Darbhanga BDO Manoj Kumar case: બિહારના દરભંગામાં BDO મનોજ કુમારની પત્ની અમૃતા કુમારીના મોતનો મામલો હવે વધુ રહસ્યમય બની ગયો છે. શરૂઆતમાં આ કેસને દહેજ હત્યાના આરોપ તરીકે જોવામાં આવી રહ્યો હતો, પરંતુ તપાસ આગળ વધતા તેમાં કથિત અફેર અને ડિજિટલ પુરાવાનો એંગલ સામે આવ્યો છે.
પોલીસ તપાસમાં BDO મનોજ કુમાર અને બેગુસરાયમાં તૈનાત ASI અનુ કુમારી વચ્ચેના સંબંધોની વાત સામે આવી છે. પોલીસે બંનેની ધરપકડ કરી કોર્ટમાં રજૂ કર્યા હતા. કોર્ટે BDO મનોજ કુમારને ન્યાયિક કસ્ટડીમાં મોકલી આપ્યા છે, જ્યારે ASI અનુ કુમારીને PR બોન્ડ પર મુક્ત કરવામાં આવી છે. પોલીસના જણાવ્યા અનુસાર તપાસ દરમિયાન મોબાઇલ ચેટ, કોલ ડિટેલ્સ, લોકેશન ટ્રેકિંગ અને CCTV ફૂટેજ જેવા મહત્વપૂર્ણ ટેક્નિકલ પુરાવા મળ્યા છે. આ પુરાવાના આધારે બંનેની સામસામે બેસાડી પૂછપરછ કરવામાં આવી હતી. શરૂઆતમાં બંનેએ સંબંધોની વાત નકારી હતી, પરંતુ ટેક્નિકલ પુરાવા સામે આવ્યા બાદ તપાસમાં નવો વળાંક આવ્યો હોવાનું પોલીસનું કહેવું છે.
પત્નીને અફેરની જાણ થઈ હોવાનો પરિવારનો આરોપ
મૃતક અમૃતા કુમારીના ભાઈ રાજકુમારે આરોપ લગાવ્યો છે કે તેમની બહેનને મનોજ કુમાર અને અનુ કુમારીના સંબંધ વિશે જાણ થઈ ગઈ હતી. ત્યારબાદ તે તેનો વિરોધ કરતી હતી. પરિવારનો આરોપ છે કે આ કારણે અમૃતાને માનસિક અને શારીરિક રીતે પરેશાન કરવામાં આવતી હતી. પરિવાર દ્વારા એવો પણ આરોપ લગાવવામાં આવ્યો છે કે દહેજની માંગ અને અફેરનો વિરોધ કરવાના કારણે અમૃતાને ઝેર આપીને મારી નાખવામાં આવી હતી. જોકે, પોલીસ તમામ આરોપોની તપાસ કરી રહી છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
કોલેજથી શરૂ થઈ હતી ઓળખ
તપાસ સાથે જોડાયેલા સૂત્રો અનુસાર, મનોજ કુમાર અને અનુ કુમારીની ઓળખ મુઝફ્ફરપુરમાં સ્પર્ધાત્મક પરીક્ષાની તૈયારી દરમિયાન થઈ હતી. ત્યારબાદ બંને વચ્ચે સંપર્ક વધ્યો હોવાનું કહેવાય છે. બીજી તરફ, અમૃતા અને અનુ કુમારી પણ કોલેજની સહેલીઓ હોવાનું સામે આવ્યું છે. ડિસેમ્બર 2022માં મનોજ કુમાર અને અમૃતાના લગ્ન થયા હતા, પરંતુ પોલીસનું કહેવું છે કે લગ્ન બાદ પણ મનોજ અને અનુ વચ્ચે સંપર્ક ચાલુ રહ્યો હતો.
CCTV ફૂટેજથી તપાસને મળ્યો નવો વળાંક
પોલીસને એક CCTV ફૂટેજ પણ મળ્યો હોવાનો દાવો કરવામાં આવ્યો છે. અધિકારીઓના જણાવ્યા અનુસાર આ ફૂટેજમાં અમૃતા સાથે મારપીટ થતી હોવાના સંકેતો મળ્યા છે. આ આધારે કેસની તપાસ વધુ આગળ વધારવામાં આવી રહી છે. પોલીસનું કહેવું છે કે વાયરલ વીડિયો અને CCTV ફૂટેજમાં કેટલાક અન્ય આરોપીઓ પણ દેખાઈ રહ્યા છે, જેમની શોધખોળ ચાલી રહી છે.
ગાયબ મોબાઇલ, ટેબલેટ અને લેપટોપની શોધખોળ
હવે પોલીસનું ધ્યાન અમૃતાના બે મોબાઇલ ફોન, ટેબલેટ અને લેપટોપ પર છે. પરિવારનો આરોપ છે કે આ ઇલેક્ટ્રોનિક ઉપકરણોમાં મહત્વપૂર્ણ પુરાવા હતા, જે ગાયબ કરી દેવામાં આવ્યા છે. પોલીસ ટેક્નિકલ સર્વેલન્સની મદદથી આ ઉપકરણોની શોધ કરી રહી છે. સાથે જ BDO મનોજ કુમાર અને ASI અનુ કુમારીના મોબાઇલ ફોનની ફોરેન્સિક તપાસ પણ કરાવવામાં આવી રહી છે. આ કેસમાં BDO મનોજ કુમાર ઉપરાંત તેમના માતા-પિતા, ભાઈ અને બહેનને પણ આરોપી બનાવવામાં આવ્યા છે. પોલીસ અન્ય આરોપીઓની ધરપકડ માટે કાર્યવાહી કરી રહી છે. હાલમાં સમગ્ર મામલામાં ડિજિટલ પુરાવા, ફોરેન્સિક રિપોર્ટ અને અન્ય આરોપીઓની પૂછપરછ બાદ જ ઘટનાની સંપૂર્ણ હકીકત સ્પષ્ટ થશે.
આ પણ વાંચો: ચૂંટણી પહેલાં મમતા બેનર્જીને આંચકો, TMCના દિગ્ગજ નેતાઓએ પકડ્યો ભાજપનો હાથ
