મોટા સમાચાર: અમેરિકાના પૂર્વ રાષ્ટ્ર પ્રમુખ જો બિડેનને કેન્સર હોવાનું સામે આવ્યું, હાડકા સુધી ફેલાઈ બીમારી

વોશિંગટન, 19 મે 2025: અમેરિકાના ભૂતપૂર્વ રાષ્ટ્ર પ્રમુખ જો બિડેનને જીવલેણ કેન્સર હોવાનું બહાર આવ્યું છે. અહેવાલો અનુસાર, બિડેનને પ્રોસ્ટેટ કેન્સરના આક્રમક સ્વરૂપનું નિદાન થયું છે. જો બિડેનના કાર્યાલયે પણ આ વાતની પુષ્ટિ કરી છે. રવિવારે બિડેનના કાર્યાલયે એક નિવેદનમાં જણાવ્યું હતું કે, જો બિડેનના શરીરના હાડકાંમાં પ્રોસ્ટેટ કેન્સર ફેલાઈ ગયું છે. ભૂતપૂર્વ રાષ્ટ્ર પ્રમુખ અને તેમનો પરિવાર ડોકટરો સાથે સારવારના વિકલ્પો પર વિચાર કરી રહ્યા છે.

શુક્રવારે કેન્સર હોવાનું સામે આવ્યું

જો બિડેનના કાર્યાલય દ્વારા આપવામાં આવેલી માહિતી અનુસાર, પ્રોસ્ટેટ નોડ્યુલ મળી આવ્યા બાદ ગયા અઠવાડિયે ડોકટરો દ્વારા જો બિડેનને જોવામાં આવ્યા હતા. આ પછી, શુક્રવારે તેમને પ્રોસ્ટેટ કેન્સર હોવાનું નિદાન થયું. તપાસમાં જાણવા મળ્યું છે કે કેન્સરના કોષો જો બિડેનના શરીરના હાડકાંમાં ફેલાઈ ગયા હતા. બિડેનના કાર્યાલયે કહ્યું કે આ રોગનું વધુ આક્રમક સ્વરૂપ છે. જોકે, કેન્સર હોર્મોન-સંવેદનશીલ હોય તેવું લાગે છે. આનું સંચાલન કરી શકાય છે.

અહીં ઉલ્લેખનિય છે કે, પ્રોસ્ટેટ કેન્સરને ‘ગ્લીસન સ્કોર’ માં માપવામાં આવે છે. તેને 1 થી 10 ના સ્કેલ પર રેટિંગ આપવામાં આવે છે. ગ્લીસન સ્કોર સામાન્ય કોષોની તુલનામાં કેન્સરગ્રસ્ત કોષો કેવા દેખાય છે તે માપે છે. જો બિડેનનો સ્કોર 9 હતો, જે કેન્સરનું સૌથી આક્રમક સ્વરૂપ છે. અમેરિકાના ભૂતપૂર્વ રાષ્ટ્ર પ્રમુખ જો બિડેન ૮૨ વર્ષના છે. આ પહેલા પણ, રાષ્ટ્રપતિ તરીકેના તેમના કાર્યકાળ દરમિયાન, બિડેનના સ્વાસ્થ્ય અંગે ઘણી ચિંતા વ્યક્ત કરવામાં આવી હતી.

ડોનાલ્ડ ટ્રમ્પે શું કહ્યું?

જો બિડેનને કેન્સર હોવાના સમાચાર બહાર આવ્યા બાદ, ઘણા નેતાઓએ તેમને સંદેશા મોકલ્યા છે. અમેરિકી રાષ્ટ્ર પ્રમુખ ડોનાલ્ડ ટ્રમ્પે કહ્યું, “જો બિડેનના કેન્સરના સમાચારથી અમે દુઃખી છીએ અને અમે જોના ઝડપથી સ્વસ્થ થવાની કામના કરીએ છીએ.” કમલા હેરિસે લખ્યું, “આ સમયે મારી પ્રાર્થનામાં જો અને તેના પરિવારને યાદ રાખું છું. જો એક યોદ્ધા છે અને મને ખબર છે કે તે આ પડકારનો સામનો શક્તિ અને આશા સાથે કરશે.”

આ પણ વાંચો: પાકિસ્તાનમાં એક કરોડથી વધુ લોકો બની શકે છે ભૂખમરાનો ભોગઃ યુએનનો રિપોર્ટ