IND vs ENG: શું અર્શદીપને પહેલી વાર ટીમ ઈંડિયાની પ્લેઈંગ 11માં મોકો મળશે? શુભમન ગિલે આપી અપડેટ

IND vs ENG: જ્યારે ટીમ ઈન્ડિયાને એન્ડરસન-તેંડુલકર ટ્રોફી માટે પસંદ કરવામાં આવી હતી, ત્યારે તે સમયે અર્શદીપ સિંહને પણ તક મળી હતી. ત્યારબાદ બધાને આશા હતી કે આ ડાબોડી બોલરને ઈંગ્લેન્ડની ધરતી પર પહેલી કે બીજી ટેસ્ટ મેચમાં ડેબ્યૂ કરવાની તક મળી શકે છે. જોકે, પહેલી 3 મેચમાં આવું થઈ શક્યું નહીં. ચોથી મેચમાં ઈજાને કારણે તે ટેસ્ટ ડેબ્યૂ કરી શક્યો નહીં. હવે 5મી મેચ પહેલા પણ તેના ડેબ્યૂ અંગે ચર્ચા થઈ રહી છે. જેના સંદર્ભમાં કેપ્ટન શુભમન ગિલે મોટી અપડેટ આપી છે.

શુભમન ગિલે અર્શદીપ સિંહના ડેબ્યૂ પર વાત કરી

કેનિંગ્ટન ઓવલ ખાતે રમાનારી છેલ્લી અને પાંચમી ટેસ્ટ મેચ પહેલા પ્રેસ કોન્ફરન્સમાં આવેલા શુભમન ગિલે પણ અર્શદીપ સિંહના ડેબ્યૂ અંગે અપડેટ આપ્યું છે. અર્શદીપ સિંહ વિશે વાત કરતા કેપ્ટન ગિલે કહ્યું, ‘અર્શદીપ સિંહને તૈયાર રહેવાનું કહેવામાં આવ્યું છે, પરંતુ અમે પિચ જોઈને આજે સાંજ સુધીમાં પ્લેઈંગ ઈલેવન અંગે નિર્ણય લઈશું.’ ટીમ ઈન્ડિયાએ અત્યાર સુધીમાં પોતાની પ્લેઈંગ ૧૧ ટીમ નક્કી કરી લીધી હશે, પરંતુ ગિલ હવે ટોસ સમયે તેની જાહેરાત કરશે. જસપ્રીત બુમરાહ માટે આ ટેસ્ટમાં રમવું મુશ્કેલ લાગે છે. આ ઉપરાંત અંશુલ કંબોજને પણ પ્લેઈંગ ૧૧માંથી બહાર કરી શકાય છે.

અર્શદીપ ઈંગ્લેન્ડમાં કાઉન્ટી ક્રિકેટ રમ્યો છે

અર્શદીપ સિંહે ટી20 અને ઓડીઆઈ ફોર્મેટમાં ટીમ ઈન્ડિયા માટે સારું પ્રદર્શન કર્યું છે. આવી સ્થિતિમાં, તે હવે લાલ બોલ ક્રિકેટમાં પણ સફેદ બોલ જેવું પ્રદર્શન કરવા માંગશે. ભલે અર્શદીપ સિંહે હજુ સુધી ટેસ્ટ ડેબ્યૂ કર્યું નથી, પરંતુ તે કાઉન્ટી ક્રિકેટ રમ્યો છે. જેના કારણે તે જાણે છે કે આ પરિસ્થિતિઓમાં લાલ બોલથી કેવી રીતે બોલિંગ કરવી. ટીમ ઈન્ડિયાએ ઓવલ મેદાન પર જીત નોંધાવવી પડશે. આ મેચમાં હારનો અર્થ એ છે કે ભારત ટેસ્ટ સિરીઝ 3-1થી હારી જશે.

આ પણ વાંચો: IND vs ENG: પાંચમી ટેસ્ટમાં હવામાને બંને ટીમોની ચિંતા વધારી, જાણો પાંચેય દિવસ કેવું રહેશે તાપમાન