અમદાવાદટોપ ન્યૂઝટ્રેન્ડિંગ

ગુજરાતમાં વરસાદનો કહેર, 33 જિલ્લાઓ માટે હવામાન વિભાગની ચેતવણી

GUJARAT RAIN : રાજ્યમાં ચોમાસું ફરી એકવાર જોર પકડી રહ્યું છે. નવી વરસાદી સિસ્ટમ સક્રિય થતાં હવામાન વિભાગ (IMD) દ્વારા આગામી સાત દિવસ માટે ધોધમાર વરસાદની તાજી આગાહી જાહેર કરવામાં આવી છે. 14 સપ્ટેમ્બરથી શરૂ થતાં આ સપ્તાહમાં રાજ્યભરમાં ભારે પવન અને ગાજવીજ સાથે મુશળધાર વરસાદ ( GUJARAT RAIN ) વરસી શકે છે, જેના પગલે સ્થાનિક વહીવટી તંત્રને સજ્જ રહેવા સૂચના અપાઈ છે.

જિલ્લાવાર ચેતવણી અને એલર્ટની સ્થિતિ

રેડ એલર્ટ (અત્યંત ભારે વરસાદ): સૌરાષ્ટ્રના રાજકોટ અને સુરેન્દ્રનગર જિલ્લામાં મેઘરાજાનું તોફાની રૂપ જોવા મળી શકે છે. આ બંને જિલ્લાઓમાં મુશળધારથી અત્યંત ભારે વરસાદની શક્યતા જોતાં રેડ એલર્ટ જાહેર કરાયું છે.

ઓરેન્જ એલર્ટ (ભારેથી અતિ ભારે વરસાદ): અમદાવાદ, બનાસકાંઠા, પાટણ, મહેસાણા, આણંદ, ભરૂચ, જામનગર, પોરબંદર, અમરેલી, ભાવનગર, મોરબી, દેવભૂમિ દ્વારકા, ગીર સોમનાથ, બોટાદ, દીવ તેમજ કચ્છ જિલ્લામાં છૂટાછવાયા સ્થળોએ અતિ ભારે વરસાદની સંભાવના છે.

યલો એલર્ટ (ભારે વરસાદ અને ગાજવીજ): ગાંધીનગર, સાબરકાંઠા, અરવલ્લી, ખેડા, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, સુરત, ડાંગ, નવસારી, વલસાડ, તાપી, દમણ અને દાદરા તથા નગર હવેલીમાં ગાજવીજ સાથે મધ્યમથી ભારે વરસાદ વરસવાની વકી છે.

 

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

સૌરાષ્ટ્ર-કચ્છ પર મેઘમહેર યથાવત: 15 થી 20 સપ્ટેમ્બર સુધી રાજ્યવ્યાપી વરસાદી માહોલનું અનુમાન

મંગળવાર, 15 સપ્ટેમ્બરના દિવસે વરસાદનું મુખ્ય જોર સૌરાષ્ટ્ર અને કચ્છ પંથકમાં રહેવાની શક્યતા છે. રાજકોટ, જામનગર, પોરબંદર, જૂનાગઢ, અમરેલી, મોરબી, દેવભૂમિ દ્વારકા, બોટાદ તેમજ કચ્છ જિલ્લામાં ‘ઓરેન્જ એલર્ટ’ હેઠળ મુશળધાર વરસાદની શક્યતા વ્યક્ત કરવામાં આવી છે. આ તરફ ઉત્તર, મધ્ય અને દક્ષિણ ગુજરાત સહિત સૌરાષ્ટ્રના અન્ય વિસ્તારોમાં કલાકના 30 થી 40 કિમીની ઝડપે પવન ફૂંકાવા સાથે હળવા કે મધ્યમ ઝાપટાં વરસી શકે છે, જેને ધ્યાનમાં રાખીને ત્યાં ‘યલો એલર્ટ’ અપાયું છે.

આ પણ વાંચો:ChatGPTનો ડેટા ચેટ ડિલીટ કર્યા પછી ક્યાં જાય છે?

16 થી 20 સપ્ટેમ્બર: સમગ્ર રાજ્યમાં એકધારો વરસાદી માહોલ

બુધવાર, 16 સપ્ટેમ્બરથી લઈને રવિવાર, 20 સપ્ટેમ્બર સુધીના સતત પાંચ દિવસોમાં રાજ્યભરમાં મેઘાવી વાતાવરણ જળવાઈ રહેશે. હવામાન વિભાગના અહેવાલ મુજબ, આ સમયગાળા દરમિયાન ગુજરાતના તમામ 33 જિલ્લાઓ તેમજ દમણ, દીવ અને દાદરા તથા નગર હવેલીમાં ‘યલો એલર્ટ’ અમલી રહેશે. આ દિવસોમાં અનેક સ્થળોએ ગાજવીજ અને પવન સાથે હળવોથી મધ્યમ વરસાદ ચાલુ રહેવાની સંભાવના છે.

સાવચેતી અને તકેદારીના પગલાં

આગામી સપ્તાહે સમગ્ર રાજ્યમાં મેઘરાજા મહેરબાન રહેશે, જોકે પ્રારંભિક દિવસોમાં સૌરાષ્ટ્ર તથા ઉત્તર ગુજરાતના કેટલાક ભાગોમાં જળબંબાકાર કે પાણી ભરાવાની સમસ્યા સર્જાઈ શકે છે. વાવાઝોડાં કે વીજળીના કડાકા-ભડાકા સમયે નાગરિકોને ખુલ્લામાં ન રહેતાં સુરક્ષિત આશ્રય લેવા તેમજ સ્થાનિક તંત્ર દ્વારા અપાતી સાવચેતીની માર્ગદર્શિકાનું પાલન કરવા તાકીદ કરવામાં આવી છે.

આ પણ વાંચો: 25 હજાર લોકો AI યુવતીના પ્રેમમાં પડ્યા, જાણો ચોંકાવનારી હકીકત

Back to top button