વડોદરામાં બે જૂથો વચ્ચે હિંસક અથડામણ, પથ્થરમારો અને તલવારબાજીમાં અનેક ઘાયલ, વીડિયો વાયરલ

ગુજરાતના વડોદરામાં એક જ સમુદાયના બે જૂથો વચ્ચે જોરદાર પથ્થરમારો અને તલવારબાજી થઈ, જેમાં ઘણા લોકો ગંભીર રીતે ઘાયલ થયા. આ ઘટના લાલબાગ બ્રિજ નીચેના વિસ્તારમાં બની છે. ઘટના બાદ, ઘાયલોને તાત્કાલિક હોસ્પિટલમાં લઈ જવામાં આવ્યા છે. પોલીસે ઘટનાસ્થળે પહોંચીને પરિસ્થિતિને કાબુમાં લીધી હતી. આ મામલે વધુ તપાસ ચાલી રહી છે.

અહેવાલો અનુસાર, જૂના વિવાદને લઈને બંને જૂથો વચ્ચે ઝઘડો થયો હતો, જે બાદમાં મારામારીમાં ફેરવાઈ ગયો. બંને પક્ષોએ તલવારો અને અન્ય હથિયારો વડે એક બીજા પર હુમલો કર્યો, જેમાં ઘણા લોકોને ગંભીર ઈજાઓ થઈ છે.

સમગ્ર વિસ્તારમાં પોલીસ દળો તૈનાત

ઘટનાની માહિતી મળતાં જ પોલીસ તાત્કાલિક ઘટનાસ્થળે પહોંચી ગઈ હતી અને પરિસ્થિતિને કાબુમાં લીધી હતી. પોલીસે બંને જૂથોના અમુક વ્યક્તિઓની અટકાયત કરી છે અને ઘટનાના કારણની તપાસ કરી રહી છે. આ ઘટનાએ શહેરમાં વ્યાપક ચર્ચા જગાવી છે. વધુ કોઈ અનિચ્છનીય ઘટના ન બને તે માટે પોલીસે સમગ્ર વિસ્તારમાં કડક સુરક્ષા વ્યવસ્થા ગોઠવી દીધી છે.

વીડિયો વાયરલ થયા બાદ પોલીસે કેસ નોંધ્યો

ઘટનાનો વીડિયો વાયરલ થયા બાદ પોલીસે ફરિયાદી તરીકે કાર્યવાહી કરી અને કેસ દાખલ કર્યો. અત્યાર સુધીમાં બંને પક્ષોના કુલ 6 લોકોની ધરપકડ કરવામાં આવી છે. બધા આરોપીઓ દાંતેશ્વર વિસ્તારના સંતોષવાડીના ભરવાડ વાસના રહેવાસી છે. જાણવા મળ્યુ છે કે, સંબંધીઓ વચ્ચે લાંબા સમયથી ચાલી આવતી દુશ્મનાવટને કારણે આ વિવાદ થયો હતો. જોકે, હવે પરિસ્થિતિ સામાન્ય છે.

આ પણ વાંચો: ગાંધીનગરમાં દૂષિત પાણીથી ટાઈફોઈડના કેસો વધતા દિલ્હીથી અમિત શાહે આદેશ આપ્યા, યુદ્ધના સ્તરે કામ કરો