ટ્રેન્ડિંગવર્લ્ડ

બહેરીનમાં અમેરિકન રડાર પર હુમલા બાદ ભડક્યું અમેરિકા, ઈરાનના મિસાઇલ ઠેકાણા પર કર્યો પ્રહાર

US Iran Missile Attack  :   અમેરિકા અને ઈરાન વચ્ચે ફરી એકવાર સૈન્ય સંઘર્ષ (Military Conflict) ઉગ્ર બન્યો છે. બહેરીનમાં અમેરિકાના સૈન્ય રડાર સિસ્ટમને નિશાન બનાવવામાં આવ્યા હોવાના ઈરાનના દાવા બાદ અમેરિકાએ વળતો પ્રહાર કર્યો છે. અમેરિકન લડાકુ વિમાનોએ હોર્મુઝ જળમાર્ગમાં આવેલા ઈરાનના કેશમ ટાપુ પર મિસાઇલ લોન્ચ સાઇટને નિશાન બનાવી હતી. અમેરિકાના સૈન્ય અધિકારીના જણાવ્યા અનુસાર, આ હુમલામાં ઈરાનના ઇસ્લામિક રિવોલ્યુશનરી ગાર્ડ્સ (IRGC)ના મિસાઇલ લોન્ચિંગ ઠેકાણાને ટાર્ગેટ કરવામાં આવ્યું હતું.

અમેરિકાએ આ કાર્યવાહી પોતાના સૈનિકો અને સૈન્ય મથકો પર ઈરાન દ્વારા કરવામાં આવેલી આક્રમક ગતિવિધિઓના જવાબમાં કરી હોવાનું જણાવ્યું છે. જોકે, ઈરાની મીડિયાએ એક અધિકારીને ટાંકીને દાવો કર્યો હતો કે અમેરિકાના હુમલામાં કોઈ પણ માળખાકીય સુવિધાને નુકસાન થયું નથી.

બહેરીનમાં અમેરિકન રડાર સિસ્ટમ પર હુમલાનો દાવો

આ સમગ્ર ઘટનાની શરૂઆત ઈરાનની ઇસ્લામિક રિવોલ્યુશનરી ગાર્ડ્સ કોર્પ્સ (Islamic Revolutionary Guard Corps)ના દાવા બાદ થઈ હતી. IRGCએ જણાવ્યું હતું કે તેણે બહેરીનના શેખ ઈસા એરબેઝ (Sheikh Isa Air Base) પર અમેરિકાની સૈન્ય રડાર સિસ્ટમને નિશાન બનાવી હતી..

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

બીજી તરફ, બહેરીને દાવો કર્યો હતો કે તેણે આ હુમલાને નિષ્ફળ બનાવ્યો છે. આ ઘટનામાં કોઈ જાનહાનિ કે નુકસાન થયું ન હોવાનું પણ જણાવાયું હતું. ઉલ્લેખનીય છે કે બહેરીનમાં અમેરિકન નૌકાદળના પાંચમા કાફલાનું મુખ્યાલય (US Fifth Fleet Headquarters) આવેલું છે, જેના કારણે આ વિસ્તાર અમેરિકાની સૈન્ય વ્યૂહરચના માટે અત્યંત મહત્ત્વનો છે.

યુદ્ધ રોકવાના પ્રયાસો વચ્ચે વધી રહ્યો છે તણાવ

અમેરિકા અને ઈરાન વચ્ચે ફરી સૈન્ય કાર્યવાહી એવા સમયે થઈ છે, જ્યારે બંને દેશો વચ્ચે ચાલી રહેલા સંઘર્ષને અટકાવવા માટે રાજદ્વારી પ્રયાસો (Diplomatic Efforts) કરવામાં આવી રહ્યા છે. છેલ્લા લગભગ નવ મહિનાથી ચાલી રહેલા આ યુદ્ધની અસર સમગ્ર મધ્ય પૂર્વ (Middle East) પર પડી છે. વૈશ્વિક ઊર્જા પુરવઠો ખોરવાયો છે અને આંતરરાષ્ટ્રીય બજારમાં કાચા તેલના ભાવમાં પણ વધારો થયો છે.

