પાલીતાણાનો શેત્રુંજી ડેમ ઓવરફ્લો થતા તમામ 59 દરવાજા ખોલાયા, 20 ગામોમાં એલર્ટ જાહેર

Palitana’s Shetrunji Dam has overflowed: ભાવનગર જિલ્લા સહિત સમગ્ર સૌરાષ્ટ્ર માટે ઉત્સાહ અને આનંદના મોટા સમાચાર સામે આવ્યા છે. પિયત અને પીવાના પાણીનો મુખ્ય સ્ત્રોત ગણાતો પાલીતાણાનો શેત્રુંજી ડેમ ચાલુ સીઝનમાં ઓવરફ્લો થયો છે. ડેમના જળગ્રહણ વિસ્તાર અને ઉપરવાસમાં થયેલા ભારે વરસાદને કારણે પાણીની આવક સતત વધી રહી હતી, જેના પરિણામે ડેમની સપાટી નિયત મર્યાદા વટાવી ગઈ છે.

ડેમમાંથી 9440 ક્યુસેક પાણી છોડાયું

સિંચાઈ વિભાગના અધિકારીઓએ જણાવ્યા અનુસાર, ડેમની સુરક્ષાને ધ્યાનમાં રાખીને વહેલી સવારે તમામ 59 દરવાજા તબક્કાવાર ખોલવામાં આવ્યા છે. હાલમાં કુલ 9440 ક્યુસેક પાણી શેત્રુંજી નદીમાં છોડવામાં આવી રહ્યું છે. આના કારણે નદી બે કાંઠે વહેતી થઈ છે.

આ પાણી તળાજા અને મહુવા વિસ્તારો તરફ વહેશે, જેનાથી આસપાસના ભૂગર્ભ જળસ્તરમાં નોંધપાત્ર વધારો થશે. આનો મોટો લાભ આગામી શિયાળુ અને ઉનાળુ પાકો માટે ખેડૂતોને મળશે.

વહીવટી તંત્ર સતર્ક, 20થી વધુ ગામોને ચેતવણી

ડેમમાંથી પાણી છોડવાની પ્રક્રિયા શરૂ થતાં જ જિલ્લા વહીવટી તંત્ર ત્વરિત એક્શન મોડમાં આવી ગયું છે. પાલીતાણા, તળાજા અને આસપાસના નીચાણવાળા વિસ્તારોમાં આવેલા 20થી વધુ ગામોના સરપંચો અને તલાટીઓને વીડિયો કોન્ફરન્સ અને ઇમરજન્સી મેસેજ દ્વારા સાવચેત રહેવાની તાકીદ કરવામાં આવી છે.

સલાહ અને ચેતવણી:

• નદીના પટમાં પશુઓને ન લઈ જવા
• માછીમારી ન કરવી
• નદી કિનારે સેલ્ફી લેવા કે નહાવા ન જવું

આપત્તિ વ્યવસ્થાપનની ટીમો કોઈપણ કટોકટીની સ્થિતિને પહોંચી વળવા માટે સ્ટેન્ડબાય પર છે.

આ વરસાદ અને ડેમના ઓવરફ્લોને કારણે સૌરાષ્ટ્રના ખેડૂતોમાં ખુશીની લહેર છે. શેત્રુંજી ડેમનું આ ઓવરફ્લો ચોમાસાની સારી શરૂઆત સાબિત થઈ રહ્યું છે અને આગામી દિવસોમાં વધુ સારા વરસાદની આશા વધારી રહ્યું છે.

આ પણ વાંચો: મોરબીના જેતપરમાં ખેડૂતોની લડત: આમરણાંત ઉપવાસ પાર્ટ-2 સમેટાયો, પાર્ટ-3ની તૈયારી શરૂ!