Devbhumi Dwarka: દેવભૂમિ દ્વારકા જિલ્લાના સલાયા બંદરની એક માછીમારી બોટ સાથે ઓખા નજીકના દરિયાઈ વિસ્તારમાં ગંભીર દુર્ઘટના સર્જાઈ છે. માછીમારી કરતી વેળાએ મધદરિયે બોટના એન્જિન રૂમમાં અચાનક ટેક્નિકલ ખામી સર્જાતાં આગ ભભૂકી ઊઠી હતી. ડીઝલ અને તેલના કારણે આગે જોતજોતામાં વિકરાળ સ્વરૂપ ધારણ કરી આખી બોટને લપેટમાં લઈ લીધી હતી. ભડભડ સળગ્યા બાદ બોટે દરિયામાં જળસમાધિ લઈ લીધી હતી. જોકે, રાહતની વાત એ રહી કે સમયસૂચકતા અને આસપાસની બોટોની તાકીદની મદદથી બોટમાં સવાર તમામ 5 ખલાસીઓનો આબાદ બચાવ થયો છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

એન્જિનમાં ખામી સર્જાતા આગે ક્ષણભરમાં વિકરાળ રૂપ ધારણ કર્યું

પ્રાપ્ત વિગતો અનુસાર, સલાયા બંદરની આ ફિશિંગ બોટ દરિયાઈ ખેડાણ માટે ઓખા નજીક ગઈ હતી. મધદરિયે માછીમારી ચાલી રહી હતી તે દરમિયાન અચાનક બોટના મશીનરી વિભાગમાં સ્પાર્ક કે ટેક્નિકલ ખામી સર્જાતાં ધુમાડાના ગોટેગોટા નીકળવા લાગ્યા હતા. ખલાસીઓ કંઈ સમજે કે આગ પર કાબૂ મેળવવાનો પ્રયાસ કરે તે પહેલાં જ ફ્યુઅલની હાજરીના લીધે આગે સમગ્ર બોટને પોતાની ઝપેટમાં લઈ લીધી હતી.

આ પણ વાંચો:અમદાવાદ ડ્રગ્સ કેસમાં મોટો ખુલાસો, ગુજરાતમાં નેટવર્ક ફેલાવવાની હતી તૈયારી

5 ખલાસીઓનો ચમત્કારિક બચાવ, બોટ માલિકને લાખોનું નુકસાન

બોટમાં અચાનક આગ ફાટી નીકળતાં સવાર 5 ખલાસીઓમાં ભારે દોડધામ અને ગભરાટ ફેલાયો હતો. ખલાસીઓએ તાત્કાલિક સાવચેતીનાં પગલાં ભરતાં અને નજીકમાં રહેલી અન્ય માછીમારી બોટોની મદદ મેળવી લેતાં તમામ પાંચેય જિંદગીઓ હેમખેમ બચી ગઈ હતી. જોકે, બોટ સંપૂર્ણપણે બળીને ખાખ થઈ ગયા બાદ ઊંડા પાણીમાં ડૂબી જતાં માછીમારીના મોંઘા સાધનો, નેટ અને બોટ સહિત માલિકને લાખો રૂપિયાનું મોટું આર્થિક નુકસાન સહન કરવાનો વારો આવ્યો છે. બનાવ અંગે સલાયા અને ઓખા મરીન પોલીસ તેમજ સંબંધિત તંત્રને જાણ કરવામાં આવી છે.

આ પણ વાંચો:આગાહી છતાં ન થઈ વ્યવસ્થા? જેતપુર યાર્ડમાં મગફળી પલળતાં સવાલો