દિવાળી પહેલા રાજ્યોને કેન્દ્રની ભેટ, 1 લાખ કરોડ રૂપિયા આપ્યા, UPને સૌથી વધુ

નવી દિલ્હી, 2 ઓક્ટોબર, 2025: તહેવારોની મોસમ પહેલા, કેન્દ્ર સરકારે રાજ્યોને એક મહત્વપૂર્ણ ભેટ આપી છે. કેન્દ્ર સરકારે રાજ્યોને એડવાન્સ ટેક્સ ડિવોલ્યુશનમાં રૂ. 1 લાખ કરોડથી વધુ રકમ છૂટી કરી છે. નાણા મંત્રાલયે જણાવ્યું હતું કે 1 ઓક્ટોબરના રોજ, એડવાન્સ ટેક્સ ડિવોલ્યુશનમાં રૂ. 1,01,603 કરોડ રૂપિયા જારી કરવામાં આવ્યા હતા. આ ભંડોળ રાજ્યોને તહેવારોની મોસમ દરમિયાન વિકાસ પ્રોજેક્ટ્સને વેગ આપવા માટે મૂડી ખર્ચ અને કલ્યાણકારી યોજનાઓ પર ખર્ચ કરવા માટે આપવામાં આવ્યું હતું. આ ફાળવણીમાં ગુજરાતને 3,534 કરોડ રૂપિયા મળ્યા છે.

એડવાન્સ ડિવોલ્યુશન શા માટે

સામાન્ય રીતે, દર મહિનાની 10 તારીખે ટેક્સ ડિવોલ્યુશન જારી કરવામાં આવે છે. જો કે, આ વર્ષે, દિવાળીને ધ્યાનમાં રાખીને, કેન્દ્ર સરકારે અગાઉથી ભંડોળ જારી કર્યું છે. આનો હેતુ રાજ્યોને માળખાગત સુવિધાઓ, કલ્યાણકારી યોજનાઓ અને તહેવાર સંબંધિત પ્રવૃત્તિઓ પર ઝડપથી ખર્ચ કરવા સક્ષમ બનાવવાનો છે.

દરેક રાજ્યનો હિસ્સો કેટલો છે?

આ ભંડોળનો સૌથી મોટો હિસ્સો ઉત્તર પ્રદેશને રૂ. 18,227 કરોડ, ત્યારબાદ બિહારને રૂ. 10,219 કરોડ અને મધ્ય પ્રદેશને રૂ. 7,976 કરોડ મળ્યા. દરમિયાન, પશ્ચિમ બંગાળને 7,644 કરોડ રૂપિયા મળ્યા, જ્યારે મહારાષ્ટ્રને 6,418 કરોડ રૂપિયા મળ્યા છે. ગોવાને સૌથી ઓછું 392 કરોડ રૂપિયા અને સિક્કિમને 394 કરોડ રૂપિયા મળ્યા છે.

અન્ય રાજ્યોને કેટલું મળ્યું?

અન્ય રાજ્યોમાં, ઓડિશાને 4,601 કરોડ રૂપિયા, તમિલનાડુને 4,144 કરોડ રૂપિયા અને આંધ્રપ્રદેશને 4,112 કરોડ રૂપિયા મળ્યા. રાજસ્થાનને 6,123 કરોડ રૂપિયા, ગુજરાતને 3,534 કરોડ રૂપિયા, કર્ણાટકને 3,705 કરોડ રૂપિયા અને છત્તીસગઢને 3,462 કરોડ રૂપિયા મળ્યા છે. નાના રાજ્યોમાં, અરુણાચલ પ્રદેશને 1,785 કરોડ રૂપિયા, મિઝોરમને 508 કરોડ રૂપિયા, નાગાલેન્ડને 578 કરોડ રૂપિયા, મણિપુરને 727 કરોડ રૂપિયા અને ત્રિપુરાને 719 કરોડ રૂપિયા મળ્યા છે.

ટોચના પાંચ રાજ્યોને સૌથી વધુ ફાળવણી

ઉત્તર પ્રદેશ રૂ. 18,227 કરોડ

બિહાર રૂ. 10,219 કરોડ

મધ્યપ્રદેશ રૂ. 7,976 કરોડ

પશ્ચિમ બંગાળ રૂ. 7,644 કરોડ

મહારાષ્ટ્ર રૂ. 6,418 કરોડ

રાજકીય દ્રષ્ટિકોણ પણ મહત્વપૂર્ણ

રસપ્રદ વાત એ છે કે, ઉત્તર પ્રદેશ, બિહાર અને મધ્યપ્રદેશ જેવા મોટા રાજ્યોને સૌથી વધુ ભંડોળ મળ્યું છે. આવતા વર્ષે આ રાજ્યોમાં ચૂંટણી ગતિવિધિઓ તીવ્ર રહેશે. તેથી, વધારાના ભંડોળને રાજકીય રીતે પણ મહત્વપૂર્ણ માનવામાં આવે છે કારણ કે તે સીધા કલ્યાણકારી યોજનાઓ અને જાહેર લાભો સાથે જોડાયેલું છે.

આ પણ વાંચોઃ અમેરિકાએ નેવાદાના એક લિથિયમ ખાણમાં પાંચ ટકા હિસ્સેદારી લીધી, રોકાણથી ઘટશે ચીન પરની નિર્ભરતા