મજૂર બન્યો કરોડપતિ: હરિયાણાના ડ્રાઈવરે ₹500ની લોટરીમાં જીત્યા ₹10 કરોડ, ત્રીજા પ્રયત્ને ચમકી કિસ્મત!
હરિયાણા: 19 જાન્યુઆરી, 2026: કહેવાય છે કે જ્યારે નસીબ મહેરબાન થાય છે ત્યારે રંકને પણ રાજા બનાવી દે છે. આવું જ કંઈક હરિયાણાના સિરસા જિલ્લાના મુહમ્મદપુરિયા ગામના પૃથ્વી સિંહ સાથે થયું છે. છૂટક મજૂરી અને ડ્રાઇવિંગ કરીને પરિવારનું ગુજરાન ચલાવતા પૃથ્વી સિંહે ‘પંજાબ સ્ટેટ ડિયર લોહરી મકર સંક્રાંતિ બમ્પર લોટરી 2026’ માં ₹10 કરોડનું જેકપોટ ઇનામ જીતી લીધું છે.
₹500ની ટિકિટે બદલી નાખ્યું જીવન
પૃથ્વી સિંહે આ નસીબદાર ટિકિટ માત્ર ₹500માં ડબવાલી પાસેના કિલિયાંવાલી ખાતેથી ટિકિટ વિક્રેતા મદન સિંહ પાસેથી ખરીદી હતી. 17 જાન્યુઆરી 2026ના રોજ જ્યારે લોટરીનું પરિણામ જાહેર થયું, ત્યારે પૃથ્વી સિંહનું નામ વિજેતા તરીકે જાહેર થતા આખા પંથકમાં ચર્ચાનો વિષય બન્યો હતો. આ પંજાબ સ્ટેટ લોટરીના ઇતિહાસના સૌથી મોટા ઇનામોમાંનું એક માનવામાં આવે છે.
ત્રીજા પ્રયાસે મળી મોટી સફળતા
પૃથ્વી સિંહે અગાઉ પણ બે વાર લોટરીની ટિકિટ ખરીદી હતી, પરંતુ ત્યારે તેમને કોઈ સફળતા મળી ન હતી. આ તેમનો ત્રીજો પ્રયાસ હતો. હાર માન્યા વગર ફરી કિસ્મત અજમાવતા આ વખતે નસીબે તેમને સાથ આપ્યો અને તેઓ સીધા ₹10 કરોડના માલિક બની ગયા.
બાળકોના ભવિષ્ય માટે વાપરશે રકમ
પોતાની આ અદભૂત જીત પર પ્રતિક્રિયા આપતા પૃથ્વી સિંહે જણાવ્યું હતું કે, “મેં ક્યારેય વિચાર્યું નહોતું કે મારી જિંદગીમાં આટલી મોટી રકમ આવશે. આ પૈસાનો ઉપયોગ હું મારા બાળકોના ભવિષ્યને સુરક્ષિત કરવા માટે કરીશ.” એક સામાન્ય મજૂર માટે આ જીત માત્ર પૈસા નથી, પરંતુ તેના પરિવાર માટે એક નવી અને ઉજ્જવળ શરૂઆત છે.
