‘બુરા ના માનો હોલી હૈ’ કહીને રંગ ફેંકશો તો પડશે મોંઘું, આ કલમો હેઠળ થઈ શકે છે સજા
HD ન્યુઝ ડેસ્ક: આજે દેશભરમાં હોળીનો તહેવાર ધામધૂમથી ઉજવાશે. ગલીઓમાં ડીજેના અવાજ, સોશિયલ મીડિયા પર રીલ્સ અને દરેક તરફ ઉડતા ગુલાલનો માહોલ જોવા મળશે. પરંતુ એક વાત સ્પષ્ટ છે — તહેવારનો ઉત્સાહ કોઈની વ્યક્તિગત સીમા (Personal Space) તોડવાનો પરવાનો આપતો નથી.
ઘણા કિસ્સાઓમાં લોકો રસ્તે જતા વ્યક્તિને ‘બુરા ના માનો હોળી છે’ કહીને જબરદસ્તી રંગ લગાવી દે છે. માત્ર આ શબ્દો બોલી દેતા કાનૂની જવાબદારીથી બચી શકાતું નથી. જો કોઈ વ્યક્તિએ સ્પષ્ટ મનાઈ કર્યા પછી પણ તેને જબરદસ્તી રંગ લગાવવામાં આવે, તો તે કાનૂની ગુનો ગણાય શકે છે.
મનાઈ છતાં શારીરિક સ્પર્શ ગુનો
ભારતીય ન્યાય સંહિતા (BNS) ની કલમ 74 મુજબ, કોઈ મહિલા સાથે તેની ઈચ્છા વિરુદ્ધ શારીરિક સ્પર્શ કરવો દંડનીય ગુનો છે. હોળીના બહાને પકડવું, ગળે મળવાની જબરદસ્તી કરવી અથવા રંગ લગાવવાનો પ્રયત્ન કરવો કાયદેસર કાર્યવાહી તરફ દોરી શકે છે. તેમાં જેલ તેમજ દંડની જોગવાઈ છે.
અશ્લીલ વર્તન પણ ગણાશે ગુનો
કલમ 75 હેઠળ, કોઈપણ વ્યક્તિ સાથે બિનસંમતિથી અયોગ્ય રીતે સ્પર્શ કરવો, ડબલ મીનિંગ ટિપ્પણીઓ કરવી, ગંદા ઈશારા કરવાં અથવા અસભ્ય વર્તન કરવું યૌન ઉત્પીડન ગણાય છે. હોળીના નામે કરવામાં આવતી આવી હરકતો મજાક તરીકે સ્વીકારાતી નથી. દોષિત સાબિત થવા પર સજા અને આર્થિક દંડ બંને થઈ શકે છે.
શબ્દો પણ બનાવે છે કેસ
ઘણા લોકો માને છે કે માત્ર હાથ લગાડવાથી જ ગુનો બને છે, પરંતુ એવું નથી. કલમ 79 મુજબ, કોઈની લાજ ભંગ થાય તેવી ટિપ્પણી અથવા ઈશારો કરવો પણ ગુનો છે. હોળીના બહાને ગંદા જોક્સ કે ભદ્દી ભાષાનો ઉપયોગ કરવો કાનૂની મુશ્કેલી ઊભી કરી શકે છે.
ઈજા થાય તો વધુ ગંભીર ગુનો
જો જબરદસ્તી રંગ લગાવતા વખતે કોઈને ઈજા થાય અથવા કેમિકલવાળા રંગથી ચામડીને નુકસાન થાય, તો કલમ 115(2) હેઠળ ઈજા પહોંચાડવાનો ગુનો બને છે. મજાકમાં આપેલો ધક્કો પણ કાનૂની કાર્યવાહી તરફ દોરી શકે છે.
જાહેર ઉપદ્રવ પણ ગેરકાયદેસર
જાહેર જગ્યાએ હંગામો કરવો, રસ્તો રોકવો, જબરદસ્તી પાણી કે રંગ ફેંકવો અથવા લોકોની અવરજવર અટકાવવી કલમ 270 હેઠળ જાહેર ઉપદ્રવ ગણાય શકે છે. આવી પરિસ્થિતિમાં પોલીસ સ્થળ પર જ કાર્યવાહી કરી શકે છે અને દંડ ફટકારી શકે છે.
તહેવાર ઉજવો, પણ મર્યાદામાં
હોળી આનંદ અને રંગોનો તહેવાર છે, પરંતુ દરેકની સંમતિ અને સીમાનો માન રાખવો જરૂરી છે. ‘બુરા ના માનો હોળી છે’ કહેવું કાનૂની બચાવ નથી. તહેવારને આનંદથી ઉજવો, પરંતુ કાયદાની હદમાં રહીને.
આ પણ વાંચો : અફઘાન-પાકિસ્તાન જંગ: 5 દિવસમાં પાકિસ્તાનના 150 સૈનિકોના ઉડાવી દીધા, તાલિબાને કર્યો મોટો દાવો
