PoKમાં તણાવ વધ્યો: 4 પ્રદર્શનકારી નેતાઓ સામે અરેસ્ટ વોરંટ

Tensions rise in PoK: પાકિસ્તાનના કબજાવાળા કાશ્મીર (PoK)માં રાજકીય તણાવ વધુ ગાઢ બન્યો છે. PoK પ્રશાસને ‘જોઇન્ટ અવામી એક્શન કમિટી’ (JAAC)ના ચાર નેતાઓ સામે ધરપકડ વોરંટ જાહેર કર્યા છે. સાથે જ આ નેતાઓ વિશે માહિતી આપનાર અથવા તેમની ધરપકડમાં મદદ કરનાર વ્યક્તિને 1 કરોડ પાકિસ્તાની રૂપિયાનું ઇનામ આપવાની જાહેરાત પણ કરવામાં આવી છે.

JAAC એક મહત્વપૂર્ણ સિવિલ સોસાયટી સંગઠન છે, જેને થોડા દિવસ પહેલા જ પાકિસ્તાન પ્રશાસને પ્રતિબંધિત જાહેર કર્યું હતું. આ સંગઠન છેલ્લા કેટલાક સમયથી PoKમાં ચાલી રહેલા વિરોધ પ્રદર્શનનું મુખ્ય કેન્દ્ર રહ્યું છે. તાજેતરના પ્રદર્શન દરમિયાન 100થી વધુ લોકોના મોત થયા હોવાના અને 400થી વધુ લોકો ઘાયલ થયાના અહેવાલો સામે આવ્યા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

કયા નેતાઓ સામે કાર્યવાહી?

જેમના વિરુદ્ધ ધરપકડ વોરંટ જાહેર કરવામાં આવ્યા છે તેમાં શૌકત નવાઝ મીર, ઉમર નઝીર કશ્મીરી, ખ્વાજા મેહરાન અર્શદ અને સરદાર અમન ખાનના નામ સામેલ છે.

જાહેર કરાયેલા નોટિફિકેશનમાં કહેવામાં આવ્યું છે કે પ્રતિબંધિત JAAC સાથે જોડાયેલા આ નેતાઓની ધરપકડમાં મદદરૂપ થતી કોઈપણ માહિતી માટે 10 મિલિયન પાકિસ્તાની રૂપિયા (1 કરોડ)નું ઇનામ આપવામાં આવશે. સાથે જ માહિતી આપનારની ઓળખ સંપૂર્ણપણે ગુપ્ત રાખવાની ખાતરી પણ આપવામાં આવી છે.

આખો વિવાદ શું છે?

આ સમગ્ર મામલો PoKમાં 27 જુલાઈએ યોજાનારી વિધાનસભા ચૂંટણી સાથે જોડાયેલો છે. JAACએ 45માંથી 12 બેઠકો શરણાર્થીઓ માટે અનામત રાખવાના નિર્ણયનો વિરોધ કર્યો હતો અને પ્રદર્શનનું આહ્વાન કર્યું હતું.

નક્કી કરાયેલા વિરોધ પ્રદર્શનના એક દિવસ પહેલા જ વિસ્તારમાં અથડામણો શરૂ થઈ ગઈ હતી. પ્રદર્શનકારીઓએ માત્ર બેઠક અનામત મુદ્દે જ નહીં, પરંતુ વીજળીની અછત, ઈન્ટરનેટ બંધ, મોંઘવારી, બેરોજગારી, સંસાધનોના કથિત શોષણ અને રાજકીય અવગણના જેવા મુદ્દાઓ પર પણ ગંભીર પ્રશ્નો ઉઠાવ્યા હતા.

ભારતે કરી કડક નિંદા

ભારતે PoKમાં પ્રદર્શનકારીઓ વિરુદ્ધ પાકિસ્તાનની કાર્યવાહી પર કડક પ્રતિક્રિયા આપી છે. વિદેશ મંત્રાલયના પ્રવક્તા રણધીર જયસ્વાલે કહ્યું કે આંતરરાષ્ટ્રીય સમુદાયે પાકિસ્તાનને તેની કાર્યવાહી માટે જવાબદાર ઠેરવવું જોઈએ.

ભારતે શાંતિપૂર્ણ વિરોધના અધિકારનો સન્માન કરવાની પણ અપીલ કરી છે.

માનવાધિકાર આયોગે પણ ઉઠાવ્યા સવાલ

પાકિસ્તાનના માનવાધિકાર આયોગ (HRCP)એ પણ JAAC પર પ્રતિબંધ મૂકવાના નિર્ણય અંગે ગંભીર ચિંતા વ્યક્ત કરી છે. આયોગે અતિશય બળપ્રયોગ, નાગરિકો અને સુરક્ષાકર્મીઓના મોત તેમજ સંચાર વ્યવસ્થા બંધ કરવાની કડક નિંદા કરી છે.

HRCPએ પોતાના નિવેદનમાં જણાવ્યું કે વિસ્તારના લોકોને સતત રાજકીય અધિકારોથી વંચિત રાખવામાં આવે છે ત્યારે માત્ર વાતચીતથી સમસ્યાનો ઉકેલ આવી શકે નહીં. શાંતિપૂર્ણ વિરોધનો અધિકાર જાળવવો જરૂરી છે.

આ પણ વાંચો : ઉરી સેક્ટરના આર્મી કેમ્પમાં ગ્રેનેડ ફાટ્યો, સેનાના 2 જવાન શહીદ થયા