કર્મચારીની વફાદારીનું અનોખું ઈનામ: કંપનીએ આપ્યું રૂ.2100 કરોડનું બોનસ
નવી દિલ્હી | તારીખ: 27 ડિસેમ્બર, 2025: નાતાલના અવસરે સામાન્ય રીતે લોકો નાની-મોટી ભેટની અપેક્ષા રાખતા હોય છે, પરંતુ અમેરિકાના લુઇસિયાનામાં એક બિઝનેસમેને તેના કર્મચારીઓને એવી ભેટ આપી કે આખી દુનિયા આશ્ચર્યચકિત થઈ ગઈ છે. ગ્રેહામ વોકર નામના આ શખ્સે પોતાની ફેમિલી મેન્યુફેક્ચરિંગ કંપની ‘Fibrebond’ વેચતા પહેલા એક અનોખી શરત રાખી હતી કે આ વેચાણનો સીધો ફાયદો તેના દરેક કર્મચારીને મળવો જોઈએ.
₹2,157 કરોડનું બોનસ
અહેવાલો અનુસાર, કંપનીના વેચાણમાંથી મળેલી કુલ રકમનો 15% હિસ્સો, એટલે કે અંદાજે $240 મિલિયન (આશરે ₹2,157 કરોડ), કુલ 540 કર્મચારીઓ વચ્ચે વહેંચવામાં આવ્યો છે. આ ગણતરી મુજબ, દરેક કર્મચારીને સરેરાશ $4,43,000 (આશરે ₹3.7 કરોડ) બોનસ તરીકે મળશે. આ રકમ આગામી પાંચ વર્ષમાં ચૂકવવામાં આવશે, જેની શરત માત્ર એટલી જ છે કે કર્મચારીએ આ સમયગાળા દરમિયાન કંપની સાથે જોડાયેલા રહેવું પડશે.
કેમ લીધો આવો મોટો નિર્ણય?
ગ્રેહામ વોકરે જણાવ્યું કે આ નિર્ણય કર્મચારીઓની પ્રામાણિકતા અને વફાદારીથી પ્રેરાઈને લેવામાં આવ્યો છે. ઘણા કર્મચારીઓ મુશ્કેલ સમયમાં પણ કંપનીની પડખે ઊભા રહ્યા હતા. જ્યારે જૂન મહિનામાં આ બોનસની જાહેરાત થઈ, ત્યારે શરૂઆતમાં કર્મચારીઓને વિશ્વાસ જ નહોતો બેઠો. કેટલાકે તેને મજાક માની તો કેટલાંક ભાવુક થઈને રડી પડ્યા હતા.
કર્મચારીઓના સપના થયા સાકાર
આ રકમ મળ્યા બાદ કર્મચારીઓના જીવનમાં મોટું પરિવર્તન આવ્યું છે. કોઈએ ઘરનું લોન ચૂકવ્યું તો કોઈએ જૂના દેવામાંથી મુક્તિ મેળવી. કેટલાકે બાળકોની કોલેજની ફી ભરી. 1995થી કંપનીમાં કાર્યરત એક મહિલા કર્મચારીએ પોતાના જીવનનું સપનું એવું ‘બુટિક’ ખોલવાની તૈયારી શરૂ કરી દીધી છે.
કેમ આ પગલું ખાસ છે?
સામાન્ય રીતે કંપની વેચાય ત્યારે નફો માત્ર શેરહોલ્ડરોને મળતો હોય છે, પરંતુ વોકરે માનવતાનું ઉદાહરણ પૂરું પાડતા આ લાભ એવા કર્મચારીઓને આપ્યો જેમના પાસે કંપનીના શેર નહોતા. સોશિયલ મીડિયા પર લોકો આ પગલાને ‘સાચું નેતૃત્વ’ ગણાવી રહ્યા છે. એક યુઝરે લખ્યું, “આ છે સાચો મૂડીવાદ, જ્યાં બોસ પોતાની ટીમને પરિવાર સમજે છે.
આ પણ વાંચો: ગૌતમ ગંભીરની ટેસ્ટ કોચિંગ જોખમમાં? BCCIએ અનુભવી દિગ્ગજને ઓફર આપી હોવાનું ચર્ચા
