ખૂબ જ ઝડપથી ચોમાસું આગળ વધી રહ્યું છે, જાણો હવે ક્યા રાજ્યમાં પહોંચ્યું

South West Monsoon:  કેરળ પછી, દક્ષિણ પશ્ચિમ ચોમાસુ મહારાષ્ટ્રમાં સમય પહેલા આવી ગયું છે. IMD એટલે કે હવામાન વિભાગે શનિવાર, 24 મેના રોજ જણાવ્યું હતું કે ચોમાસું કેરળમાં પહોંચી ગયું છે. ખાસ વાત એ છે કે 1 જૂનની સામાન્ય તારીખની તુલનામાં, ચોમાસું 8 દિવસ વહેલું કેરળમાં પ્રવેશી ગયું હતું. હવે સવાલો ઉભા થઈ રહ્યા છે કે દેશમાં ચોમાસુ આટલું વહેલું કેવી રીતે આવી ગયું. આ પાછળનું કારણ શું છે અને તેની અસર શું થશે? અહીં, નૌતપા પણ રવિવારથી શરૂ થઈ ગઈ છે, જે 2 જૂન સુધી ચાલુ રહી શકે છે.

ચોમાસુ ક્યાં સુધી પહોંચ્યું છે?

રવિવારે મહારાષ્ટ્રમાં દક્ષિણ પશ્ચિમ ચોમાસુ ત્રાટક્યું હતું. આ સાથે, ૩૫ વર્ષમાં પહેલી વાર રાજ્યમાં આટલું વહેલું ચોમાસુ આવી ગયું છે. આઇએમડીએ જણાવ્યું હતું કે, દક્ષિણ પશ્ચિમ ચોમાસુ આગામી ત્રણ દિવસમાં મુંબઈ અને કેટલાક અન્ય ભાગોમાં પહોંચવાની ધારણા છે. IMD વૈજ્ઞાનિક સુષ્મા નાયરે જણાવ્યું હતું કે 1990 માં, દક્ષિણપશ્ચિમ ચોમાસું 20 મે ના રોજ મહારાષ્ટ્રમાં પહોંચ્યું હતું.

IMD એ જણાવ્યું હતું કે રવિવારે ચોમાસુ અરબી સમુદ્રના વધુ ભાગો, કર્ણાટક, સમગ્ર ગોવા, મહારાષ્ટ્રના કેટલાક ભાગો, ઉત્તર બંગાળની ખાડી અને મિઝોરમ, મણિપુર અને નાગાલેન્ડના કેટલાક ભાગોમાં આગળ વધ્યું હતું. તેમાં કહેવામાં આવ્યું છે કે ચોમાસાની વર્તમાન ઉત્તરીય મર્યાદા દેવગઢ, બેલગામ, કાવેરી, મંડ્યા, ધર્મપુરી, ચેન્નાઈ, આઈઝોલ અને કોહિમા વગેરે છે.

IMD એ જણાવ્યું હતું કે, ‘આગામી ત્રણ દિવસ દરમિયાન મધ્ય અરબી સમુદ્રના કેટલાક ભાગો, મુંબઈ સહિત મહારાષ્ટ્રના કેટલાક ભાગો, બેંગલુરુ સહિત કર્ણાટક, આંધ્રપ્રદેશના કેટલાક ભાગો, તમિલનાડુના બાકીના ભાગો, પશ્ચિમ-મધ્ય અને ઉત્તર બંગાળની ખાડીના કેટલાક ભાગો અને ઉત્તરપૂર્વીય રાજ્યોના કેટલાક ભાગોમાં ચોમાસાને આગળ વધારવા માટે પરિસ્થિતિઓ અનુકૂળ છે.’

ચોમાસુ આટલું વહેલું કેવી રીતે આવી ગયું?

એવું કહેવામાં આવી રહ્યું છે કે દક્ષિણપશ્ચિમ ચોમાસાના વહેલા આગમનમાં વાતાવરણીય અને દરિયાઈ પરિસ્થિતિઓએ મોટી ભૂમિકા ભજવી છે. હવામાન વિભાગે જણાવ્યું છે કે અરબી સમુદ્ર પર એક નીચા દબાણનું ક્ષેત્ર રચાયું છે અને એક ટ્રફ લાઇન વિદર્ભ સુધી વિસ્તરી છે. આ સિસ્ટમો ભેજમાં વધારો કરી રહી છે, જેના કારણે ભારતીય ઉપખંડમાં ચોમાસું ઝડપથી આગળ વધ્યું છે.

ચોમાસાના વહેલા આગમનની શું અસર થશે?

એવું નોંધાયું છે કે ચોમાસાનું વહેલું આગમન ખેતી, માછીમારી અને પશુધન માટે ફાયદાકારક બની શકે છે. ચોમાસા માટે અનુકૂળ પરિસ્થિતિઓ હોવાથી, આ ક્ષેત્રો મુશ્કેલ ઋતુ માટે પોતાને તૈયાર કરી શકે છે.

આ પણ વાંચો: બ્રિટનમાં મોટી દુર્ઘટના: જીતની ઉજવણી કરી રહેલા માથાફરેલ ડ્રાઈવરે કેટલાય લોકોને કચડી નાખ્યા