HCL Techના સી. વિજયકુમાર બન્યા IT ક્ષેત્રના સૌથી વધુ પગાર મેળવનારા CEO

Vijayakumar becomes highest paid CEO: ભારતની અગ્રણી IT કંપની HCLTechના મેનેજિંગ ડિરેક્ટર અને CEO સી. વિજયકુમાર સતત ત્રીજા વર્ષે દેશની IT સર્વિસ કંપનીઓમાં સૌથી વધુ વેતન મેળવનારા CEO બન્યા છે. કંપનીની વાર્ષિક રિપોર્ટ મુજબ, નાણાકીય વર્ષ 2026 દરમિયાન તેમને અંદાજે 18.3 મિલિયન અમેરિકન ડોલર, એટલે કે લગભગ ₹176.53 કરોડનું વાર્ષિક સેલરી પેકેજ મળ્યું છે. આ રકમ ગયા વર્ષની સરખામણીએ લગભગ 67 ટકા વધુ છે.

કંપનીના આંકડા મુજબ, સી. વિજયકુમારનો પગાર HCLTechના સરેરાશ કર્મચારીના વેતન કરતાં લગભગ 291.9 ગણો વધુ છે. 30 જૂન 2026 સુધી કંપનીમાં કુલ 2,27,181 કર્મચારીઓ કાર્યરત હતા.

ભારતની ટોચની IT કંપનીઓના CEOના પગાર

IT ક્ષેત્રની અન્ય મોટી કંપનીઓના CEOની સરખામણીએ સી. વિજયકુમારનો પગાર સૌથી વધુ રહ્યો છે.

• HCLTech – સી. વિજયકુમાર: ₹176.53 કરોડ
• Infosys – સલીલ પારેખ: ₹82.6 કરોડ
• Tech Mahindra – મોહિત જોશી: ₹67.5 કરોડ
• Wipro – શ્રીનિવાસ પલ્લિયા: ₹49.6 કરોડ
• TCS – કે. કૃતિવાસન: ₹28 કરોડ

આ આંકડાઓ દર્શાવે છે કે HCLTechના CEOનો પગાર TCSના CEO કરતાં લગભગ છ ગણો વધુ છે.

સેલરી પેકેજમાં શું સામેલ છે?

સી. વિજયકુમારના કુલ પેકેજમાં મૂળ વેતન, કામગીરી આધારિત બોનસ, લાંબા ગાળાના કેશ ઇન્સેન્ટિવ, રિસ્ટ્રિક્ટેડ સ્ટોક યુનિટ્સ (RSUs)માંથી મળેલી આવક અને અન્ય ભથ્થાં તથા સુવિધાઓનો સમાવેશ થાય છે. તેમના પેકેજનો સૌથી મોટો હિસ્સો સ્ટોક આધારિત પ્રોત્સાહનોમાંથી આવ્યો છે.

અમેરિકાથી મળે છે વેતન

સી. વિજયકુમાર અમેરિકામાં રહે છે અને તેમને HCL America Inc. દ્વારા વેતન ચૂકવવામાં આવે છે, જે HCLTechની સંપૂર્ણ માલિકીની સહાયક કંપની છે. કંપનીએ જણાવ્યું છે કે તેના કર્મચારીઓ અનેક દેશોમાં કાર્યરત હોવાથી સરેરાશ વેતનની ગણતરી તમામ વૈશ્વિક કર્મચારીઓના વેતનને ભારતીય રૂપિયામાં રૂપાંતરિત કરીને કરવામાં આવી છે.

HCLTechના નાણાકીય પરિણામો

નાણાકીય વર્ષ 2026 દરમિયાન HCLTechએ ₹16,642 કરોડનો નેટ પ્રોફિટ નોંધાવ્યો હતો, જે અગાઉના વર્ષની સરખામણીએ 4.3 ટકા ઓછો છે. જોકે કંપનીની કુલ આવકમાં વધારો થયો છે અને તે 11.18 ટકા વધીને ₹1,30,144 કરોડ સુધી પહોંચી છે.

આ પણ વાંચો : શેરબજારની નબળી શરૂઆત, સેન્સેક્સ 77,650 અને નિફ્ટી 24,216 પર ખુલ્યા