મહારાષ્ટ્ર 28 જાન્યુઆરી 2026: મહારાષ્ટ્રના નાયબ મુખ્યમંત્રી અજિત પવારનું વિમાન દુર્ઘટનામાં મૃત્યુ થયું છે. બુધવારે સવારે બારામતીમાં લેન્ડિંગ કરતી વખતે તેમનું વિમાન ક્રેશ થયું હતું. આ દુર્ઘટનામાં વિમાન સંપૂર્ણપણે બળી ગયું હતું, જેમાં સવાર તમામ લોકોના મોત થયા હતા. અજિત પવાર ઉપરાંત, તેમાં ચાર અન્ય લોકો સવાર હતા. વિમાન સંચાલક VSR એવિએશને અન્ય ચાર લોકોના મોત અંગે માહિતી આપી.
એવિએશન દ્વારા પુષ્ટિ આપવામાં આવી છે કે અકસ્માતમાં સામેલ વિમાન પાઇલટ સુમિત કપૂર અને સહ-પાઇલટ સંભવી પાઠક હતા. એવિએશન દ્વારા જણાવવામાં આવ્યું હતું કે બંને પાઇલટ સારી રીતે તાલીમ પામેલા હતા અને વિમાનમાં કોઈ ખામી નહોતી.
વિમાનમાં બે ક્રૂ મેમ્બર ઉપરાંત અજિત પવારના બે સ્ટાફ મેમ્બર પણ હતા જેમના નામ વિદીપ જાધવ અને પિંકી માલી છે.
અધિકારીઓએ જણાવ્યું હતું કે આ દુર્ઘટનામાં કોઈ બચી શક્યું નથી. લિયરજેટ 45 નામનું આ વિમાન VSR એવિએશન દ્વારા સંચાલિત હતું અને VT-SSK તરીકે નોંધાયેલું હતું. આ જેટ મંગળવારે સવારે મુંબઈથી રવાના થયું હતું.
રનવે પર ઉતરાણ કરવાનો પ્રયાસ કરતી વખતે વિમાને નિયંત્રણ ગુમાવ્યું
નાગરિક ઉડ્ડયન અધિકારીઓના જણાવ્યા અનુસાર, સવારે ૮:૪૮ વાગ્યે રનવે ૧૧ ના થ્રેશોલ્ડ પાસે લેન્ડિંગ કરવાનો પ્રયાસ કરતી વખતે વિમાને નિયંત્રણ ગુમાવ્યું હતું. વિમાન રનવે સાથે અથડાયું અને તરત જ આગ લાગી ગઈ. અકસ્માતનું કારણ તપાસ હેઠળ છે.
લિયરજેટ 45 એક મધ્યમ કદનું બિઝનેસ જેટ છે જે તેના અદ્યતન એવિઓનિક્સ, શ્રેષ્ઠ પ્રદર્શન અને જગ્યા ધરાવતી કેબિન માટે જાણીતું છે. તેનો ઉપયોગ સામાન્ય રીતે ચાર્ટર સેવાઓ અને સત્તાવાર મુસાફરી માટે થાય છે.
જમીન પર પટકાતા જ વિમાનમાં આગ લાગી ગઈ
પ્રત્યક્ષદર્શીઓએ જણાવ્યું હતું કે વિમાન ઉતરાણ કરવાનો પ્રયાસ કરતી વખતે લથડી ગયું અને આંખના પલકારામાં ક્રેશ થયું. અહેવાલ મુજબ, ક્રેશ પછી લગભગ પાંચ વિસ્ફોટ થયા હતા અને વિમાનમાં આગ લાગી હતી.
આ અકસ્માતમાં વિમાન સંપૂર્ણપણે બળી ગયું હતું, જેમાં અજિત પવાર સહિત પાંચેય લોકોના મોત થયા હતા. અજિત પવારના મૃતદેહને બારામતીની એક હોસ્પિટલમાં લઈ જવામાં આવ્યો છે, જ્યાં તેમના પરિવાર અને સમર્થકો પહોંચી રહ્યા છે. હોસ્પિટલની બહાર રડતા લોકોની ભીડ એકઠી થઈ ગઈ છે.
આ પણ વાંચો: પ્લેન ઉડાડનાર પાઇલટ શામ્ભવી પાઠક કોણ હતી? પ્રોફેશનલ ફ્લાઈંગ માટે ક્યાંથી મેળવી હતી ટ્રેનિંગ?