મંગળવારે કતાર અને ઈરાનના અધિકારીઓ વચ્ચે યુદ્ધનો અંત લાવવા માટેના પ્રસ્તાવો અંગે ચર્ચા થઈ હતી. કતારના પ્રવક્તા માજિદ અલ અન્સારીએ જણાવ્યું હતું કે બંને પક્ષોએ અલગ-અલગ પ્રસ્તાવો વચ્ચે સહમતી સાધવા અને મતભેદો ઘટાડવા અંગે વાતચીત કરી હતી. આ દરમિયાન ઈરાનના વિદેશમંત્રી અબ્બાસ અરાઘચી ઓમાન પહોંચ્યા હતા. ત્યાં તેમણે ઓમાનના વિદેશમંત્રી સાથે દરિયાઈ સુરક્ષા (Maritime Security), આંતરરાષ્ટ્રીય જહાજોની અવરજવર અને વેપાર સંબંધિત મુદ્દાઓ પર ચર્ચા કરી હતી.

હોર્મુઝ જળમાર્ગમાં ટેન્કરો પર હુમલાથી ચિંતા વધી

28 ફેબ્રુઆરીએ ઈરાન પર અમેરિકા અને ઇઝરાયેલના હુમલા બાદ આ યુદ્ધની શરૂઆત થઈ હતી. ઓમાન અને ઈરાન હોર્મુઝ જળમાર્ગની બંને તરફ આવેલા દેશો છે. યુદ્ધ પહેલાં વિશ્વના અંદાજે 20 ટકા કાચા તેલ અને લિક્વિફાઇડ નેચરલ ગેસ (LNG)નો પુરવઠો આ દરિયાઈ માર્ગેથી થતો હતો. જોકે, ઈરાન દ્વારા આ માર્ગ પર આંશિક અવરોધ ઊભો કરવામાં આવતા આંતરરાષ્ટ્રીય દરિયાઈ વેપારને અસર પહોંચી છે.

હોર્મુઝ જળમાર્ગમાં ઓઇલ ટેન્કરો પર હુમલાની ઘટનાઓએ પણ ચિંતા વધારી છે. બ્રિટનની મેરીટાઇમ ટ્રેડ ઓપરેશન્સ એજન્સી (UKMTO)ના જણાવ્યા અનુસાર, ઓમાનના દરિયાકાંઠાના શહેર ખાસાબની ઉત્તરે એક ઓઇલ ટેન્કર પર હુમલો થયો હતો. આ ઘટના બાદ જહાજના ક્રૂ સભ્યોનો સંપર્ક થઈ શક્યો નહોતો. બીજી તરફ, ઈરાનના રિવોલ્યુશનરી ગાર્ડ્સ અને નૌકાદળે દાવો કર્યો હતો કે હોર્મુઝ જળમાર્ગમાં એક LNG જહાજ અને બે ઓઇલ ટેન્કરમાં આગ લાગી હતી. જોકે, સમાચાર એજન્સી રોયટર્સ (Reuters) આ દાવાઓની સ્વતંત્ર રીતે પુષ્ટિ કરી શકી નથી.

આ સૈન્ય તણાવની અસર આંતરરાષ્ટ્રીય તેલ બજાર (Global Oil Market) પર પણ જોવા મળી રહી છે. મંગળવારે બ્રેન્ટ ક્રૂડ (Brent Crude)ના ભાવમાં 0.4 ટકાનો વધારો થયો હતો અને ભાવ પ્રતિ બેરલ 92.76 ડોલર સુધી પહોંચી ગયો હતો. હોર્મુઝ જળમાર્ગમાં વધતા તણાવને કારણે વૈશ્વિક ઊર્જા પુરવઠા અને તેલના ભાવ અંગે ચિંતા યથાવત છે.

આ પણ વાંચો : યોગી અને અમિત શાહ વચ્ચે દિલ્હીમાં એક કલાક બેઠક, યુપી ચૂંટણીની રણનીતિ પર મંથન

Back to top button