ઊંઝા-ઉનાવામાં ભેળસેળયુક્ત વરિયાળી પર મોટી કાર્યવાહી, રૂ. 19.6 લાખનો 26 ટન જથ્થો જપ્ત
Action taken against adulterated fennel: રાજ્યના નાગરિકોના આરોગ્યની સુરક્ષા માટે ગુજરાત સરકાર પ્રતિબદ્ધ છે. મુખ્યમંત્રી ભૂપેન્દ્ર પટેલના માર્ગદર્શન હેઠળ અને આરોગ્ય રાજ્ય મંત્રી પ્રફુલ પાનશેરીયાના નેતૃત્વમાં ખોરાક અને ઔષધ નિયમન તંત્ર દ્વારા ભેળસેળિયા તત્વો સામે રાજ્યવ્યાપી કડક કાર્યવાહી હાથ ધરવામાં આવી રહી છે.
ઉનાવામાં બે સ્થળોએ દરોડા
ખોરાક અને ઔષધ નિયમન તંત્રની ફ્લાઈંગ સ્કોડ દ્વારા મહેસાણા જિલ્લાના ઉનાવા ખાતે બે અલગ-અલગ સ્થળોએ અચાનક દરોડા પાડવામાં આવ્યા હતા. તપાસ દરમિયાન ગેરકાયદે રીતે વરિયાળીમાં કેમિકલયુક્ત અખાદ્ય રંગ ભેળવી તેને વધુ આકર્ષક દેખાડવાનો પ્રયાસ થતો હોવાનું સામે આવ્યું હતું.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
26 ટનથી વધુ વરિયાળીનો જથ્થો સીઝ
દરોડા દરમિયાન અંદાજે રૂ. 19.6 લાખની કિંમતનો 26 ટનથી વધુ વરિયાળીનો જથ્થો કબ્જે લેવામાં આવ્યો હતો. ઉપરાંત, સંબંધિત વેપારીઓ પાસે ફૂડ સેફ્ટી લાઇસન્સ પણ ન હોવાનું તપાસમાં સામે આવ્યું છે.
લેબોરેટરી તપાસ માટે નમૂનાઓ મોકલાયા
ફૂડ સેફ્ટી અધિકારીઓએ વરિયાળીના કાયદેસરના નમૂનાઓ એકત્ર કરીને વધુ તપાસ અને વિશ્લેષણ માટે લેબોરેટરીમાં મોકલી આપ્યા છે. લેબોરેટરીના રિપોર્ટના આધારે સંબંધિત લોકો સામે કાયદેસરની કાર્યવાહી આગળ વધારવામાં આવશે.
ભેળસેળિયાઓ સામે ઝીરો ટોલરન્સની નીતિ
આરોગ્ય રાજ્ય મંત્રી પ્રફુલ પાનશેરીયાએ જણાવ્યું હતું કે લોકોના સ્વાસ્થ્ય સાથે ચેડાં કરનારાઓ સામે કોઈપણ પ્રકારની નરમાઈ દાખવવામાં આવશે નહીં. ફૂડ એન્ડ ડ્રગ્સ વિભાગ સતત સતર્ક છે અને આગામી દિવસોમાં પણ ભેળસેળિયા તત્વો સામે ચેકિંગ અભિયાન વધુ કડક બનાવવામાં આવશે.
