ટોપ ન્યૂઝટ્રેન્ડિંગવર્લ્ડ

“જો ઈરાનના બંદરોને ખતરો થશે તો કંઈપણ સુરક્ષિત નહીં રહે,” IRGCએ અમેરિકાને આપી ધમકી

Strait Of Hormuz: અમેરિકા સાથે ચાલી રહેલા તણાવ વચ્ચે ઈરાને સોમવારે (13 એપ્રિલે) ચેતવણી આપી કે જો તેમના બંદરો પર કોઈ ખતરો ઊભો થશે તો તેના વ્યાપક પ્રાદેશિક પરિણામો આવશે. આ ચેતવણી અમેરિકાના રાષ્ટ્રપતિ ડોનાલ્ડ ટ્રમ્પ દ્વારા હોર્મુઝ સ્ટ્રેટમાં નાકાબંધી કરવાની જાહેરાતને ધ્યાનમાં રાખીને આપવામાં આવી છે.

કોઈપણ બંદર સુરક્ષિત નહીં રહે – ઈરાન

મેહર સમાચાર એજન્સીના જણાવ્યા મુજબ, ખાતમ અલ-અનબિયા કેન્દ્રીય મુખ્યાલયના પ્રવક્તાએ કહ્યું કે વિસ્તારમાં સમુદ્રી સુરક્ષા સામૂહિક હોવી જોઈએ. તેમણે ચેતવણી આપી કે ઈરાનના બંદરોને નિશાન બનાવતા કોઈપણ પગલાંની અસર પડોશી દેશો પર પણ પડશે. તેમણે વધુમાં કહ્યું કે જો ઈરાનના બંદરોની સુરક્ષા ખતરામાં મુકાઈ, તો પર્સિયન ગલ્ફ અથવા ઓમાનની ખાડીમાં કોઈપણ બંદર સુરક્ષિત નહીં રહે.

ઈરાન તરફથી આ નવી ચેતવણી એવા સમયે આવી છે જ્યારે અમેરિકી સેનાએ સોમવારથી ઈરાનના બંદરો અને દરિયાકાંઠાના વિસ્તારોની નાકાબંધી શરૂ કરવાની જાહેરાત કરી છે. આ નિર્ણય 2 અઠવાડિયાના યુદ્ધવિરામ પછી હોર્મુઝ સ્ટ્રેટમાંથી મર્યાદિત જહાજોની અવરજવર ફરી શરૂ થવાની માહિતી સામે આવ્યા બાદ લેવામાં આવ્યો છે.

અમેરિકાએ નાકાબંધીની જાહેરાત કરી

વોશિંગ્ટન અને તેહરાન વચ્ચે પાકિસ્તાનમાં થયેલી શાંતિ વાટાઘાટો નિષ્ફળ જતા આ પગલું લેવામાં આવ્યું છે. અમેરિકી સેન્ટ્રલ કમાન્ડ (CENTCOM)એ જણાવ્યું કે નાકાબંધી સોમવારે સવારે 10 વાગ્યાથી (ઈરાનમાં સાંજે 5:30 વાગ્યે) શરૂ થશે. આ નાકાબંધી ઈરાનના બંદરો અને દરિયાકાંઠાના વિસ્તારોમાં પ્રવેશ કરતા અથવા ત્યાંથી બહાર નીકળતા તમામ દેશોના જહાજો પર સમાન રીતે લાગુ પડશે. તેમાં અરબ ખાડી અને ઓમાનની ખાડીમાં આવેલા તમામ ઈરાની બંદરોનો સમાવેશ થાય છે. સેન્ટકોમે સ્પષ્ટ કર્યું છે કે જે જહાજો ગેર-ઈરાની બંદરો વચ્ચે મુસાફરી કરે છે, તેમને હોર્મુઝ સ્ટ્રેટમાંથી પસાર થવાની મંજૂરી આપવામાં આવશે.

હોર્મુઝમાંથી લેન્ડમાઈન દૂર કરશે અમેરિકા

આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે આંતરરાષ્ટ્રીય જળક્ષેત્રમાં ઈરાનને ટોલ ચૂકવનારા કોઈપણ જહાજને અમેરિકી સેના રોકશે. ટ્રમ્પે સોશિયલ મીડિયા પર લખ્યું કે, “ગેરકાયદેસર ટોલ ચૂકવનાર કોઈપણ જહાજને ખુલ્લા સમુદ્રમાં સુરક્ષિત રીતે પસાર થવા દેવામાં આવશે નહીં.” તેમણે ચેતવણી આપતાં કહ્યું કે, “જો કોઈ ઈરાની અમારી પર અથવા શાંતિપૂર્ણ જહાજો પર ગોળીબારી કરશે, તો તેને નર્કમાં મોકલવામાં આવશે.” ટ્રમ્પે વધુમાં જણાવ્યું કે અમેરિકી નૌસેના હોર્મુઝ સ્ટ્રેટમાં ઈરાન દ્વારા પાથરવામાં આવેલી લેન્ડમાઇન્સને દૂર કરવાની પ્રક્રિયા શરૂ કરશે.

આ પણ વાંચો: બધા દેશોના જહાજોને હોર્મુઝમાંથી પસાર થવાનો અધિકાર, શું કહે છે આંતરરાષ્ટ્રીય કાયદો?

Back to top button