્ર એક પરિવારની વ્યથા નથી, પરંતુ ગ્રામ્ય વિસ્તારોમાં મૂળભૂત સુવિધાઓના અભાવ અને વિકાસના દાવાઓ વચ્ચેના અંતરને પણ ઉજાગર કરતી ઘટના તરીકે ચર્ચામાં આવી છે.
આ પણ વાંચો: અનોખી સરકારી શાળા! એક પણ વિદ્યાર્થી નથી, છતાં દરરોજ ભણાવવા પહોંચે છે બે શિક્ષકો
