Indian Railways Warning: હવે ટ્રેનોમાં કે રેલવે પરિસરમાં મોટેથી વાત કરવી, સ્પીકર પર ઓડિયો-વિકલ્પ કે વીડિયો ચલાવવો મોંઘો પડી શકે છે, કારણ કે રેલવે દ્વારા એક મોટી ચેતવણી આપવામાં આવી છે કે જો કોઈ મુસાફર આવું કરતો જણાશે તો તેના પર ભારે દંડ લાદવામાં આવી શકે છે. આ સાથે તે મુસાફરને જેલમાં પણ મોકલી શકાય છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સાઉથ-વેસ્ટર્ન રેલવે (અને સધર્ન રેલવે) એ પોતાના તમામ ડિવિઝનોને નિર્દેશ આપ્યો છે કે તેઓ મુસાફરોને મોબાઈલ ફોન પર મોટે-મોટેથી વાતચીત કરવા અને સ્પીકર પર ઓડિયો કે વીડિયો ચલાવવા સામે જાગૃત કરે. રેલવેએ વધુમાં જણાવ્યું છે કે જો કોઈ મુસાફર માને નહીં તો તેની સામે રેલવે અધિનિયમની કલમ 145 હેઠળ કાર્યવાહી કરી શકાય છે, જેમાં 1,000 રૂપિયા સુધીનો દંડ અને છ મહિના સુધીની જેલની સજા થઈ શકે છે.

રેલવેએ જણાવ્યું કે રેલ મુસાફરોની યાત્રાને આરામદાયક બનાવવાના ઉદ્દેશ્યથી આ ચેતવણી જારી કરવામાં આવી છે. 6 ઓક્ટોબર 2026ના રોજ જારી કરાયેલા આ નિર્દેશમાં ચેન્નઈ સ્થિત સધર્ન રેલવે મુખ્યાલયે પોતાના ડિવિઝનોને કહ્યું કે તેઓ મુસાફરોને જણાવે કે આ પ્રકારના વર્તનથી અન્ય લોકોને કેટલી પરેશાની થાય છે.

ઈયરફોનનો ઉપયોગ કરો

રેલવે ઝોને પોતાના ડિવિઝનોને કહ્યું છે કે તેઓ આ સંદેશને સ્થાનિક ભાષાઓ, હિન્દી અને અંગ્રેજીમાં ‘પબ્લિક એડ્રેસ સિસ્ટમ’ દ્વારા પહોંચાડે. આ સાથે જ મુસાફરોને એ જણાવવા માટે નોટિસ પણ લગાવવામાં આવશે કે મોટે-મોટેથી ફોન પર વાત કરવાથી કે સ્પીકર પર ઓડિયો-વીડિયો ચલાવવાથી બાકીના મુસાફરોને કેવા પ્રકારની સમસ્યાઓનો સામનો કરવો પડે છે. રેલવેએ પોતાના પત્રમાં કહ્યું કે મુસાફરોએ પોતાના ફોનનો ઉપયોગ કરતી વખતે ઈયરફોનનો ઉપયોગ કરવો જોઈએ.

આ પણ વાંચોઃ લુધિયાણાની શાળામાં શિક્ષણ જગત શરમસાર: પુસ્તક લેવા ગયેલી 16 વર્ષની સગીરા સાથે પટાવાળાના અડપલાં!

વર્ષ 2012માં પણ જારી કરાયો હતો આવો આદેશ

આ નવા નિર્દેશમાં રેલવેએ બોર્ડના 23 જુલાઈ 2012ના એક પત્રનો હવાલો આપ્યો છે. તે સમયે રેલવે કોચોમાં (ખાસ કરીને AC ડબ્બાઓમાં) મુસાફરો દ્વારા મોબાઈલ ફોન પર મોટેથી વાત કરવા, લાંબી વાતચીત કરવા અને આપત્તિજનક રિંગટોન વાપરવાની ફરિયાદો પર આ પત્ર જારી કરવામાં આવ્યો હતો.

