7 કલાક હવામાં રહ્યા બાદ દિલ્હી પાછી ફરી એર ઇન્ડિયાની ફ્લાઇટ, શું કેનેડાએ ના આપી એન્ટ્રી?

Air India: દિલ્હીથી વેન્કુવર જતી એર ઇન્ડિયા ફ્લાઇટ AI-185ને કાલે એક મોટી ચૂકને કારણે લગભગ સાત કલાક આકાશમાં રહીને ફરી ઈંદિરા ગાંધી ઈન્ટરનેશનલ એરપોર્ટ પર વાપસી કરવી પડી. વિમાનને કેનેડામાં ઉડાન ભરવાની નિયમનકારી મંજૂરી જ મળી નહોતી, જે એરલાઇનની ભૂલ તરીકે સામે આવી છે. હવે આ ઘટનાએ એરલાઇન દ્વારા મુસાફરી કરનારા યાત્રીઓમાં સલામતી અને કામગીરીના ધોરણો અંગે પ્રશ્ન ઊભા કર્યા છે.

ફ્લાઇટમાં સેંકડો મુસાફરો સવાર હતા

પ્રાપ્ત માહિતી અનુસાર, ફ્લાઇટ સવારે 11:34 વાગ્યે દિલ્હીથી રવાના થઈ હતી જેમાં સેંકડો મુસાફરો સવાર હતા. શરૂઆતમાં ફ્લાઇટે ખાડી વિસ્તારમાં ચાલી રહેલા સંઘર્ષમાંથી બચવા માટે પૂર્વ દિશાનું એરસ્પેસ પસંદ કર્યું હતું. જો કે, લગભગ ચાર કલાક પછી, જ્યારે વિમાન ચીનના કુનમિંગ નજીક હવાઈ ક્ષેત્રમાં પ્રવેશ્યું, ત્યારે એર ઇન્ડિયાને ખબર પડી કે તૈનાત બોઇંગ 777-200LR વિમાન કેનેડા માટે અધિકૃત નથી. એર ઇન્ડિયા પાસે ફક્ત તેના બોઇંગ 777-300ER કાફલા સાથે કેનેડા જવાની પરવાનગી છે.

ક્યાં થઈ ચૂક?

તમને જણાવી દઈએ કે ઘણા દેશો ઉડ્ડયન મંજૂરીઓ એરલાઈનના આધારે આપે છે, તો ક્યાંક તે વિશિષ્ટ વિમાન પ્રકાર અથવા ટેલ નંબર સુધી મર્યાદિત રાખે છે. આ ભૂલનો અહેસાસ થતાં જ ફ્લાઇટને વચ્ચેથી જ દિલ્હી પાછી બોલાવી લેવામાં આવી. ફ્લાઇટ સાંજે આશરે 7:19 વાગ્યે સુરક્ષિત રીતે ઉતરી. બધા મુસાફરો અને ક્રૂ કોઈ પણ ઘટના વિના નીચે ઉતરી ગયા.

એર ઇન્ડિયાએ શું કહ્યું?

એર ઇન્ડિયાએ એક નિવેદન બહાર પાડીને તેને “ઓપરેશનલ સમસ્યા” ગણાવી અને કહ્યું કે આ કાર્યવાહી માનક પ્રક્રિયાઓ અનુસાર કરવામાં આવી હતી. એરલાઇને કહ્યું કે, “વિમાન સુરક્ષિત રીતે ઉતર્યું છે, અને બધા મુસાફરો અને ક્રૂને બહાર કાઢવામાં આવ્યા છે. મુસાફરોને થયેલી અસુવિધા બદલ અમને દુઃખ છે.” દિલ્હીમાં ગ્રાઉન્ડ સ્ટાફે મુસાફરો માટે હોટેલમાં રહેવાની વ્યવસ્થા અને અન્ય સુવિધાઓની વ્યવસ્થા કરી હતી. આજે સવારે બધા મુસાફરો સાથે બીજી ફ્લાઇટ રવાના થઈ હતી.

આ પણ વાંચો: ‘હિતોના ટકરાવનો આરોપ લાગી શકે છે’, CJI સૂર્યકાંતે CEC અને EC નિમણૂકોના મામલામાંથી પોતાને અલગ કર્યા