હૈદરાબાદ સામેની જીત બાદ GT પહોંચ્યું આ સ્થાને, જુઓ પોઈન્ટ ટેબલમાં કોણ? ક્યાં? છે

હૈદરાબાદ, 7 એપ્રિલ : ઈન્ડિયન પ્રીમિયર લીગ (IPL) 2025માં રવિવારે રમાયેલી મેચમાં ગુજરાત ટાઇટન્સ (GT) એ સનરાઈઝર્સ હૈદરાબાદને 7 વિકેટે હરાવ્યું હતું. આ જીત બાદ ગુજરાત ટાઇટન્સે પોઈન્ટ ટેબલ પર જોરદાર છલાંગ લગાવી છે. આ સાથે જ હૈદરાબાદની ટીમ પોઈન્ટ ટેબલમાં સૌથી નીચેના સ્થાને છે.

હવે પોઈન્ટ ટેબલની સ્થિતિ જાણો

ગુજરાતે આ સિઝનમાં અત્યાર સુધીમાં 4 મેચ રમી છે. તેમાંથી તેણે 3 જીત મેળવી છે. ગુજરાત 6 પોઈન્ટ સાથે બીજા સ્થાને છે. નંબર વન પર દિલ્હી કેપિટલ્સની ટીમ છે, જેણે તેની 3 મેચમાંથી 3 જીતી છે. તે જ સમયે, સનરાઇઝર્સ હૈદરાબાદે આ સિઝનની શરૂઆત શાનદાર જીત સાથે કરી હતી. પરંતુ તે પછી તેને સતત ચાર મેચમાં હારનો સામનો કરવો પડ્યો છે. હૈદરાબાદ 2 પોઈન્ટ સાથે તળિયે છે.

સિરાજે જોરદાર બોલિંગ કરી

મોહમ્મદ સિરાજે આ મેચમાં શાનદાર બોલિંગ કરી હતી. તેણે 4 ઓવરમાં માત્ર 17 રન આપીને 4 વિકેટ લીધી હતી. સિરાજે અભિષેક શર્મા, ટ્રેવિસ હેડ, અનિકેત વર્મા અને સિમરજીત સિંહને પેવેલિયનમાં મોકલીને હૈદરાબાદની બેટિંગનો નાશ કર્યો હતો.

આવી જ હતી હૈદરાબાદની ઇનિંગ્સ

પ્રથમ બેટિંગ કરવા આવેલા હૈદરાબાદની શરૂઆત ખૂબ જ ખરાબ રહી હતી. પહેલી જ ઓવરમાં મોહમ્મદ સિરાજે હૈદરાબાદની સૌથી મજબૂત કડી ગણાતા ટ્રેવિસ હેડને આઉટ કર્યો હતો. હેડ 8 રન બનાવીને આઉટ થયો હતો. આ પછી 5મી ઓવરમાં અભિષેક શર્મા પણ આઉટ થયો હતો. તેના બેટમાંથી માત્ર 18 રન આવ્યા હતા.

ઇશાન કિશન પાસેથી મોટી ઇનિંગની અપેક્ષા હતી પરંતુ તે પણ 8મી ઓવરમાં માત્ર 17 રન બનાવીને આઉટ થઇ ગયો હતો. આ પછી હેનરિક ક્લાસને કેટલાક સારા શોટ ફટકાર્યા પરંતુ તેણે 14મી ઓવરમાં જ પોતાની વિકેટ ગુમાવી દીધી. નીતીશ રેડ્ડી પણ આગલી જ ઓવરમાં ચાલ્યો ગયો. જોકે, અંતમાં પેટ કમિન્સે કેટલાક સારા શોટ્સ રમ્યા હતા જેના કારણે હૈદરાબાદની ટીમ 20 ઓવરમાં 8 વિકેટ ગુમાવીને માત્ર 152 રન બનાવી શકી હતી.

આવી હતી ગુજરાતની ઇનિંગ્સ

153 રનના જવાબમાં ગુજરાતની શરૂઆત સારી રહી ન હતી. સાઈ સુદર્શન ત્રીજી ઓવરમાં જ આઉટ થઈ ગયો હતો. આ પછી, બટલર પણ આગલી જ ઓવરમાં ચાલ્યો ગયો. બટલર પોતાનું ખાતું પણ ખોલાવી શક્યો નહોતો. જો કે આ પછી વોશિંગ્ટન સુંદર અને શુભમન ગિલ વચ્ચે શાનદાર ભાગીદારી જોવા મળી હતી.

ગિલે શાનદાર ફિફ્ટી ફટકારી હતી જ્યારે સુંદર 49 રન બનાવીને આઉટ થયો હતો. આ પછી રધરફોર્ડે પણ કેટલાક શાનદાર શોટ ફટકાર્યા હતા. જેના કારણે ગુજરાતે 17મી ઓવરમાં જ 153 રનનો પીછો કર્યો હતો.

ગુજરાત ટાઇટન્સ (પ્લેઇંગ ઇલેવન): સાઇ સુદર્શન, શુભમન ગિલ (કેપ્ટન), જોસ બટલર (વિકેટકીપર), રાહુલ તેવટિયા, શાહરૂખ ખાન, રાશિદ ખાન, વોશિંગ્ટન સુંદર, સાઇ કિશોર, મોહમ્મદ સિરાજ, પ્રસીદ કૃષ્ણ, ઇશાંત શર્મા.

સનરાઇઝર્સ હૈદરાબાદ (પ્લેઇંગ ઇલેવન): ટ્રેવિસ હેડ, અભિષેક શર્મા, ઇશાન કિશન, નીતિશ રેડ્ડી, હેનરિક ક્લાસેન, અનિકેત વર્મા, કામિન્દુ મેન્ડિસ, પેટ કમિન્સ, જીશાન અંસારી, જયદેવ ઉનડકટ, મોહમ્મદ શમી.

આ પણ વાંચો :- વક્ફ બિલને સમર્થન કરતા ગુસ્સે થયેલા લોકોએ ભાજપના મુસ્લિમ નેતાનું ઘર સળગાવી દીધું