રેલવે બોર્ડે ત્યારે રેલવે અધિકારીઓને નિર્દેશ આપ્યો હતો કે તેઓ મુસાફરોને જણાવે કે આ પ્રકારના વર્તનથી બાકીના મુસાફરોના આરામ પર ખરાબ અસર પડે છે. તેમાં મોબાઈલ ફોનને સાઈલન્ટ કે વાઈબ્રેશન મોડ પર રાખવા, ઓછો અવાજ ધરાવતી રિંગટોનનો ઉપયોગ કરવા અને મોટેથી વાતચીત કરવાથી બચવાની સલાહ પણ આપવામાં આવી હતી.

રેલવેએ કહ્યું કે મોબાઈલ ઈન્ટરનેટ બધી જગ્યાએ ઉપલબ્ધ હોવાને કારણે, જાહેર જગ્યાઓ પર ફોનના સ્પીકર પરથી વીડિયો અને અન્ય કન્ટેન્ટ ચલાવવું સામાન્ય બની ગયું છે. આનાથી મુસાફરોને થતી પરેશાની રોકવા માટે કડક પગલાં લેવાની જરૂર છે.

કોને હશે દંડ ફટકારવાનો અધિકાર?

આ નિર્દેશ ચેન્નઈ, પલક્કડ, તિરૂવનંતપુરમ, તિરૂચિરાપલ્લી, મદુરાઈ અને સેલમ ડિવિઝનના સીનિયર ડિવિઝનલ કોમર્શિયલ મેનેજરોને જારી કરવામાં આવ્યા છે. નિર્દેશમાં કહેવામાં આવ્યું છે કે રેલવે એક્ટની જોગવાઈઓ હેઠળ, ટિકિટ એક્ઝામિનર (TTE) કે તેનાથી ઉપરના રેન્કના કોમર્શિયલ સ્ટાફને આવી પરેશાની ઊભી કરનારાઓ પર 1,000 રૂપિયાનો દંડ ફટકારવાનો અધિકાર છે.

આ પત્રમાં ‘જન વિશ્વાસ (જોગવાઈઓમાં સુધારો) અધિનિયમ, 2026’ હેઠળ સુધારેલી કલમ 145(2)(a) નો ઉલ્લેખ કરવામાં આવ્યો છે. આ કલમ પરેશાની ઊભી કરવા, અશ્લીલ હરકતો કરવા, ગાળાગાળી કે અસભ્ય ભાષાનો ઉપયોગ કરવા અને રેલવેની સુવિધાઓમાં જાણીજોઈને અડચણ ઊભી કરવા જેવા મામલાઓ સાથે નિપટે છે, જેનાથી મુસાફરોની આરામદાયક યાત્રા પર અસર પડે છે.

તેમાં કેટલાક કિસ્સાઓમાં વ્યક્તિને રેલવે પરિસરમાંથી બહાર કાઢવાની જોગવાઈ પણ છે. આ સાથે જ જો કોઈ વ્યક્તિ ના પાડવા છતાં પરેશાની ઊભી કરવાનું ચાલુ રાખે છે, તો તેને વધુ કડક સજા થઈ શકે છે. રેલવેએ સંબંધિત ડિવિઝનોને જરૂરી કાર્યવાહી કરવા અને 20 ઓક્ટોબર, 2026 સુધીમાં પોતાના મુખ્યાલયને આ અંગેનો અમલીકરણ રિપોર્ટ સોંપવા કહ્યું છે.

આ પણ વાંચોઃ ફ્રાન્સમાં ફાટી નીકળેલી હિંસા અને લૂંટફાટ વચ્ચે રાજકીય ખળભળાટ: ગૃહમંત્રી લોરેન્ટ નુન્સનું રાજીનામું મેક્રોને ફગાવ્યું