600થી વધુ વિકેટ, છતાં ટીમ ઈન્ડિયામાં એન્ટ્રી નહીં… જાડેજા પર સિલેક્ટર્સ ક્યારે થશે મહેરબાન?

Dharmendrasinh Jadeja Ravindra Jadeja relation: ડોમેસ્ટિક ક્રિકેટમાં સતત વિકેટો લેવા છતાં ક્યારેક ટીમ ઈન્ડિયામાં સ્થાન મેળવવું મુશ્કેલ બની જાય છે. આવી જ કંઈક કહાની અનુભવી ડાબોડી સ્પિનર ધર્મેન્દ્રસિંહ જાડેજાની છે. 36 વર્ષીય જાડેજાએ ઘરેલુ ક્રિકેટમાં વિકેટોની ઝડી વરસાવી દીધી હોવા છતાં અત્યાર સુધી તેમને ભારતીય સિનિયર ટીમ તરફથી રમવાની તક મળી શકી નથી. ફર્સ્ટ ક્લાસ, લિસ્ટ-એ અને ટી20 ક્રિકેટ મળીને આ ડાબોડી સ્પિનરે કુલ 609 વિકેટ ઝડપી છે. રણજી ટ્રોફીમાં છેલ્લા ઘણા વર્ષોથી તેમનું પ્રદર્શન શાનદાર રહ્યું છે.

ધર્મેન્દ્રસિંહ જાડેજાનું નામ સાંભળીને અવારનવાર ક્રિકેટ ચાહકોનું ધ્યાન રવીન્દ્ર જાડેજા તરફ જાય છે. બંને સૌરાષ્ટ્રમાંથી આવે છે અને બંને ડાબોડી સ્પિન બોલિંગ કરે છે, પરંતુ બંને વચ્ચે કોઈ પારિવારિક સંબંધ નથી. ઘરેલુ ક્રિકેટમાં આશરે 13 વર્ષ સુધી સૌરાષ્ટ્રની બોલિંગની મુખ્ય કડી રહેલા ધર્મેન્દ્રસિંહ હવે પોતાની કરિયરનો નવો અધ્યાય શરૂ કરવા જઈ રહ્યા છે. તેમણે સૌરાષ્ટ્ર ક્રિકેટ એસોસિએશન (SCA) પાસેથી નો ઓબ્જેક્શન સર્ટિફિકેટ (NOC) મેળવી લીધું છે. આગામી ઘરેલુ સીઝનમાં તેઓ છત્તીસગઢ તરફથી રમતા જોવા મળશે.

ફર્સ્ટ ક્લાસ ક્રિકેટમાં શાનદાર આંકડા

રવીન્દ્ર જાડેજાએ ઈન્ટરનેશનલ ક્રિકેટમાં પોતાની અલગ ઓળખ બનાવી, જ્યારે ધર્મેન્દ્રસિંહ જાડેજાની કરિયર ઘરેલુ ક્રિકેટમાં વિતી. અહીં તેમણે પોતાની બોલિંગથી એવા આંકડા ઊભા કર્યા છે જેમને નજરઅંદાજ કરવા મુશ્કેલ છે. ધર્મેન્દ્રસિંહે 100 ફર્સ્ટ ક્લાસ મેચોમાં 26.25ની એવરેજથી 423 વિકેટ ઝડપી છે. તેમણે 26 વખત ઈનિંગ્સમાં 5 કે તેથી વધુ વિકેટ અને 7 વખત મેચમાં 10 કે તેથી વધુ વિકેટ લેવાની સિદ્ધિ મેળવી છે. ફર્સ્ટ ક્લાસ ક્રિકેટમાં ઈનિંગ્સમાં તેમનું સર્વશ્રેષ્ઠ બોલિંગ પ્રદર્શન 7/32 રહ્યું છે.

રણજી ટ્રોફીમાં સૌથી સફળ બોલર

ધર્મેન્દ્રસિંહ જાડેજાની સૌથી મોટી ઉપલબ્ધિઓમાંથી એક રણજી ટ્રોફીમાં તેમનું સાતત્યપૂર્ણ પ્રદર્શન છે. 2017-18 સીઝનથી લઈને અત્યાર સુધી ધર્મેન્દ્રસિંહે રણજી ટ્રોફીમાં 293 વિકેટ લીધી છે. આ સમયગાળા દરમિયાન અન્ય કોઈપણ બોલરે તેમનાથી વધુ વિકેટ લીધી નથી. તેમ છતાં ભારતીય ટીમ પાસે રવિચંદ્રન અશ્વિન, રવીન્દ્ર જાડેજા અને કુલદીપ યાદવ જેવા દિગ્ગજ વિકલ્પો હોવાને કારણે તેમને રાષ્ટ્રીય ટીમમાં સ્થાન મળવું અત્યંત મુશ્કેલ બન્યું હતું.

બેટિંગમાં પણ બતાવ્યો કમાલ

ધર્મેન્દ્રસિંહનું શાનદાર પ્રદર્શન માત્ર રેડ બોલ ક્રિકેટ સુધી સીમિત નથી. તેમણે 90 લિસ્ટ-એ મેચોમાં 28.33ની એવરેજથી 121 વિકેટ (સર્વશ્રેષ્ઠ 7/10) લીધી છે, જ્યારે 73 ટી20 મેચોમાં 24.92ની એવરેજથી 65 વિકેટ પોતાના નામે કરી છે. આ ઉપરાંત તેમણે ફર્સ્ટ ક્લાસ મેચોમાં 7 અડધી સદી સાથે 2123 રન, લિસ્ટ-એમાં 566 રન અને ટી20માં 208 રન બનાવી બેટિંગમાં પણ મહત્વનું યોગદાન આપ્યું છે.

સૌરાષ્ટ્ર સાથે શા માટે પૂરો કર્યો સંબંધ?

નવી સીઝન પહેલા ટીમ મેનેજમેન્ટ ઈચ્છતું હતું કે અનુભવી સ્પિનર ધર્મેન્દ્રસિંહ મુખ્યત્વે રેડ બોલ (ટેસ્ટ) ક્રિકેટ પર ધ્યાન કેન્દ્રિત કરે, જ્યારે ધર્મેન્દ્રસિંહ વનડે અને ટી20 વર્ઝનમાં પણ રમવા ઈચ્છતા હતા. આ જ બાબતે બંને વચ્ચે વાતચીત થયા બાદ તેમણે સૌરાષ્ટ્ર સાથેનો લાંબો પ્રવાસ પૂરો કરવાનો નિર્ણય લીધો હતો. ધર્મેન્દ્રસિંહ 2019-20 અને 2022-23 સીઝનમાં રણજી ટ્રોફી જીતનાર સૌરાષ્ટ્ર ટીમનો મહત્વનો હિસ્સો રહ્યા હતા. SCA ના અધિકારીએ પણ તેમના આ નિર્ણય બાદ તેમને ભવિષ્ય માટે શુભકામનાઓ આપી છે.