કેમ દીવો પ્રગટાવવાને લઈને ભડક્યો વિવાદ? જાણો મંદિર અને દરગાહનો વિવાદ ન્યાયાધીશના મહાભિયોગ સુધી કેવી રીતે પહોંચ્યો

તમિલનાડુ: 10 ડિસેમ્બર, 2025: તમિલનાડુમાં મદુરાઈ નજીક આવેલા થિરુપરનકુન્દ્રમ પહાડી પર મંદિર અને દરગાહ વચ્ચેનો વિવાદ સતત ગરમાઈ રહ્યો છે. વિપક્ષી સાંસદોએ એક ન્યાયાધીશ વિરુદ્ધ મહાભિયોગ લાવવાનો પ્રસ્તાવ આપ્યો છે, જેણે મંદિરની પહાડી પરના એક સ્તંભ પર દીવો પ્રગટાવવાની મંજૂરી આપી હતી.

આ પહાડી ભગવાન મુરુગનના છ પવિત્ર આશ્રયોમાંથી એક છે. અહીં એક પ્રાચીન પથ્થર કોતરીને બનાવેલું ગુફા જેવું મંદિર આવેલું છે, જેની નજીક એક દરગાહ પણ છે. મંદિર અને દરગાહ વચ્ચે માત્ર 3 કિલોમીટરનું અંતર હોવાથી, પહાડી પરના અધિકારને લઈને હિન્દુ અને મુસ્લિમ સમુદાયો વચ્ચે લાંબા સમયથી તણાવ રહે છે.

દીપમની પરંપરા અને ન્યાયાધીશનો નિર્ણય

મંદિર અને દરગાહે 1920માં પહેલીવાર પહાડી પરના કાયદાકીય અધિકારને પડકાર્યો હતો. અગાઉ એક સિવિલ કોર્ટે ચુકાદો આપ્યો હતો કે, દરગાહ સાથે જોડાયેલા કેટલાક ક્ષેત્રો સિવાય આ પહાડી સુબ્રમણ્યસ્વામી મંદિર (દેવસ્થાનમ)ની છે. જોકે આ ચુકાદામાં દીપમ (કાર્થીગાઈ દીપમ લેમ્પ)ની પરંપરાનો કોઈ ઉલ્લેખ નહોતો. ત્યારબાદ મદ્રાસ હાઈકોર્ટના જસ્ટિસ જી.આર. સ્વામીનાથનનો નિર્ણય આવ્યો, જેમણે મંદિરના પવિત્ર સ્તંભમાં દીવો પ્રગટાવવાની મંજૂરી આપી હતી.

મહાભિયોગનો પ્રસ્તાવ અને ભાજપનો વિરોધ

જસ્ટિસ જી.આર. સ્વામીનાથનના આ નિર્ણય સામે વિપક્ષી સાંસદોએ મહાભિયોગનો પ્રસ્તાવ રજૂ કર્યો છે, જેના પર રાજકારણ ગરમાયું છે.

ભાજપ સાંસદની ટીકા

ભાજપ સાંસદ મનન કુમાર મિશ્રાએ વિપક્ષના મહાભિયોગ નોટિસની ટીકા કરી અને જસ્ટિસ સ્વામીનાથનના નિર્ણયને યોગ્ય ઠેરવ્યો. મિશ્રાએ કહ્યું કે, તમિલનાડુમાં ચૂંટણી છે, તેથી ડીએમકે (DMK) ના લોકો વોટોનું ધ્રુવીકરણ કરવા માંગે છે. મંદિરમાં દીવો પ્રગટાવવામાં શું ખોટું છે? કોર્ટે કહ્યું કે સુરક્ષા હોવી જોઈએ, પરવાનગી હોવી જોઈએ. જો તમે દરેક મામલાને મહાભિયોગ સુધી લઈ જશો, તો તે એક મજાક બની જશે. ચૂંટણી હોવા છતાં વિપક્ષને ધ્રુવીકરણથી કોઈ લાભ થશે નહીં.

આ વિવાદ ધાર્મિક સ્થળો પરના અધિકારની સાથે સાથે રાજ્યમાં રાજકીય ગરમાવો પણ લાવી રહ્યો છે.