James Anderson Emotional Social Media Post Lancashire End: ઇંગ્લેન્ડના દિગ્ગજ ફાસ્ટ બોલર જેમ્સ એન્ડરસને લગભગ બે વર્ષ પહેલાં જુલાઈ 2024 માં આંતરરાષ્ટ્રીય ક્રિકેટમાંથી નિવૃત્તિ લીધી હતી, પરંતુ તેઓ સ્થાનિક ક્રિકેટ રમવાનું ચાલુ રાખતા હતા. હવે તેમની હોમ ટીમ લેન્કશાયરે 2027 સીઝન માટે એન્ડરસન સાથેનો રમવાનો કરાર રિન્યુ કરવાનો ઇનકાર કરી દીધો છે. આ સાથે જ ટીમ સાથેના તેમના 25 વર્ષ જૂના જોડાણનો કડવો અને આઘાતજનક અંત આવ્યો છે. કરાર રિન્યુ ન થતાં 44 વર્ષીય એન્ડરસને સોશિયલ મીડિયા પર એક વિશેષ પોસ્ટ શેર કરીને પોતાની લાગણીઓ વ્યક્ત કરી હતી.

“જો મારા હાથમાં હોત તો આમ અંત ન આવ્યો હોત”

સોશિયલ મીડિયા પર પોતાની ભાવુક પોસ્ટમાં જેમ્સ એન્ડરસને લખ્યું કે, “મેં બાળપણથી જ લેન્કશાયરને સપોર્ટ કર્યો છે અને 25 વર્ષ સુધી આ ટીમ માટે રમવું એ મારા માટે એક સ્વપ્ન સાચું થવા સમાન હતું. ઓલ્ડ ટ્રેફોર્ડના મેદાન પર રમવા ઊતરવું હંમેશાં ખાસ રહ્યું છે અને મારી પાસે અહીંની અદ્ભુત યાદો છે. ટીમનું નેતૃત્વ કરવાનું સન્માન પણ મને મળ્યું હતું. જો આ નિર્ણય મારા હાથમાં હોત, તો આ સંબંધનો અંત આ રીતે ન આવ્યો હોત. પરંતુ હું ટીમના ખેલાડીઓ અને ચાહકોને ભવિષ્ય માટે શુભેચ્છા પાઠવું છું.” નોંધનીય છે કે એન્ડરસને પોતાના 25 વર્ષના જોડાણના અંતની વાત કરી છે, પરંતુ ક્રિકેટમાંથી સંપૂર્ણ નિવૃત્તિનો ઉલ્લેખ કર્યો નથી.

“અમારું લક્ષ્ય ટીમનું પુનર્નિર્માણ કરવાનું છે”

બીજી તરફ, લેન્કશાયર કાઉન્ટી ક્રિકેટ ક્લબે પણ સત્તાવાર નિવેદન બહાર પાડીને એન્ડરસનનો આભાર માન્યો હતો. લેન્કશાયરના નવા ક્રિકેટ ડિરેક્ટર પોલ ફાર્બ્રેસે કરાર ન લંબાવવાના કડક નિર્ણય અંગે માહિતી આપતાં જણાવ્યું હતું કે, “સોમવાર, 19 ઓક્ટોબરના રોજ અમીરાત ઓલ્ડ ટ્રેફોર્ડ ખાતે જીમી (જેમ્સ એન્ડરસન) અને રિચાર્ડ કેન્યોન સાથે મુલાકાત યોજાઈ હતી. આ બેઠકમાં મેં જીમી સાથે અમારી પુરુષ ટીમ પુનર્નિર્માણની યોજનાઓ વિશે ખુલ્લી ચર્ચા કરી હતી. અમારું લક્ષ્ય કાઉન્ટી ચેમ્પિયનશિપના ડિવિઝન ટુમાંથી પ્રમોટ થઈને આગામી 3 થી 4 વર્ષમાં ડિવિઝન વન ટાઇટલ જીતવાનું છે.”

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ટીમનું નવું વિઝન અને એન્ડરસનની શાનદાર કારકિર્દીના આંકડા

ફાર્બ્રેસે વધુમાં ઉમેર્યું હતું કે, “અમે હવે ટીમનું વ્યાપક સ્તરે પુનર્નિર્માણ કરવા માંગીએ છીએ, જેથી ભવિષ્ય માટે નવી ટીમ તૈયાર કરી શકાય. આ યોજનાના ભાગરૂપે જ મેં ખૂબ જ ભારે હૃદયે જીમીને જાણ કરી હતી કે અમે 2027 સીઝન માટે તેનો કરાર ન લંબાવવાનો મુશ્કેલ નિર્ણય લીધો છે.” ઉલ્લેખનીય છે કે, જેમ્સ એન્ડરસને પોતાની આંતરરાષ્ટ્રીય કારકિર્દીમાં 188 ટેસ્ટ, 194 વનડે અને 19 T20 આંતરરાષ્ટ્રીય મેચો રમી હતી. આ ઉપરાંત, તેમણે લેન્કશાયર માટે 112 ફર્સ્ટ-ક્લાસ મેચ, 61 લિસ્ટ-એ મેચ અને 40 T20 મેચોમાં પ્રતિનિધિત્વ કર્યું હતું.

આ પણ વાંચો: અર્શદીપ સિંહનો ઐતિહાસિક રેકોર્ડ: ભુવનેશ્વર કુમારને પછાડી એક કેલેન્ડર વર્ષમાં લીધી સૌથી વધુ T20I વિકેટ